କେନ୍ଦୁଝର,୦୫/୧୨: ପର୍ଯ୍ୟଟକଙ୍କ ପାଇଁ ନୂଆ ସମ୍ଭାବନା ହେବାକୁ ଯାଉଛି ‘ଅଟେଇ ଜଙ୍ଗଲ ସଫାରୀ’ । ଆସନ୍ତା ସପ୍ତାହ ଠାରୁ ଜଙ୍ଗଲ ସଫାରୀରେ ବୁଲିବାର ମଜା ପର୍ଯ୍ୟଟକ ଉଠାଇବାକୁ ଥିବା ବେଳେ ଭିତ୍ତିଭୂମି ନିର୍ମାଣ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । କେନ୍ଦୁଝର ବନବିଭାଗ ପକ୍ଷରୁ ପର୍ଯ୍ୟଟକଙ୍କୁ ଆକୃଷ୍ଠ କରିବା ପାଇଁ ନୂଆ ପରିକଳ୍ପନା ପର୍ଯ୍ୟଟନ ମାନଚିତ୍ରରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିବାକୁ ଯାଉଛି । ଅଟେଇ ସଂରକ୍ଷିତ ଜଙ୍ଗଲରେ ମହାବଳ ବାଘ ସହିତ ବିରଳ ପ୍ରଜାତିର ବନ୍ୟପ୍ରାଣୀ ଚଳପ୍ରଚଳ କରୁଥିବାରୁ ସାଧାରଣ ଲୋକଙ୍କୁ ଜଙ୍ଗଲ ଭିତରକୁ ପ୍ରବେଶ ପାଇଁ ରହିଥିଲା କଟକଣା । ତେବେ ଜଙ୍ଗଲ ସଫାରୀ ଅନୁଭୂତି ସାଉଁଟିବା ପାଇଁ ସ୍ୱତନ୍ତ୍ର ଯାନରେ ପର୍ଯ୍ୟଟକ ବୁଲିବାକୁ ବନବିଭାଗ ପକ୍ଷରୁ ବ୍ୟବସ୍ଥା ହୋଇଛି । ୱାଚ୍ ଟାୱାର ସହିତ ମୟୂର ଭ୍ୟାଲିରେ ପର୍ଯ୍ୟଟକ ଅଧିକ ମଜା ଉଠାଇବେ । ଅଟେଇ ସଂରକ୍ଷିତ ଜଙ୍ଗଲରେ ୪୦ କିଲୋମିଟର ଜଙ୍ଗଲ ସଫାରୀ ଗାଡିରେ ପରିଭ୍ରମଣର ମଜା ପର୍ଯ୍ୟଟକ ଉଠାଇବେ ବୋଲି ବନବିଭାଗ ପକ୍ଷରୁ କୁହାଯାଇଛି।
କେନ୍ଦୁଝର ବନଖଣ୍ଡର ଘଞ୍ଚ ଜଙ୍ଗଲ ଓ ବିଭିନ୍ନ ବିରଳ ବୃକ୍ଷଲତାରେ ପରିପୂର୍ଣ୍ଣ ଅଟେଇ ପ୍ରକୃତିପ୍ରେମୀଙ୍କୁ ଆକର୍ଷିତ କରିଥାଏ । କେନ୍ଦୁଝର ଜିଲ୍ଲାର ଅନେକ ପର୍ଯ୍ୟଟନସ୍ଥଳୀ ରାଜ୍ୟ ଓ ରାଜ୍ୟ ବାହାରର ପର୍ଯ୍ୟଟକଙ୍କୁ ଆକୃଷ୍ଠ କରିଥାଏ । ତେବେ ମା’ ତାରିଣୀ ପୀଠ ଅନ୍ୟତମ ଆକର୍ଷଣୀୟ ସ୍ଥାନ । ପ୍ରତିଦିନ ହଜାର ହଜାର ଭକ୍ତ ମା’ଙ୍କ ଦର୍ଶନ ଓ ମାନସିକ କାରଣରୁ ଘଟଗାଁକୁ ଆସିଥାନ୍ତି । ତେବେ ଘଟଗାଁ ପୀଠ ସହିତ ଏବେ ପର୍ଯ୍ୟଟକଙ୍କୁ ଆକର୍ଷିତ କରିବ ଅଟେଇ ଜଙ୍ଗଲ ସଫାରୀ । ମା’ ତାରିଣୀଙ୍କ ପୀଠରେ ରହିବ ଏହି ସଫାରୀର ବୁକିଂ କାଉଣ୍ଟର । ସେଠାରେ ବୁକିଂ କରିବା ପରେ ଜଙ୍ଗଲ ସଫାରୀ ଗାଡିରେ ମୁର୍ଗାପାହାଡ଼ି ଠାରୁ କଦାବାହାଳି ପର୍ଯ୍ୟନ୍ତ ୪୦ କିମି ଦୂରତ୍ୱ ଜଙ୍ଗଲ ବୁଲିବାର ବ୍ୟବସ୍ଥା କରାଯାଉଛି । ଏହାସହିତ ଦରଗଡିଶିଳାର ମନୋରମ ଡ୍ୟାମ୍, ଜଙ୍ଗଲ ମଧ୍ୟରେ ୱାଚ୍ ଟାୱାର, ମୟୂର ଭ୍ୟାଲି, ଜଳପ୍ରପାତ, ବାଘକୁ କିଭଳି ନିୟନ୍ତ୍ରଣ କରାଯାଉଛି, ଗଛରେ କିଭଳି କ୍ୟାମେରା ଲଗା ଯାଇଛି ପ୍ରଭୃତି ବୁଲି ଦେଖାଇବ ବନବିଭାଗ । ହରିଣ, ଗୟଳ, ସମ୍ବର ଆଦି ବିରଳ ପ୍ରଜାତିର ବନ୍ୟପ୍ରାଣୀ ଦେଖିବାର ସୁଯୋଗ ମିଳିବ । ଏହି ଜଙ୍ଗଲରେ ଅନେକ ଔଷଧୀୟ ଓ ବିରଳ ଗୁଳ୍ମ, ବୃକ୍ଷ ରହିଥିବାରୁ ପର୍ଯ୍ୟଟକମାନେ ଗଛକୁ ଚିହ୍ନିବା ପାଇଁ ମଧ୍ୟ ବ୍ୟବସ୍ଥା ରହିଛି । ପ୍ରତ୍ୟେକ ଗଛରେ ନାମଫଳକ ବା କେଉଁ ପ୍ରଜାତିର ଗଛ ତାହା ସୂଚିତ କରାଯିବ । ଜଙ୍ଗଲ ସଫାରୀ ପାଇଁ ୩ଟି ସ୍ୱତନ୍ତ୍ର ଯାନ ସ୍ୱତନ୍ତ୍ର ଡିଜାଇନ୍ରେ ପ୍ରସ୍ତୁତ କରାଯାଇଛି ।
୨ଟି ଗାଡିରେ ୧୨ ଜଣ ପର୍ଯ୍ୟଟକ ବୁଲିବା ମଜା ଉଠାଇବେ ଏବଂ ଗୋଟିଏ ବଡ଼ ଗାଡ଼ିରେ ୨୦ ଜଣ ପର୍ଯ୍ୟଟକଙ୍କ ପାଇଁ ବ୍ୟବସ୍ଥା ରହିଛି । ଜଙ୍ଗଲ ସଫାରୀ ବୁଲିବା ପାଇଁ ସର୍ବନିମ୍ନ ଶୁଳ୍କ ବନବିଭାଗ ନିକଟରେ ପର୍ଯ୍ୟଟକ ଜମା କରିବେ । ଏହାସହିତ ଟ୍ରି ହାଉସ, ଶୌଚାଳୟ ଏବଂ ପ୍ରବେଶ ପଥରେ ଥିବା ଫାଟକ ନିକଟରେ ଶୁଖିଲା ଖାଦ୍ୟର ଷ୍ଟଲ୍ କରାଯାଇଛି । ସ୍ୱତନ୍ତ ତାଲିମପ୍ରାପ୍ତ ଗାଇଡ୍ମାନେ ପ୍ରତି ଗାଡିରେ ପର୍ଯ୍ୟଟକଙ୍କୁ ନେଇ ଜଙ୍ଗଲ ବୁଲାଇବା ପରେ ପୁଣି ନେଇ ଘଟଗାଁରେ ଛାଡିବେ । ପ୍ରତି ଯାତ୍ରା ପାଇଁ ୨ ଘଣ୍ଟାରୁ ୩ ଘଣ୍ଟା ସମୟ ଲାଗିବ ବୋଲି ଆକଳନ କରାଯାଇଛି । ପର୍ଯ୍ୟଟକମାନଙ୍କ ପାଇଁ ୩ଟି ୱାଚ୍ ଟାୱାର ନିର୍ମାଣ କରାଯାଇଛି । ଏହାସହିତ ଏକ ଭିଉ ପଏଣ୍ଟରେ ସମଗ୍ର ଅଟେଇ ଜଙ୍ଗଲକୁ ଦେଖିବାର ବ୍ୟବସ୍ଥା କରାଯାଇଛି ।
ଏ ସମ୍ପର୍କରେ କେନ୍ଦୁଝର ଡିଏଫ୍ଓ ଧନରାଜ ଏଚ ଡି କୁହନ୍ତି, ଘଟଗାଁ ଠାରୁ ଜଙ୍ଗଲ ସଫାରୀ ଯାତ୍ରା ଆରମ୍ଭ ହେବ । ଏଥିନେଇ ତାରିଣୀ ମନ୍ଦିର ପରିସରରେ ଏକ ବୁକିଂ କାଉଣ୍ଟର ଖୋଲିବ । ପର୍ଯ୍ୟଟକମାନେ ଘଞ୍ଚ ଜଙ୍ଗଲ ବୁଲି ପ୍ରକୃତିକୁ ଉପଭୋଗ କରିବାକୁ ଏହି ଯୋଜନା କରାଯାଉଛି ବୋଲି କହିଛନ୍ତି ।
