ନୂଆଦିଲ୍ଲୀ: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବୟସକୁ ନେଇ ରାଜନୀତି ଜୋର ଧରିଛି । ହେମନ୍ତ ସୋରେନଙ୍କ ବୟସ ୫ ବର୍ଷ ଭିତରେ ୭ ବର୍ଷ ବୃଦ୍ଧି ପାଇଛି ବୋଲି ବିଜେପି ଅଭିଯୋଗ କରିଛି । ୨୦୧୯ରେ ନିଜ ବୟସ ୪୨ ବର୍ଷ ବୋଲି ଘୋଷଣା କରିଥିଲେ ହେମନ୍ତ ସୋରେନ । କିନ୍ତୁ ଚଳିତବର୍ଷ ନିଜ ସତ୍ୟପାଠରେ ବୟସ ୪୯ ବର୍ଷ ବୋଲି ଉଲ୍ଲେଖ କରିଛନ୍ତି ଝାଡ଼ଖଣ୍ଡ ମୁଖ୍ୟମନ୍ତ୍ରୀ । ହେମନ୍ତ ସୋରେନଙ୍କୁ ଟାର୍ଗେଟ କରି ବିଜେପି ମୁଖପାତ୍ର ପ୍ରତୁଲ ଶାହ ଦେବ ଟ୍ବିଟରରେ ଲେଖିଛନ୍ତି, ‘ ୫ ବର୍ଷରେ କୌଣସି ବ୍ୟକ୍ତିଙ୍କ ବୟସ ୭ ବର୍ଷ ବଢ଼ିଥିବା କଥା କେହି ଶୁଣିଛନ୍ତି ? ଏଭଳି ଝାଡ଼ଖଣ୍ଡରେ ହୋଇଛି ।’
ବିଜେପିର ଏଭଳି ଅଭିଯୋଗ ପରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ପାଲଟା ଜବାବ ଦେଇଛି । ହେମନ୍ତ ସୋରେନଙ୍କ ଦ୍ବାରା ଦିଆଯାଇଥିବା ଦସ୍ତାବିଜରେ ତାଙ୍କର ବୟସ ସ୍ପଷ୍ଟ ହୋଇଛି ବୋଲି ଜେଏମଏମ ପକ୍ଷରୁ କୁହାଯାଇଛି । ଆଗାମୀ ବିଧାନସଭା ନିର୍ବାଚନରେ ପରାଜିତ ହେବାର ଭୟ ଥିବାରୁ ଏଭଳି ପ୍ରସଙ୍ଗ ବିଜେପି ଉଠାଉଛି । ବିଜେପିର କେହି ମୁଖ୍ୟମନ୍ତ୍ରୀ ଚେହେରା ନାହାନ୍ତି ବୋଲି ଅଭିଯୋଗ କରିଛି ଜେଏମଏମ ।
ଏହା ପୂର୍ବରୁ ମଧ୍ୟ ହେମନ୍ତ ସୋରେନଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲା ବିଜେପି । ବାରହାଟ ବିଧାନସଭା ମଣ୍ଡଳୀର ଲୋକଙ୍କୁ ପ୍ରତାରଣା କରି ସୋରେନ ଶାସନକୁ ଆସିଥିଲେ ବୋଲି ସେହି ବିଧାନସଭା ଆସନର ସୋରେନଙ୍କ ପ୍ରତିଯୋଗୀ ଗାମାଲିୟାଲ ହେମ୍ବ୍ରମ୍ ଅଭିଯୋଗ କରିଥିଲେ । ୬୧୮ ଗାଁକୁ ନେଇ ବାରହାଟ ବିଧାନସଭା ମଣ୍ଡଳୀ । ୧୦ ପ୍ରତିଶତ ଅଞ୍ଚଳ ବୁଲିଆସିଲେ ମଧ୍ୟ ସେଠାକାର ଅବବ୍ୟସ୍ଥା ଜଳଜଳ କରି ଦେଖାଯିବ ବୋଲି ସେ କହିଛନ୍ତି । ତେବେ ଦୁଇଟି ପର୍ଯ୍ୟାୟରେ ଝାଡ଼ଖଣ୍ଡ ନିର୍ବାଚନ ହେବ । ନଭେମ୍ବର ୧୩ ଏବଂ ୨୦ରେ ମତଦାନ ହେବାକୁ ଥିବା ବେଳେ ନଭେମ୍ବର ୨୩ରେ ଭୋଟ ଗଣତି ଏବଂ ଫଳାଫଳ ପ୍ରକାଶ ପାଇବ ।
