ନୂଆଦିଲ୍ଲୀ,୧୨/୧୧: ଅତି ବେଶୀରେ ଜଣେ କେତେ ସମୟ ପାଠ ପଢୁଥିବେ । ୫ ରୁ ୬ ଘଣ୍ଟା । ଏକ ରିପୋର୍ଟରୁ ଜଣାପଡିଛି କି ବିଶ୍ବରେ ସର୍ବାଧିକ ଅଧ୍ୟୟନ କରୁଥିବା ଦେଶ ମଧ୍ୟରେ ଭାରତ ଅନ୍ୟତମ । ଏନଓପି ୱାଲ୍ଡ କଲଚର ସ୍କୋର ଇଣ୍ଡେକ୍ସର ପ୍ରକାଶିତ ସଦ୍ୟ ରିପୋର୍ଟ ଅନୁସାରେ ଏହା ସାମ୍ନାକୁ ଆସିଛି । ବିଭିନ୍ନ ପ୍ରତିଯୋଗିତା ମୂଳକ ପରୀକ୍ଷା ଯେପରି ୟୁପିଏସସି, ବ୍ୟାଙ୍କିଙ୍ଗ୍, ଜେଇ ହେଉ କିମ୍ବା ନିଟ୍ ପାଇଁ ପ୍ରସ୍ତୁତ ଛାତ୍ରଛାତ୍ରୀ ୧୦ରୁ ୧୨ ଘଣ୍ଟା ପାଠ ପଢିଥାନ୍ତି । କିଛି ଛାତ୍ରଛାତ୍ରୀ ୩ ରୁ ୪ ଘଣ୍ଟା ଅଧ୍ୟୟନ କରିଥାନ୍ତି । ଏନଓପି ୱାଲ୍ଡ କଲଚର ସ୍କୋର ଇଣ୍ଡେକ୍ସ ଅନୁସାରେ ଭାରତର ଯୁବପିଢି ସର୍ବାଧିକ ସମୟ ପଢୁଛନ୍ତି । ପାଠପଢାକୁ ହିଁ ଅଧିକ ପ୍ରାଥମିକତା ଦେଉଛନ୍ତି ।
ଭାରତର ଯୁବପିଢି ସପ୍ତାହକୁ ହାରାହାରି ୧୦.୪୨ ଘଣ୍ଟା ଅଧ୍ୟୟନ କରୁଛନ୍ତି । ଯାହା ବିଶ୍ବରେ ସର୍ବାଧିକ । ଏହି ତାଲିକାର ଦ୍ବିତୀୟ ସ୍ଥାନରେ ଥାଇଲାଣ୍ଡ ରହିଛି । ଏହି ଦେଶର ଯୁବବର୍ଗ ସପ୍ତାହରେ ୯.୨୪ ଘଣ୍ଟା ପାଠପଢାରେ ସମୟ ବିତାଉଛନ୍ତି । ଏହା ପରେ ତୃତୀୟ ସ୍ଥାନରେ ରହିଛି ଚୀନ । ଏହି ଦେଶର ବିଦ୍ୟାର୍ଥୀ ହାରାହାରି ୮ଘଣ୍ଟା ପଢୁଛନ୍ତି । ଚତୁର୍ଥ ସ୍ଥାନରେ ଥିବା ଫିଲିପିନ୍ସର ବିଦ୍ୟାର୍ଥୀ ପାଖାପାଖି ୭.୩୬ ଘଣ୍ଟା ଅଧ୍ୟୟନ କରୁଛନ୍ତି । ପଞ୍ଚମରେ ରହିଛି ମିଶର । ଏଠାରେ ୭.୩ ଘଣ୍ଟା ପଢୁଥିବା ରିପୋର୍ଟରୁ ଜଣାପଡିଛି ।
ଅନ୍ୟପଟେ ସବୁଠୁ କମ ସମୟ ପଢୁଥିବା ଦେଶ ମଧ୍ୟରେ ବ୍ରିଟେନ ଅନ୍ୟତମ । ଏଠାରେ ଲୋକ ସପ୍ତାହକୁ ହାରାହାରି ୫.୧୮ ଘଣ୍ଟା ଅଧ୍ୟୟନ କରୁଛନ୍ତି । ଏହାପରେ ବ୍ରାଜିଲ ଓ ତାହା ପଛକୁ ସ୍ବିଡେନ ରହିଛି । ତାଲିକା ଶେଷରେ ରହିଛି କୋରିଆ । ଏଠାରେ ସପ୍ତାହକୁ ବିଦ୍ୟାର୍ଥୀ ହାରାହାରି ୩.୦୬ ଘଣ୍ଟା ଅଧ୍ୟୟନ କରୁଛନ୍ତି ।
