ନୂଆଦିଲ୍ଲୀ,୧୩।୩: ପାକିସ୍ତାନ ସେନା ବଲୁଚିସ୍ତାନରେ ହାଇଜାକ୍ ହୋଇଥିବା ଜାପର ଏକ୍ସପ୍ରେସରୁ ସମସ୍ତ ବନ୍ଧକକୁ ମୁକ୍ତ କରିଛି। ସେନା ପକ୍ଷରୁ କୁହାଯାଇଛି, ବନ୍ଧକଙ୍କୁ ମୁକ୍ତ କରାଯିବା ପରେ ରେସକ୍ୟୁ ଅପରେସନ୍ ଶେଷ ହୋଇଛି। କିନ୍ତୁ ବିଏଲଏର ଦାବି କିଛି ସମ୍ପୂର୍ଣ୍ଣ ଭିନ୍ନ। ସେ କହିଛି ଏବେ ବି ତା ପାଖରେ ୧୫୦ରୁ ଅଧିକ ବନ୍ଧକ ରହିଛନ୍ତି। ଏହା ଭିତରେ ପଞ୍ଜାବର ଜଣେ ସୈନିକ ପାକିସ୍ତାନ ସେନାକୁ ନେଇ କରିଛନ୍ତି ବଡ଼ ଖୁଲାସା। ସେ କହିଛନ୍ତି ଜାଫର ଏକ୍ସପ୍ରେସ୍ ହାଇଜାକ୍ ମାମଲାରେ ମିଛ କହୁଛି ପାକିସ୍ତାନ। ସବୁ ଯାତ୍ରୀ ବିଏଲଏ ବିଦ୍ରୋହୀଙ୍କ କବଳରୁ ଏବେ ବି ମୁକୁଳି ନାହାନ୍ତି। ବିଏଲଏ ସେନା ୫୦ ରୁ ୬୦ ପାକ୍ ସୈନିକଙ୍କୁ ମାରିଦେଇଛି।
‘ଦ ବୋଲାନ୍ ନ୍ୟୁଜ’ ସୋସିଆଲ ମିଡିଆରେ ଜଣେ ପ୍ରତ୍ୟକ୍ଷଦର୍ଶୀଙ୍କ ଭିଡିଓ ସେୟାର କରିଛି। ଭିଡିଓରେ ବ୍ୟକ୍ତି ଜଣକ କହୁଛନ୍ତି, ବିଏଲଏର ଆର୍ମି ୫୦ ରୁ ୬୦ ବନ୍ଧକଙ୍କ ହତ୍ୟା କରିଛି। ସେପଟେ ପାକିସ୍ତାନ ସେନା ଦାବି କରୁଛି ୨୪ ଘଣ୍ଟାରୁ ଅଧିକ ସମୟ ଧରି ଚାଲିଥିବା ଏହି ଅପରେସନ୍ରେ ବିଏଲଏ ଆର୍ମିର ସମସ୍ତ ୩୩ ବିଦ୍ରୋହୀ ନିହତ ହୋଇଛନ୍ତି। ତା ସହ ବନ୍ଧକଙ୍କୁ ମୁକ୍ତ କରି ଦିଆଯାଇଛି।
ପାକିସ୍ତାନ ସେନା ମୁଖପାତ୍ର ଅହମ୍ମଦ ଶରିଫ୍ ଚୌଧୁରୀ କହିଥିଲେ, ଆମେ ମହିଳା ଓ ଶିଶୁଙ୍କ ସହୁ ବହୁ ସଂଖ୍ୟାରେ ବନ୍ଧକଙ୍କୁ ମୁକ୍ତ କରିଛୁ। ୨୧୨ ଯାତ୍ରୀଙ୍କୁ ବିଏଲଏ କବଳରୁ ଉଦ୍ଧାର କରାଯାଇଛି। ଏହି ଅପରେସନ୍ରେ ୨୧ ବନ୍ଧକଙ୍କ ମୃତ୍ୟୁ ହୋଇଛି ଓ ସମସ୍ତ ୩୩ ବିଏଲଏ ଆର୍ମି ନିହତ ହୋଇଛନ୍ତି। ରିପୋର୍ଟ ଅନୁସାରେ ଟ୍ରେନ୍ରେ ମୋଟ ୪୪୦ ଯାତ୍ରୀ ଥିଲେ। ତାଙ୍କ ଭିତରୁ ୨୧ ଜଣଙ୍କୁ ବିଏଲଏ ଆର୍ମୀ ହତ୍ୟା କରିଥିଲା। ତାଙ୍କ ଭିତରେ ୪ ଜଣ ଯବାନ ମଧ୍ୟ ରହିଛନ୍ତି।
