ଟୋକିଓ : ସାରା ବିଶ୍ୱରେ ଅନେକ ଲୋକ ଅଛନ୍ତି ଯିଏକି ନିଜର ଭବିଷ୍ୟବାଣୀ ପାଇଁ ଖୁବ୍ ପ୍ରସିଦ୍ଧ ହୋଇଛନ୍ତି। ବାବା ଭେଙ୍ଗାଙ୍କ ଭଳି ନୋଷ୍ଟ୍ରାଡୋମସ ଏହି ତାଲିକାରେ ସାମିଲ ଅଛନ୍ତି। ଉଭୟଙ୍କର ଅନେକ ଭବିଷ୍ୟବାଣୀ ସଠିକ୍ ହୋଇ ସାରିଛି। ଏବେ ଏହିପରି ଆଉ ଏକ ନାଁ ସାମନାକୁ ଆସିଛି, ଯିଏ ନିଜର ଭବିଷ୍ୟବାଣୀକୁ ନେଇ ଚର୍ଚ୍ଚାରେ ଅଛନ୍ତି। ଏହି ମହିଳାଙ୍କ ନାଁ ରିୟୋ ତାତ୍ସୁକୀ। ସେ ପ୍ରଥମେ କମିକ୍ସ ତିଆରି କରିବା ପାଇଁ ଜଣାଶୁଣା ଥିଲେ , କିନ୍ତୁ ଏବେ ନିଜର ଭବିଷ୍ୟବାଣୀରେ ଖୁବ୍ ଚର୍ଚ୍ଚିତ ପାଲଟି ଯାଇଛନ୍ତି।
‘ଟାଇମ୍ସ ଅଫ୍ ଇଣ୍ଡିଆ’ ଅନୁସାରେ , ରିୟୋ ତାତ୍ସୁକୀ ଅନେକ ଦଶକରୁ ଭବିଷ୍ୟବାଣୀ କରି ଆସୁଛନ୍ତି। ତାଙ୍କୁ ୧୯୮୦ର ଦଶକରୁ ସାରାବିଶ୍ୱରେ ହେବାକୁ ଥିବା ବିପତ୍ତିର ସ୍ୱପ୍ନାଦେଶ ହେଉଛି। ଏହାପରେ ସେ ଏକ ଡ୍ରିମ୍ ଡାଏରୀ ଲେଖିଛନ୍ତି ଏବଂ ୧୯୯୯ରେ ଦ ଫ୍ୟୁଚର ଆଇ ସ ନାମକ ଏକ ମାଙ୍ଗା ମଧ୍ୟ ପ୍ରକାଶିତ କରିଛନ୍ତି।
ଜୁଲାଇ ୨୦୨୫ ପାଇଁ ରିୟୋ ତାତ୍ସୁକୀ ଏକ ଭୟଙ୍କର ଭବିଷ୍ୟବାଣୀ କରିଛନ୍ତି। ଏଥିରେ କୁହାଯାଇଛି କି, ଜାପାନ ଓ ଏହାର ଆଖପାଖର ଦେଶ ଗୁଡ଼ିକରେ ଏକ ବଡ଼ ବିପତ୍ତି ଆସିପାରେ। ଏହା ଏକ ବଡ଼ ସୁନାମୀ ହେବ, ଯେଉଁଥିରୁ ଜାପାନ ଓ ଏହାର ନିକଟର ଦେଶ ପ୍ରଭାବିତ ହେବେ। ସେ କହିଛନ୍ତି ଯେ , ୨୦୧୧ରେ ଆସିଥିବା ସୁନାମୀ ଠାରୁ ମଧ୍ୟ ଏହା ୩ଗୁଣା ବଡ଼ ହୋଇ ପାରେ। ଯଦି ଏମିତି ହୁଏ ତ ଅନେକ ଲୋକଙ୍କ ଜୀବନ ଯାଇପାରେ। ଜାପାନ ବ୍ୟତୀତ ଫିଲିପାଇନ୍ସ , ଇଣ୍ଡୋନେସିଆ , ତାଇୱାନ ଭଳି ଦେଶ ଉପରେ ପ୍ରଭାବ ପଡ଼ି ପାରେ।
ତାତ୍ସୁକୀ ଯେଉଁ କଥା ଅତୀତରେ ନିଜ ଡାଏରୀରେ ଲେଖିଛନ୍ତି, ଏଥିରୁ ଅନେକ ସଠିକ୍ ହୋଇ ସାରିଛି। ଏଥିପାଇଁ ଲୋକେ ତାଙ୍କର ସଦ୍ୟ ଚେତାବନୀକୁ ଖୁବ୍ ଗୁରୁତର ସହ ନେଉଛନ୍ତି। ସର୍ବ ପ୍ରଥମେ ୧୯୯୧ରେ ତାଙ୍କର ଏକ ଭବିଷ୍ୟବାଣୀ ସତ ହୋଇଥିଲା। ସେ କହିଥିଲେ ଯେ, ତାଙ୍କୁ ସିଙ୍ଗର ଫ୍ରେଡି ମର୍କରୀଙ୍କର ସ୍ୱପ୍ନ ଆସିଥିଲା। ଏହାର କିଛି ଦିନ ପରେ ସିଙ୍ଗରଙ୍କର ମୃତ୍ୟୁ ହୋଇ ଯାଇ ଥିଲା।
ଖାଲି ଏତିକି ନୁହେଁ, ୧୯୯୫ରେ ମଧ୍ୟ ତାଙ୍କର ଏକ ଭବିଷ୍ୟବାଣୀ ସତ ହୋଇଥିଲା। ଏହି ସମୟରେ ସେ କହିଥିଲେ ଯେ, ଜାପାନାର କୋବେରେ ଭୂକମ୍ପ ଆସିବ। ଏହା ଖୁବ୍ ଭୟଙ୍କର ହେବ। କିଛି ସମୟ ପରେ ହିଁ ଭୂକମ୍ପ ଆସିଲା ଏବଂ ୬ହଜାର ଲୋକଙ୍କ ଜୀବନ ଚାଲି ଗଲା। ସେପଟେ ୨୦୧୧ରେ ମଧ୍ୟ ସେ ଭବିଷ୍ୟବାଣୀ କରିଥିଲେ ଯେ, ଏକ ବହୁତ ବଡ଼ ବିପଦ ଆସିବାକୁ ଯାଉଛି। କିଛି ସମୟ ପରେ ଜାପାନର ତୋହୋକୁର ୯ରୁ ଅଧିକ ତୀବ୍ରତାର ଭୂକମ୍ପ ଓ ସୁନାମୀ ଆସିଲା , ଯେଉଁଥିରେ ବହୁ ସଂଖ୍ୟାରେ ଲୋକଙ୍କ ଜୀବନ ଚାଲିଗଲା।
