ନୂଆଦିଲ୍ଲୀ, ୨୭।୧୨: ପାକିସ୍ତାନର ଗୁଇନ୍ଦା ଏଜେନ୍ସି ଆଇଏସ୍ଆଇ ଭାରତର ଉତ୍ତର ପୂର୍ବାଞ୍ଚଳରେ ଅଶାନ୍ତିର ବାତାବରଣ ସୃଷ୍ଟି ଲାଗି ଷଡ଼ଯନ୍ତ୍ର ଚଳାଇଛି । ଏଠାରେ ସାମ୍ପ୍ରଦାୟିକ ମାହୋଲକୁ ଇନ୍ଧନ ଯୋଗାଉଛି । ଏଥିପାଇଁ ପାକିସ୍ତାନରୁ ଚୋରା ବେପାରୀଙ୍କ ଜରିଆରେ ମଣିପୁର ଓ ନାଗାଲାଣ୍ଡକୁ ଅସ୍ତ୍ରଶସ୍ତ୍ର ପଠାଉଛି । ଜମ୍ମୁ-କାଶ୍ମୀର ଓ ପଞ୍ଜାବ ଜରିଆରେ ଏହି ଅସ୍ତ୍ରଶସ୍ତ୍ର ଆସୁଛି । ଏମିତି କି ବିହାରକୁ ଏକ ଟ୍ରାଞ୍ଜିଟ ରୁଟ ଭାବେ ଚୋରା ବେପାରୀମାନେ ବ୍ୟବହାର କରୁଛନ୍ତି । ଏଠାରେ ଅସ୍ତ୍ରଶସ୍ତ୍ର ଗଚ୍ଛିତ ରଖାଯାଉଛି । ଭାରତର ଗୁଇନ୍ଦା ଏଜେନ୍ସିକୁ ଏ ବାବଦରେ କିଛି ସୁରାକ ମିଳିଥିବା ଜଣାପଡ଼ିଛି ।
ସୂତ୍ର ମୁତାବକ, ଗୁଇନ୍ଦା ଏଜେନ୍ସିଙ୍କୁ ସୂଚନା ମିଳିଛି ଯେ ପାକିସ୍ତାନର କିଛି ବଡ଼ ଚୋରା ବେପାରୀ ଜମ୍ମୁ-କାଶ୍ମୀର ଓ ପଞ୍ଜାବରେ ତସ୍କରଙ୍କ ମାଧ୍ୟମରେ ଭାରୀ ମାତ୍ରାରେ ଅସ୍ତ୍ରଶସ୍ତ୍ର ପହଞ୍ଚାଉଛନ୍ତି । ଏହି ଅସ୍ତ୍ରଶସ୍ତ୍ରକୁ ଏଠାରୁ ହରିଆଣା ଏବଂ ପରେ ଉତ୍ତର ପ୍ରଦେଶ ଦେଇ ବିହାରର ଗୁପ୍ତ ସ୍ଥାନକୁ ନିଆଯାଉଛି । ଏହାପରେ ଚାହିଦା ଅନୁସାରେ ଏଗୁଡ଼ିକୁ ନାଗାଲାଣ୍ଡ, ମଣିପୁର ଓ ଅନ୍ୟ ଉତ୍ତରପୂର୍ବ ରାଜ୍ୟଗୁଡ଼ିକୁ ଯୋଗାଇ ଦିଆଯାଉଛି । ସୂତ୍ରରୁ ଆହୁରି ଜଣାପଡ଼ିଛି ଯେ ଏନ୍ଆଇଏ ୫ ରାଜ୍ୟରେ ସନ୍ଦିଗ୍ଧ ଠିକଣା ଉପରେ ଚଢ଼ଉ କରିଥିଲା । ଏହି ସମୟରେ ଅସ୍ତ୍ରଶସ୍ତ୍ର ଓ ନଗଦ ଟଙ୍କା ଜବତ ହୋଇଥିଲା । ଡାର୍କୱେବ୍ରେ କିଣାବିକା ନେଇ ଚୋରା ବେପାରୀମାନେ ଆଲୋଚନା କରିବା ସହ ବିଟ୍କଏନ୍ରେ ଡିଲ୍ କରୁଥିବା ଜଣାପଡ଼ିଛି ।
