ପୁନେ,୨୨/୧୦: ଦୀର୍ଘ ୩୬ ବର୍ଷ ପରେ ଭାରତ ମାଟିରେ ଟେଷ୍ଟ ବିଜୟୀ ହୋଇଛି ନ୍ୟୁଜିଲାଣ୍ଡ । ବେଙ୍ଗାଲୁରୁରେ ଉଭୟ ପାଗ ଓ ପିଚ୍ର ଭରପୁର ଫାଇଦା ଉଠାଇ ଭ୍ରମଣକାରୀ ଦଳ ୮ ୱିକେଟ୍ରେ ବିଜୟ ହାସଲ କରିଥିଲା । ଭାରତ ବର୍ତ୍ତମାନ ପ୍ରତ୍ୟାବର୍ତ୍ତନ ପାଇଁ ସବୁ ଶକ୍ତି ଖଟାଇବାକୁ ପ୍ରସ୍ତୁତ । ଫଳରେ ବାକି ଦୁଇଟି ଯାକ ମ୍ୟାଚ୍ ତୀବ୍ର ସଂଘର୍ଷପୂର୍ଣ୍ଣ ହେବା ନିଶ୍ଚିତ । ପୁନେ ଓ ମୁମ୍ବାଇରେ ଶେଷ ୨ଟି ଯାକ ଟେଷ୍ଟ ଖେଳାଯିବ । ଏଥର ଘରୋଇ ଦଳର ସ୍ପିନରଙ୍କୁ ଭରପୁର ଫାଇଦା ଯୋଗାଇବା ଭଳି ପିଚ୍ ପ୍ରସ୍ତୁତ କରାଯାଇଛି । ଆଜି ଭାରତୀୟ ଦଳ ପୁନେରେ ପହଞ୍ଚିଛି ଓ ମଙ୍ଗଳବାରଠୁ ଅଭ୍ୟାସ ଆରମ୍ଭ ହେବ । ନଆ କରି ଦଳରେ ସ୍ଥାନ ପାଇଥିବା ୱାସିଂଟନ ସୁନ୍ଦର ଫୋକସ୍ରେ ରହିବେ।
ମନ୍ଥର ରହିବ ପୁନେ ପିଚ୍
ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ଅଧିନସ୍ଥ ପୁନେ ଗ୍ରାଉଣ୍ଡର ପିଚ୍କୁ ଏବେଠୁ ଲଣ୍ଡା କରାଯାଇଛି । କଳା ମାଟିରେ ପ୍ରସ୍ତୁତ ହୋଇଛି ପିଚ୍ । ଫଳରେ ଦ୍ୱିତୀୟ ଦିବସ ଅପରାହ୍ଣରୁ ସ୍ପିନରମାନେ ପିଚ୍ରୁ ଫାଇଦା ପାଇବେ । ସମୟ କ୍ରମେ ବଲ୍ ଅପେକ୍ଷାକୃତ ଅଧିକ ଟର୍ଣ୍ଣ ହେବ । ମାତ୍ର ଚିନ୍ନାସ୍ୱାମୀ ଷ୍ଟାଡ଼ିୟମ୍ ଭଳି ବଲ୍ ବାଉନ୍ସ ହେବ ନାହିଁ । ବେଙ୍ଗାଲୁରୁରେ ବର୍ଷା ଯୋଗୁଁ ପିଚ୍ ପେସ୍ ବୋଲରଙ୍କୁ ସହାୟତା କରିଥିଲା । ରୋହିତ ଟସ୍ ଜିତି ବ୍ୟାଟିଂ ନେବା ଫଳରେ ନ୍ୟୁଜିଲାଣ୍ଡ ପେସ ବୋଲରମାନେ କୋହଲା ପାଗର ଫାଇଦା ଉଠାଇବାରେ ସଫଳ ହୋଇଥିଲେ ।
ପୁନେରେ ଟସ୍ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ । ପ୍ରଥମ ଦିବସର ପ୍ରଥମ ଅଧିବେଶନରେ ପେସ୍ ବୋଲରମାନେ ପିଚ୍ରୁ ସୁଇଂ ପାଇପାରନ୍ତି । ଅପରାହ୍ଣରେ ପୁରୁଣା ବଲ୍ ରିଭର୍ସ ସୁଇଂ କରିବ । ଚତୁର୍ଥ ଓ ପଞ୍ଚମ ଦିବସରେ ବ୍ୟାଟିଂ କଷ୍ଟକର ହେବ । ଫଳରେ ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
