ନୂଆଦିଲ୍ଲୀ,୧୨/୦୧: ଅଲିମ୍ପିଆନ୍ ତଥା ବିଶ୍ୱ ଚାମ୍ପିଅନସିପ୍ ପଦକ ବିଜେତା ଭାରତର ନିଶାନ୍ତ ଦେବ ଆମେଚର ବକ୍ସିଂ ଛାଡ଼ି ପେସାଦାର ବକ୍ସିଂରେ କ୍ୟାରିୟର କରିବାକୁ ମନସ୍ଥ କରିଛନ୍ତି । ସେ ଇଡି ହର୍ନଙ୍କ ମ୍ୟାଚ୍ରୁମ୍ ବକ୍ସିଂ ସହ ଚୁକ୍ତି ସ୍ୱାକ୍ଷର କରିଛନ୍ତି । ଆସନ୍ତା ୨୫ ତାରିଖରେ ଲାସ୍ ଭେଗାସ ଠାରେ ନିଶାନ୍ତ ପଦାର୍ପଣ ଫାଇଟ୍ କରିବାକୁ ଯାଉଛନ୍ତି । ଏପର୍ଯ୍ୟନ୍ତ ତାଙ୍କ ପ୍ରତିଦ୍ୱନ୍ଦ୍ୱୀ ଚୂଡ଼ାନ୍ତ ହୋଇନାହିଁ । ନିଶାନ୍ତ ଏବେ ପୂର୍ବତନ ପେସାଦାର ବକ୍ସର ରୋନାଲ୍ଡ ସିମ୍ସଙ୍କଠୁ ପ୍ରଶିକ୍ଷଣ ନେଉଛନ୍ତି । ଗତ ପ୍ୟାରିସ୍ ଅଲିମ୍ପିକ୍ସରେ ସେ କ୍ୱାର୍ଟର ଫାଇନାଲ୍ରେ ମେକ୍ସିକୋର ମାର୍କୋ ଭର୍ଡିଙ୍କ ନିକଟରୁ ହାରି ପଦକ ସ୍ୱପ୍ନ ଧୂଳିସାତ୍ କରିଥିଲେ ।
ନିଶାନ୍ତ କହିଛନ୍ତି, ମ୍ୟାଚ୍ରୁମ୍ ବକ୍ସିଂରେ ଯୋଗଦେଇ ବହୁତ ଖୁସି ଅଛି । ପେସାଦାର ବକ୍ସିଂରେ କ୍ୟାରିୟର କରିବାକୁ ଚାହୁଁଛି । ଭାରତର ପ୍ରଥମ ପେସାଦାର ବକ୍ସିଂ ବିଶ୍ୱ ଚାମ୍ପିଅନ୍ ହେବା ମୋର ଲକ୍ଷ୍ୟ । ଏବେ ପଦାର୍ପଣ ଫାଇଟ୍ ପାଇଁ ପ୍ରଶିକ୍ଷକ ରୋନାଲ୍ଡଙ୍କ ଅଧିନରେ କଠିନ ପରିଶ୍ରମ କରୁଛି ।’
ସୂଚନାଯୋଗ୍ୟ, ଭାରତର ଏକାଧିକ ବକ୍ସର ପେସାଦାର ବକ୍ସିଂରେ ସକ୍ରିୟ ରହିଛନ୍ତି । ଅଲିମ୍ପିକ ପଦକ ବିଜେତା ବିଜେନ୍ଦର ସିଂହ ଇତିମଧ୍ୟରେ ୧୪ଟି ଫାଇଟ୍ କରି ୧୩ଟି ଜିତିଥିବାବେଳେ ଗୋଟିଏରେ ପରାଜିତ ହୋଇଛନ୍ତି ।
