ନୂଆଦିଲ୍ଲୀ: ଭାରତ-ପାକିସ୍ତାନ ଯୁଦ୍ଧବିରତି ସମ୍ପର୍କରେ ବୈଦେଶିକ ମନ୍ତ୍ରଣାଳୟ ଏକ ସାମ୍ବାଦିକ ସମ୍ମିଳନୀ କରିଛି । ଏହି ସମୟରେ ଯୁଦ୍ଧବିରତିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତା ସମ୍ପର୍କରେ ବୈଦେଶିକ ମନ୍ତ୍ରଣାଳୟ କହିଛି ଯେ, ଆମେ କାଶ୍ମୀର ଉପରେ ମଧ୍ୟସ୍ଥତା ଗ୍ରହଣ କରୁନାହୁଁ । ପାକିସ୍ତାନକୁ ପିଓକେ ଖାଲି କରିବାକୁ ପଡିବ । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି ଯେ, ଜମ୍ମୁକାଶ୍ମୀର ସହ ଜଡିତ ଯେକୌଣସି ପ୍ରସଙ୍ଗ ଭାରତ ଏବଂ ପାକିସ୍ତାନ ଦ୍ୱାରା ଦ୍ୱିପାକ୍ଷିକ ଭାବରେ ସମାଧାନ କରାଯିବା ଉଚିତ । ଏହି ନୀତି ପରିବର୍ତ୍ତନ ହୋଇନାହିଁ ।
#WATCH | Delhi: MEA Spokesperson Randhir Jaiswal says, "We have a long-standing national position that any issues pertaining to the Union Territory of Jammu and Kashmir have to be addressed by India and Pakistan bilaterally. That stated policy has not changed. The outstanding… pic.twitter.com/gsbwsFF36l
— ANI (@ANI) May 13, 2025
ସେ କହିଛନ୍ତି ଯେ, ବୈଦେଶିକ ସଚିବ ବିକ୍ରମ ମିଶ୍ରିଙ୍କ ଦ୍ୱାରା ଦିଆଯାଇଥିବା ପୂର୍ବ ସୂଚନା ଅନୁଯାୟୀ, ମେ ୧୦ ଅପରାହ୍ଣ ୩.୩୫ ରେ ଉଭୟ ଦେଶର ଡିଜିଏମଓ ସ୍ତରରେ ଯୁଦ୍ଧବିରତି ଉପରେ ଆଲୋଚନା ହୋଇଥିଲା । ପାକିସ୍ତାନ ହାଇକମିଶନ ମାଧ୍ୟମରେ ବୈଦେଶିକ ମନ୍ତ୍ରଣାଳୟକୁ ଏହି ଆଲୋଚନା ବିଷୟରେ ଅପରାହ୍ନ ୧୨.୩୭ରେ ସୂଚନା ଦିଆଯାଇଥିଲା । ପାକିସ୍ତାନରେ ଆଭ୍ୟନ୍ତରୀଣ ବୈଷୟିକ ସମସ୍ୟା ଯୋଗୁଁ ହଟଲାଇନ୍ ସଂଯୋଗ କରିବାରେ ବିଳମ୍ବ ହୋଇଥିଲା ।
