ସୁନ୍ଦରଗଡ଼,୦୨/୧୧: ବହୁଚର୍ଚ୍ଚିତ କରମଡ଼ିହି ଗଣହତ୍ୟା ମାମଲାକୁ ପାଞ୍ଚ ଦିନ ବିତିଯାଇଥିବାବେଳେ ଏଯାଏ ଅଭିଯୁକ୍ତଙ୍କ ପତ୍ତା ପାଉନି ପୁଲିସ୍ । ହତ୍ୟାକାରୀମାନେ ଜଣେ ମହିଳାଙ୍କ ସମେତ ୪ ଶିଶୁଙ୍କୁ ଉଠାଇ ନେଇଥିଲେ । ସେମାନଙ୍କର ମଧ୍ୟ କୌଣସି ଖୋଜ୍ଖବର ମିଳୁନାହିଁ । ସେପଟେ ହତ୍ୟା ଘଟଣାରେ ସମ୍ପୃକ୍ତି ସନ୍ଦେହରେ ପୁଲିସ୍ ବଅଁରପାଳ ବୁଢ଼ାପଙ୍କ ମୁଣ୍ଡାବସ୍ତିରୁ ଚାରିଜଣ ପିଲାଙ୍କ ସମେତ ୧୨ଜଣଙ୍କୁ ଉଠାଇ ଆଣିଥିଲା । ସେମାନଙ୍କ ପଚରାଉଚରା କରାଯାଉଛି ।
ସୁନ୍ଦରଗଡ଼ ସଦର ଥାନା ଅନ୍ତର୍ଗତ କରମଡ଼ିହି ଗୀତାପଡ଼ା ପଡ଼ିଆରେ ବସ୍ତିରେ ମହାରାଷ୍ଟ୍ରରୁ ଆସି ଡେରା ପକାଇଥିବା ଯାଯାବର ପରିବାର ଉପରେ ଗତ ୨୯ ତାରିଖ ରାତି ପ୍ରାୟ ୧୧ଟାରେ ମରଣାନ୍ତକ ଆକ୍ରମଣ ହୋଇଥିଲା । ଚାରିଜଣ ମୁଖାଧାରୀ ଦୁର୍ବୃତ୍ତ ତମ୍ବୁ ଭିତରେ ପଶି ମାରଣାସ୍ତ୍ରରେ ଆଖିବୁଜା ଆକ୍ରମଣ କରିଥିଲେ । ଏଥିରେ ତିନି ମହିଳାଙ୍କ ସମେତ ୫ଜଣଙ୍କ ମୃତ୍ୟୁ ହୋଇଯାଇଥିଲା । ତିନି ଜଣ ଶିଶୁଙ୍କ ସମେତ ସମୁଦାୟ ଚାରି ଜଣ ଲହୁଲୁହାଣ ହୋଇଥିଲା । ମହାରାଷ୍ଟ୍ର-କର୍ଣ୍ଣାଟକର ଦୁଇ ଯାଯାବର ଗୋଷ୍ଠୀ ମଧ୍ୟରେ ଲାଗି ରହିଥିବା ବିବାଦ ଓ ପରକୀୟା ପ୍ରୀତିରୁ ଏଭଳି ଗଣହତ୍ୟା ଘଟିଥିବା ପ୍ରାଥମିକ ତଦନ୍ତରୁ ପୁଲିସ୍ ଅନୁମାନ କରୁଛି ।
ଏଭଳି ଗଣହତ୍ୟା ରାଜ୍ୟବ୍ୟାପୀ ଆଲୋଡ଼ନ ଖେଳାଇଥିଲା । ହତ୍ୟାକାରୀଙ୍କୁ ଧରିବା ଏବଂ ଅପହରଣ ଶିକାର ମହିଳା ଓ ଶିଶୁଙ୍କୁ ଉଦ୍ଧାର କରିବାକୁ ୧୬ଟି ପୁଲିସ୍ ଟିମ୍ ଗଠନ କରାଯାଇଥିଲା । ତନ୍ମଧ୍ୟରୁ ଗୋଟିଏ ଟିମ୍ ଛତିଶଗଡ଼ ଓ ଅନ୍ୟ ଏକ ଟିମ୍ ଝାଡ଼ଖଣ୍ଡକୁ ଯାଇଥିଲା । ସେଠାରୁ ପୁଲିସ୍ ଖାଲି ହାତରେ ଫେରିଛି । ଅନ୍ୟ ୧୪ ଟିମ୍ ଓଡ଼ିଶାର ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି । ହତ୍ୟାକାରୀଙ୍କ ଲିଙ୍କ୍ ମହାରାଷ୍ଟ୍ର କିମ୍ବା କର୍ଣ୍ଣାଟକର ଯାଯାବରଙ୍କ ସମ୍ପୃକ୍ତି ରହିଛି । ତେଣୁ ଓଡ଼ିଶାରେ ଯେଉଁ ସବୁ ଅଞ୍ଚଳରେ ମହାରାଷ୍ଟ୍ର ଓ କର୍ଣ୍ଣାଟକର ଯାଯାବର ପରିବାର ରହୁଛନ୍ତି, ସେଠାକୁ ଯାଇ ପୁଲିସ୍ ଟିମ୍ ତଦନ୍ତ ଚଳାଇଛି । ୫ ପରିବାର ସଦସ୍ୟଙ୍କୁ ହରାଇଥିବା ତଥା ଆକ୍ରମଣରେ ଗୁରୁତର ଅବିନାଶ ପାୱାରଙ୍କ ମୋବାଇଲ୍କୁ ଯେଉଁ ନମ୍ବରରୁ ଧମକପୂର୍ଣ୍ଣ ଫୋନ୍ ଆସୁଥିଲା, ସେହି ନମ୍ବର ବନ୍ଦ ରହିଛି । ଉକ୍ତ ନମ୍ବର ଟ୍ରାକ୍ କରି ପୁଲିସ୍ ହତ୍ୟା ଅଭିଯୁକ୍ତଙ୍କ ନିକଟରେ ପହଞ୍ଚିବାକୁ ଆଶା ବାନ୍ଧିଥିବାବେଳେ ତାହା ମଧ୍ୟ ଫସର ଫାଟିଛି ।
ଅନ୍ୟପଟେ ହତ୍ୟାକାଣ୍ଡ ପରେ ଗୀତାପଡ଼ା ପଡ଼ିଆରେ ଯାଯାବର ରହୁଥିବା ତମ୍ବୁ ଖାଲିପଡ଼ିଛି । ସମ୍ପୃକ୍ତ ଯାଯାବର ପରିବାରର ୫ ଜଣ ଶିଶୁଙ୍କୁ ଆଦୃତା ଭବନରେ ଓ ଜଣେ ମହିଳାଙ୍କୁ ଆଭା ଗୃହରେ ରଖାଯାଇଛି । ଆକ୍ରମଣରେ ଗୁରୁତର ଅବିନାଶ ଚିକିତ୍ସାଧୀନ ଅଛନ୍ତି । ବଅଁରପାଳ ବୁଢ଼ାପଙ୍କ ମୁଣ୍ଡାବସ୍ତିରୁ ପୁଲିସ୍ ସନ୍ଦେହରେ ୧୨ ଜଣଙ୍କୁ ଉଠାଇ ଆଣିଥିଲା । ସେମାନଙ୍କ ମଧ୍ୟରେ ୪ ଶିଶୁ, ୩ ମହିଳା ଏବଂ ୫ ପୁରୁଷ ଅଛନ୍ତି । ପୁରୁଷଙ୍କୁ ଥାନାରେ ଅଟକ ରଖାଯାଇ ପଚରାଉଚରା କରାଯାଉଛି । ମହିଳାଙ୍କୁ ଆଭା ଗୃହ ଏବଂ ଶିଶୁଙ୍କୁ ଆଦୃତା ଭବନରେ ରଖାଯାଇଛି । ଏ ସଂକ୍ରାନ୍ତରେ ଏସ୍ଡିପିଓ ହିମାଂଶୁ ବେହେରା କହିଛନ୍ତି, ପୁଲିସ୍ ଅନୁସନ୍ଧାନ ଜାରି ରଖିଛି । ଅପରାଧୀମାନେ ଶୀଘ୍ର ଧରାପଡ଼ିବେ ।
ପରକୀୟା ପ୍ରୀତିରୁ ଗଡ଼ିଲା ୫ ମୁଣ୍ଡ, ବଅଁରପାଳ ବୁଢ଼ାପଙ୍କ ମୁଣ୍ଡାବସ୍ତିର ୧୨ ସନ୍ଦିଗ୍ଧ ଅଟକ
