ବେଙ୍ଗାଲୁରୁ, ୨୦/୧୦: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ପ୍ରଥମ ଟେଷ୍ଟ ନିର୍ଣ୍ଣାୟକ ମୋଡ଼ ନେଇଛି । ଭାରତର ଜୋରଦାର ଲଢ଼େଇ ସତ୍ତେ୍ୱ ନ୍ୟୁଜିଲାଣ୍ଡ ୩୬ବର୍ଷ ପରେ ଭାରତରେ ଟେଷ୍ଟ ବିଜୟ ପାଇଁ ପଥ ପରିଷ୍କାର କରିଛି । ରବିବାର ମ୍ୟାଚ୍ର ଅନ୍ତିମ ଦିବସ ରହିଥିବାବେଳେ ବର୍ଷା ଓ ବୋଲରଙ୍କ ପ୍ରଦର୍ଶନ ଉପରେ ଘରୋଇ ଦଳର ଭାଗ୍ୟ ନିର୍ଭର କରୁଛି ।
ଭାରତ ଦ୍ୱିତୀୟ ଇନିଂସରେ ଲଢୁଆ ବ୍ୟାଟିଂ ପ୍ରଦର୍ଶନ କରିଥିଲେ ହେଁ ସଂଗୃହୀତ ରନ୍ ବିଜୟ ପାଇଁ ଯଥେଷ୍ଟ ନୁହେଁ । ନ୍ୟୁଜିଲାଣ୍ଡ ସମ୍ମୁଖରେ ମାତ୍ର ୧୦୭ ରନ୍ର ଲକ୍ଷ୍ୟ ଧାର୍ଯ୍ୟ ହୋଇଥିବାବେଳେ ସମ୍ପୂର୍ଣ୍ଣ ଗୋଟିଏ ଦିନର ଖେଳ ବାକି ରହିଛି । ତେଣୁ ବୋଲରମାନଙ୍କ ଠାରୁ କେବଳ ଅଲୌକିକ ପ୍ରଦର୍ଶନ ଆଶା କରାଯାଇପାରେ । ନଚେତ ନ୍ୟୁଜିଲାଣ୍ଡର ବିଜୟ ସ୍ୱପ୍ନ ସାକାର ହେବ ।
ମ୍ୟାଚ୍ର ଚତୁର୍ଥ ଦିବସ ବେଶ୍ ରୋମାଞ୍ଚକର ରହିଥିଲା । ଭାରତକୁ ମିଳିଥିଲା ମିଶ୍ରିତ ଫଳାଫଳ । ଦ୍ୱିତୀୟ ଇନିଂସରେ ରୋହିତ ଶର୍ମା ଓ ବିରାଟ କୋହଲିଙ୍କ ଅର୍ଦ୍ଧଶତକ ପରେ ସର୍ଫରାଜ ଖାନ୍ ଖେଳିଥିଲେ ଏକ ଦାୟିତ୍ୱପୂର୍ଣ୍ଣ ଶତକୀୟ ଇନିଂସ । ୨ଦିନ ତଳେ ଆହତ ହୋଇଥିବା ରିଷଭ ପନ୍ତ ଦମ୍ଦାର ବ୍ୟାଟିଂ କରିଥିଲେ ହେଁ ସପ୍ତମ ଥର ପାଇଁ ‘ନର୍ଭସ ନାଇଣ୍ଟି’ ତାଲିକାରେ ନାମ ଲେଖାଇଥିଲେ ।
ଉଭୟଙ୍କ ୧୭୭(୩୫.୧ଓଭରରେ)ରନ୍ର ଭାଗିଦାରୀ ଭାରତକୁ ବିଜୟ ଆଶା ଜାଗ୍ରତ କରାଇଥିଲା । ମାତ୍ର ନ୍ୟୁଜିଲାଣ୍ଡ ଦ୍ୱିତୀୟ ନୂଆ ବଲ୍ ନେବା ପରେ କ୍ଷଣକ ମଧ୍ୟରେ ସବୁ ଆଶା ମଉଳି ଯାଇଥିଲା । ଏକଦା ୩ୱିକେଟରେ ୪୦୦ ରନ୍ ସଂଗ୍ରହ କରିସାରିଥିବା ଭାରତ ପରବର୍ତ୍ତୀ ୬୨ ରନ୍ ମଧ୍ୟରେ ଶେଷ ୭ଟି ୱିକେଟ୍ ହରାଇ ମୋଟ୍ ୪୬୨ ରନ୍ରେ ଅଲ ଆଉଟ୍ ହୋଇ ଯାଇଥିଲା ।
ଏକଦା ଆଜାଦ ମୈଦାନରୁ କ୍ୟାରିୟର ଯାତ୍ରା ଆରମ୍ଭ କରିଥିବା ସର୍ଫରାଜଙ୍କ ଦୀର୍ଘ ଦିନର ସ୍ୱପ୍ନ ଚିନ୍ନାସ୍ୱାମୀ ଷ୍ଟାଡ଼ିୟମ୍ରେ ସଫଳ ହୋଇଥିଲା । ଗତ ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ ପଦାର୍ପଣ କରିଥିବା ସର୍ଫରାଜ ୨ଟି ଅର୍ଦ୍ଧଶତକ ଅର୍ଜନ କରିଥିଲେ ହେଁ ଶନିବାର ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ଶତକ ଅର୍ଜନ କରିଥିଲେ । ପ୍ରଥମ ଶତକ ଥିଲା ବିଶାଳ ଓ ସ୍ୱତନ୍ତ୍ର । ଦଳକୁ ସେ ବିପଦରୁ ଉଦ୍ଧାର କରିଥିଲେ ଓ ଖେଳିଥିଲେ ୧୫୦ ରନ୍ର ମାରାଥନ ଇନିଂସ ।
