ସୁନ୍ଦରଗଡ଼,୦୪/୧୧: ମହାରାଷ୍ଟ୍ର ଓ କର୍ଣ୍ଣାଟକ ବନ୍ଜାରା ଗୋଷ୍ଠୀ ମଧ୍ୟରେ ଶତ୍ରୁତା ଯୋଗୁଁ ଗତ ୨୯ ତାରିଖ ରାତିରେ ସୁନ୍ଦରଗଡ଼ କରମଡ଼ିହି ସ୍ଥିତ ଗୀତାପଡ଼ା ପଡ଼ିଆରେ ତମ୍ବୁ ପକାଇ ରହୁଥିବା ୫ ଜଣଙ୍କୁ ହତ୍ୟା କରାଯାଇଥିଲା । ଏହି ଘଟଣାକୁ ୭ ଦିନ ବିତିଗଲାଣି । ହେଲେ ହତ୍ୟାକାରୀଙ୍କ ସନ୍ଧାନ ଏଯାଏ ପୁଲିସ୍ ପାଇନାହିଁ । ଅପରାଧୀମାନଙ୍କୁ ଧରିବା ଲାଗି ସାରା ଓଡ଼ିଶା ଘୁରି ବୁଲୁଛି ସୁନ୍ଦରଗଡ଼ ପୁଲିସ୍ ।
ମହାରାଷ୍ଟ୍ରର ଯାଯାବର ଗୋଷ୍ଠୀର ୧୫ ଜଣ ସଦସ୍ୟ ଗୀତାପଡ଼ା ପଡ଼ିଆରେ ତମ୍ବୁ ପକାଇ ରହୁଥିଲେ । ୨୯ ତାରିଖ ରାତିରେ ସମସ୍ତେ ଖାଇପିଇ ଶୋଇଥିଲେ । ରାତି ପ୍ରାୟ ୧୧ଟା ସମୟରୋ ୪ ଜଣ ମୁଖାଧାରୀ ଦୁର୍ବୃତ୍ତ ହାତରେ ଭୁଜାଲି ଓ ଖଣ୍ଡା ଧରି ସେଠାକୁ ଆସି ଶୋଇଥିବା ଲୋକଙ୍କୁ ଅତର୍କିତ ଆକ୍ରମଣ କରିଥିଲେ । ସେମାନଙ୍କ ଆକ୍ରମଣରେ କୁଣ୍ଡି ପାୱାର, ଛମା ଭୋସ୍ଲେ, ସୁବାସ ପାୱାର, ଚରଣ କୁମାର ଓ କାଇଲା କୁମାରୀଙ୍କ ମୃତ୍ୟୁ ଘଟିଥିଲା । ଅବିନାଶ ପାୱାର, ମଞ୍ଜୁ ପାୱାର, ପୀୟୁଷ କୁମାର, ଅନିଶା କୁମାରୀ ଲହୁଲୁହାଣ ହୋଇଥିଲେ । ଏହି କାଣ୍ଡ ଭିଆଇ ମୁଖାଧାରୀ ଦୁର୍ବୃତ୍ତମାନେ ଅବିନାଶଙ୍କ ଦ୍ୱିତୀୟ ପତ୍ନୀ ଓ ୪ ଶିଶୁଙ୍କୁ ସାଙ୍ଗରେ ନେଇ ଚମ୍ପଟ ମାରିଥିଲେ ।
ଖବର ପାଇ ପଶ୍ଚିମାଞ୍ଚଳ ଡିଆଇଜି ବ୍ରିଜେଶ ରାୟ, ଏସ୍ପି ପ୍ରତ୍ୟୁଷ ଦିବାକର, ଅତିରିକ୍ତ ଏସ୍ପି ପି.କେ.ଦାସ, ସଦର ଏସ୍ଡିପିଓ ହିମାଂଶୁ ବେହେରା ପୁଲିସ୍ ବାହିନୀ ସହ ଘଟଣାସ୍ଥଳରେ ପହଞ୍ଚିଥିଲେ । ଅପରାଧୀମାନଙ୍କୁ ଧରିବା ଲାଗି ୧୬ଟି ପୁଲିସ୍ ଟିମ୍ ଗଠନ କରାଯାଇଥିଲା। ଏପରିକି ଝାଡ଼ଖଣ୍ଡ ଓ ଛତିଶଗଡ଼କୁ ପୁଲିସ୍ ଟିମ୍ ଯାଇଥିଲା । ଅପରପକ୍ଷରେ ବଅଁରପାଳ ବୁଢ଼ାପଙ୍କ ମୁଣ୍ଡାବସ୍ତିରୁ ୧୨ ଜଣଙ୍କୁ ପୁଲିସ୍ ଉଠାଇ ଆଣି ପଚରାଉଚରା ଚଳାଇଛି । ଇତିମଧ୍ୟରେ ଏହି ଘଟଣାକୁ ୬ ଦିନ ବିତିଗଲାଣି । ଅପରାଧୀଙ୍କ ସନ୍ଧାନ ପୁଲିସ୍ ପାଇପାରିନାହିଁ । ତଦନ୍ତ ଚାଲିଛି ଏବଂ ପୁଲିସ୍ ଟି୍ମ ସାରା ଓଡ଼ିଶାରେ ଚଢ଼ାଉ ଜାରି ରଖିଛନ୍ତି ବୋଲି ଏସ୍ଡିପିଓ ଶ୍ରୀବେହେରା କହିଛନ୍ତି ।
