ତେଲକୋଇ, ୦୯/୧୨: ତେଲକୋଇ ଥାନା ଅଞ୍ଚଳରେ ପୁଣି କଙ୍ଗାରୁ କୋର୍ଟ ଦେଖିବାକୁ ମିଳିଛି । କିଛି ଦିନର ବ୍ୟବଧାନରେ ପୁଣି ଦୁଇ ଜଣ ଧାନ ଚୋରଙ୍କୁ ଧରିଲେ ଗ୍ରାମବାସୀ । ଯୁବକ ଦ୍ୱୟ ଡିମିରିମୁଣ୍ଡା ଗାଁର ବାବୁଲି ପ୍ରଧାନ ଓ ଅଖି ପ୍ରଧାନ ବୋଲି ଜଣାପଡ଼ିଛି । ସେମାନଙ୍କ ମୁହଁରେ କଳା ବୋଳି ଏବଂ ବେକରେ ଜୋତା ମାଳ ପିନ୍ଧାଇ ଗାଁ ବୁଲାଇ କଙ୍ଗାରୁ କୋର୍ଟରେ ଶାସ୍ତି ଦେଇଛନ୍ତି । କେନ୍ଦୁଝର ଜିଲ୍ଲା ତେଲକୋଇ ଥାନା ଅନ୍ତର୍ଗତ ଭୀମକାଣ୍ଡ ପଞ୍ଚାୟତ ଡିମିରିମୁଣ୍ଡା ଗ୍ରାମରେ ରବିବାର ରାତିରେ ଏହି ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ରବିବାର ବିଳମ୍ବିତ ରାତିରେ ଡିମିରିମୁଣ୍ଡା ଗ୍ରାମର ସୁରେଶ ପ୍ରଧାନଙ୍କ ଘର ଝରକା ଭାଙ୍ଗି ଗାଁର ଦୁଇ ଜଣ ଯୁବକ ବାବୁଲି ପ୍ରଧାନ ଓ ଅଖି ପ୍ରଧାନ ୮ ବସ୍ତା ଧାନ ଚୋରି କରିଥିଲେ । ପରିବାର ଲୋକେ ଘରେ ଶୋଇଥିବା ବେଳେ ରାତି ପ୍ରାୟ ୧୧ଟା ବେଳେ ଏହି ଯୁବକ ଦୁଇ ଜଣ ଧାନ ଚୋରି କରିଥିଲେ । ଏହି ସମୟରେ ଶବ୍ଦ ହେବାରୁ ଗାଁକୁ ହାତୀ ପଶି ଆସିଥିବା ଭାବି ପଡୋଶୀ ଘରର ଜଣେ ବ୍ୟକ୍ତି ଟର୍ଚ୍ଚ ମାରି ଦେଖିବାରୁ ଉଭୟ ଯୁବକ ଚୋରି କରୁଥିବା ଦେଖିଥିଲେ । ଏହା ଦେଖି ସ୍ଥାନୀୟଲୋକଙ୍କ ସହାୟତାରେ ଚୋରଙ୍କୁ କାବୁ କରି ରାତିରେ ଗାଁ ମଣ୍ଡପରେ ସାତ ବେଣ୍ଟିଆ କରି ରଖିଥିଲେ । ସୋମବାର ସକାଳୁ ଗ୍ରାମରେ ବିଚାର କରାଯାଇ ଚୋରଙ୍କ ମୁହଁରେ କାଳି, ଚୁନ ଓ ବେକରେ ଜୋତା ମାଳ ପିନ୍ଧାଇ ଗାଁ ଦାଣ୍ଡରେ ବୁଲାଇଛନ୍ତି । ଏହି ଘଟଣା ସମଗ୍ର ଜିଲ୍ଲାରେ ଆଲୋଡନ ସୃଷ୍ଟି କରିଥିବା ବେଳେ ପୋଲିସ ପ୍ରଶାସନର ଅପାରଗତାକୁ ପଦାରେ ପକାଇଛି । ଅନ୍ୟପଟେ ଏହି ଘଟଣା ପରେ ଗ୍ରାମବାସୀ ପୋଲିସକୁ ଫୋନ୍ ମାଧ୍ୟମରେ ଯୋଗାଯୋଗ କରିଥିଲେ ସୁଦ୍ଧା ପୋଲିସ ଫୋନ୍ ଉଠାଇ ନଥିବା ଅଭିଯୋଗ ହୋଇଛି ।
ସୋମବାର ସକାଳେ ମଧ୍ୟ ପୋଲିସକୁ ଯୋଗାଯୋଗ କରାଯାଇଥିବା ବେଳେ ପୋଲିସ ନ ପହଞ୍ଚି ବାରୁ ଚୋରଙ୍କୁ ନିଜେ ଶାସ୍ତି ଦେଇଥିବା ଲୋକେ ମତ ପ୍ରକାଶ କରିଛନ୍ତି । ତେବେ ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ବାରମ୍ବାର ଏଭଳି ଘଟଣା ସାମ୍ନାକୁ ଆସୁଥିବାରୁ ପୋଲିସ ପ୍ରଶାସନ ଉପରେ ଲୋକେ ଆସ୍ଥା ହରାଉ ଥିବା ଏହି ଘଟଣାରୁ ପରିଲକ୍ଷିତ ହୋଇଛି । ଅନ୍ୟପଟେ ପୋଲିସ ପ୍ରଶାସନର ଗୋଇନ୍ଦା ଗିରି ଗାଢ଼ ନିଦ୍ରାରେ ଶୋଇଥିବା ଅଭିଯୋଗ ହୋଇଛି ।