ଶନିବାର ସକାଳୁ ଭାରତ ଅସମାପ୍ତ ଦ୍ୱିତୀୟ ଇନିଂସ୍ ୩/୨୩୧ ରନ୍ରୁ ବ୍ୟାଟିଂ ଆରମ୍ଭ କରିଥିଲା । ଅପରାଜିତ ସର୍ଫରାଜଙ୍କ ସହ ପନ୍ତ କ୍ରିଜରେ ଯୋଗ ଦେଇ ଦଳୀୟ ସ୍କୋରକୁ ଆଗେଇ ନେଇଥିଲେ । କ୍ରିଜରେ ଜମିବା ପରେ ଉଭୟ ବିସ୍ଫୋରକ ସଟ୍ମାନ ଖେଳିଥିଲେ । ନ୍ୟୁଜିଲାଣ୍ଡ ବୋଲର ଉପାୟଶୂନ୍ୟ ମନେ ହୋଇଥିଲେ । ସର୍ଫରାଜ ଶତକ ଓ ପନ୍ତ ଅର୍ଦ୍ଧଶତକ ଅର୍ଜନ କରିଥିଲେ । ତଥାପି ଭାଗିଦାରୀ ଆଗେଇ ଚାଲିଥିଲା । ଦଳୀୟ ସ୍କୋର ୪୦୦ରେ ପହଞ୍ଚିଥିଲା । ନ୍ୟୁଜିଲାଣ୍ଡ ନୂଆ ବଲ୍କୁ ଅପେକ୍ଷା କରି ରହିଥିଲା । ୮୦ଓଭର ଶେଷ ହେବା ମାତ୍ରେ ନୂଆ ବଲ୍ ନେଇଥିଲା ଓ ବାଜି ପଲଟିଥିଲା । ସର୍ଫରାଜଙ୍କୁ ଆଉଟ୍ କରିଥିଲେ ଟିମ ସାଉଦି । ସେ ୧୮ଚୌକା ଓ ୩ଛକା ବଳରେ ୧୫୦ ରନ୍ କରି ଆଉଟ୍ ହୋଇଥିଲେ ।
ଏହାପରେ ଆରମ୍ଭ ହୋଇଯାଇଥିଲା ବିପର୍ଯ୍ୟୟ । ପନ୍ତ ୯୯ ରନ୍ ସଂଗ୍ରହ କରି ଓ’ରୁର୍କଙ୍କ ବଲ୍ରେ ଆଉଟ୍ ହୋଇଥିଲେ । ଏହି ଇନିଂସରେ ସେ ୯ଟି ଚୌକା ଓ ୫ଟି ଛକା ମାରିଥିଲେ । ୬ଟି ଟେଷ୍ଟ ଶତକ ଅର୍ଜନ କରିସାରିଥିବା ପନ୍ତ ସ୍ୱଳ୍ପ କ୍ୟାରିୟର ମଧ୍ୟରେ ୭ଥର ୯୦ରୁ ୯୯ ମଧ୍ୟରେ ଆଉଟ୍ ହୋଇ ସାରିଲେଣି । ପନ୍ତଙ୍କ ସହ ତାଳ ଦେଇ ନିମ୍ନ ଭାଗ ବ୍ୟାଟରମାନେ ପାଭିଲିୟନକୁ ଲାଇନ ଲଗାଇଥିଲେ । କେଏଲ ରାହୁଲ ୧୨, ରବିନ୍ଦ୍ର ଜାଡେଜା ୫, ରବି ଅଶ୍ୱିନ ୧୫ ରନ୍ କରିଥିବାବେଳେ ବୁମରା ଖାତା ଖୋଲିପାରିନଥିଲେ । ଦଳୀୟ ସ୍କୋର ୪୬୨ରେ ଅଟକି ଯାଇଥିଲା । ନ୍ୟୁଜିଲାଣ୍ଡ ପକ୍ଷରୁ ଓ’ରୁର୍କ ଓ ହେନରୀ ୩ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ ।
୧୦୭ ରନ୍ର ଲକ୍ଷ୍ୟ ନେଇ ନ୍ୟୁଜିଲାଣ୍ଡ ଦ୍ୱିତୀୟ ଇନିଂସ ବ୍ୟାଟିଂ କରିବାକୁ ଓହ୍ଲାଇଥିଲା । ମାତ୍ର ୪ଟି ବଲ୍ ପରେ ଆଲୋକର ଅଭାବ ଦର୍ଶାଇ ଅମ୍ପାୟାର ଷ୍ଟମ୍ପ ଘୋଷଣା କରିଥିଲେ ।