ରଣଧୀର ଜୟସୱାଲ କହିଛନ୍ତି ଯେ, ମେ’ ୧୦ ତାରିଖ ସକାଳେ ଭାରତୀୟ ସେନା ପାକିସ୍ତାନ ଏୟାରବେସକୁ ଧ୍ୱଂସ କରିଦେଇଥିଲା । ଏହା ପରେ ପାକିସ୍ତାନର ସ୍ୱର ବଦଳିଥିଲା । ପାକିସ୍ତାନ ଗୁଳିବର୍ଷା ଏବଂ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ନିଷ୍ପତ୍ତି ନେଇଥିଲା। ମୁଁ ସ୍ପଷ୍ଟ କରିବାକୁ ଚାହୁଁଛି ଯେ, ଭାରତୀୟ ସଶସ୍ତ୍ର ବାହିନୀ ପାକିସ୍ତାନକୁ ଗୁଳିମାଡ଼ ବନ୍ଦ କରିବାକୁ ବାଧ୍ୟ କରିଥିଲା। ଅନ୍ୟ ଦେଶଗୁଡ଼ିକ ପରି, ଭାରତ ଏକ ସ୍ପଷ୍ଟ ବାର୍ତ୍ତା ଦେଇଛି । ଦେଶବାସୀଙ୍କୁ ଜଣାଇ ଦେଇଛି ଯେ, ଭାରତ ଏପ୍ରିଲ ୨୨ ଆତଙ୍କବାଦୀ ଆକ୍ରମଣର ଜବାବ ଆତଙ୍କବାଦୀ ଭିତ୍ତିଭୂମିକୁ ଟାର୍ଗେଟ କରି ଦେଇଛି । ଏହା ପରେ ଯେତେବେଳେ ପାକିସ୍ତାନୀ ସଶସ୍ତ୍ର ସେନା ଗୁଳିବର୍ଷା କଲା, ଭାରତୀୟ ସେନା ଏହାର ଉଚିତ ଜବାବ ଦେଇଥିଲା ବୋଲି ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ।
ସେ କହିଛନ୍ତି ଯେ, ମେ’ ୭ରେ ଅପରେସନ ସିନ୍ଦୂର ଆରମ୍ଭ ହେବାଠାରୁ ମେ’୧୦ରେ ଗୁଳିମାଡ଼ ଏବଂ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବା ପାଇଁ ଚୁକ୍ତି ପର୍ଯ୍ୟନ୍ତ, ଭାରତ ଏବଂ ଆମେରିକୀୟ ନେତାମାନଙ୍କ ମଧ୍ୟରେ ସାମରିକ ପରିସ୍ଥିତି ଉପରେ ଆଲୋଚନା ହୋଇଥିଲା। ଏହି ଆଲୋଚନାରେ ବାଣିଜ୍ୟ ପ୍ରସଙ୍ଗ ଉଠି ନଥିଲା । ଏହା ସହ ସେ ଆହୁରି କହିଛନ୍ତି ଯେ, CCS (ସୁରକ୍ଷା ଉପରେ କ୍ୟାବିନେଟ୍ କମିଟି) ନିଷ୍ପତ୍ତି ପରେ ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖାଯାଇଛି। ନିଷ୍ପତ୍ତି ଅନୁଯାୟୀ ଯେପର୍ଯ୍ୟନ୍ତ ପାକିସ୍ତାନ ବିଶ୍ୱସନୀୟ ଭାବରେ ସୀମାପାର ଆତଙ୍କବାଦକୁ ସମର୍ଥନ କରିବ ସେପର୍ଯ୍ୟନ୍ତ ଭାରତ ଚୁକ୍ତିକୁ ସ୍ଥଗିତ ରଖିବ ।
ଆମେ ପାକିସ୍ତାନୀ ପକ୍ଷ ଦ୍ୱାରା ଦିଆଯାଇଥିବା ବିବୃତ୍ତି ଦେଖିଛୁ । ଯେଉଁ ଦେଶ ଆତଙ୍କବାଦକୁ ପ୍ରୋତ୍ସାହିତ କରୁଛି ଏବଂ ଯଦି ସେହି ଦେଶ ଭାବୁଥାଏ ଏହାର ପରିଣାମରୁ ରକ୍ଷା ପାଇପାରିବ, ତେବେ ସେ ନିଜକୁ ମୂର୍ଖ ବନାଉଛି । ଭାରତ ସମେତ ବିଶ୍ବର ଅନେକ ନିରୀହ ଲୋକଙ୍କ ହତ୍ୟାର ପ୍ରତିଶୋଧ ସ୍ବରୂପ ପାକିସ୍ତାନରେ ଥିବା ଆତଙ୍କବାଦୀ ଭିତ୍ତିଭୂମିକୁ ଧ୍ବଂସ କରାଯାଇଛି । ଏବେ ଏକ ନୂତନ ସ୍ୱାଭାବିକତା ଆସିଛି। ପାକିସ୍ତାନ ଯେତେ ଶୀଘ୍ର ଏହା ବୁଝିବ, ସେତେ ଭଲ ବୋଲି କହିଛନ୍ତି ରଣଧୀର ଜୟସୱାଲ ।
