ଭୁବନେଶ୍ବର,୦୬/୧୦: ମିଠା ଦୋକାନୀଙ୍କୁ ଦାଦାବଟି ମାଗିଲା ଜେଲ ଫେରନ୍ତା । ଏଭଳି କାଣ୍ଡ କରି ପୁଣି ଗିରଫ ହେଲେ ରଘୁନାଥ ବାରିକ । ସ୍ଥାନୀୟ ଏୟାରଫିଲ୍ଡ ଥାନା ଚଣ୍ଡୀବଜାରରେ ଥିବା ଏକ ମିଠା ଦୋକାନରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କିଛିଦିନ ତଳେ ଦବଙ୍ଗଗିରି ଦେଖାଇ ରାସ୍ତା ଉପରେ ରିଲ୍ସ କରିଥିଲା ରଘୁନାଥ ବାରିକ । ପରେ ଏହି ମାମଲାରେ କୋର୍ଟ ଚାଲାଣ ହୋଇ ଜେଲ୍ରେ ଥିଲେ । ତେବେ ସେଠାରୁ ବେଲ୍ରେ ବାହାରିବା ପରେ ପୁଣି ଗିରଫ ହେଲା ଅଭିଯୁକ୍ତ । ଭୁବନେଶ୍ୱରର ଏୟାରଫିଲ୍ଡ ଥାନା ଚଣ୍ଡୀବଜାରରେ ଥିବା ଏକ ମିଠା ଦୋକାନୀକୁ ୫ ଲକ୍ଷ ଟଙ୍କା ଦାଦାବଟି ନଦେଲେ ଦୋକାନ ବନ୍ଦ କରିବାକୁ ଧମକ ଦେଇଥିଲା । କେବଳ ଏତିକି ନୁହେଁ, ଟଙ୍କା ନଦେବାରୁ ଦୋକାନ ଆଗରେ ଟ୍ରାକ୍ଟରରେ ପଥର ମଧ୍ୟ ଗଦେଇଲା ଦୁର୍ବୃତ୍ତ । ଏସବୁ ପରେ ଦୋକାନୀ ଏୟାରଫିଲ୍ଡ ଥାନାରେ ଏନେଇ ଏକ ଅଭିଯୋଗ କରିଥିଲେ । ଉକ୍ତ ଅଭିଯୋଗ ଆଧାରରେ ପୋଲିସ ଘଟଣାସ୍ଥଳରେ ପହଞ୍ଚି ରଘୁନାଥ ବାରିକକୁ ଗିରଫ କରିଛି । ରାସ୍ତା ଉପରେ ଗାଡି ରଖି ଭାଇଗିରି ଦେଖାଇ ଥିବା ଘଟଣାକୁ ଯୋଡି କେସ ଦାୟର କରିବ ପୋଲିସ ।