୩ସ୍ପିନର ଖେଳିବା ନିଶ୍ଚିତ
ପ୍ରଥମ ଟେଷ୍ଟ ଭଳି ପୁନେରେ ମଧ୍ୟ ଭାରତ ୩ଜଣ ସ୍ପିନର ନେଇ ଖେଳିବା ନିଶ୍ଚିତ । ଦଳରେ ୪ଜଣ ସ୍ପିନର(ରବି ଅଶ୍ୱିନ, ରବିନ୍ଦ୍ର ଜାଡେଜା, କୁଲଦୀପ ଯାଦବ, ଅକ୍ଷର ପଟେଲ) ରହିଥିବାବେଳେ ପଞ୍ଚମ ସ୍ପିନର ଭାବେ ୱାସିଂଟନ ସୁନ୍ଦରଙ୍କୁ ଡାକରା ମିଳିଛି । ଏହା ପଛର ପ୍ରକୃତ ରହସ୍ୟ ଜଣା ପଡ଼ି ନଥିଲେ ହେଁ କୁଲଦୀପଙ୍କ ସ୍ଥାନରେ ସୁନ୍ଦର ଏକାଦଶରେ ସ୍ଥାନ ପାଇବା ସମ୍ଭାବନା ଦେଖା ଦେଇଛି । କାରଣ ନ୍ୟୁଜିଲାଣ୍ଡ ଟପ୍ ଅର୍ଡରରେ ୩ଜଣ ବାମ ହାତି ବ୍ୟାଟର ରହିଛନ୍ତି । ୱାସିଂଟନ ସୁନ୍ଦର ପାରମ୍ପରିକ ଅଫ ସ୍ପିନ୍ ବୋଲର ହୋଇଥିଲେ ହେଁ ପ୍ରତ୍ୟେକ ପିଚରେ ସେ ବଲ୍କୁ ଅତିରିକ୍ତ ବାଉନ୍ସ କରାଇବାର କ୍ଷମତା ରଖିଛନ୍ତି । ଗତ ଦିଲ୍ଲୀ ବିପକ୍ଷ ରଣଜୀ ଟ୍ରଫି ମୁକାବିଲାରେ ସୁନ୍ଦର ୧୫୨ ରନ୍ର ଇନିଂସ ଖେଳିଥିଲେ । ତେଣୁ ନିମ୍ନ ଭାଗରେ ତାଙ୍କ ବ୍ୟାଟିଂ ମଧ୍ୟ ଦଳ ପାଇଁ ସହାୟକ ହେବ ବୋଲି ଆଶା କରାଯାଉଛି ।
ପୁନେରେ ତୃତୀୟ ଟେଷ୍ଟ
ମହାରାଷ୍ଟ୍ର କ୍ରିକେଟ ଆସୋସିଏସନ ଗ୍ରାଉଣ୍ଡ ତୃତୀୟ ଟେଷ୍ଟ ଆୟୋଜନ କରିବାକୁ ଯାଉଛି । ୨୦୧୬/୧୭ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜର ପ୍ରଥମ ମ୍ୟାଚ ପୁନେକୁ ମିଳିଥିଲା । ଏହି ମ୍ୟାଚ ମାତ୍ର ୩ ଦିନ ମଧ୍ୟରେ ଶେଷ ହୋଇଥିଲା ଓ ଭାରତ ୩୩୩ ରନ୍ରେ ପରାଜିତ ହୋଇଥିଲା । ସ୍ପିନରମାନେ ମୋଟ୍ ୩୧ଟି ୱିକେଟ୍ ଅକ୍ତିଆର କରିଥିଲେ ଓ ଏଥିରୁ ଅଷ୍ଟ୍ରେଲିଆର ଷ୍ଟିଭ ଓ’କିଫ ୧୨ଟି ୱିକେଟ୍ ନେଇଥିଲେ। ପରେ ଆଇସିସି ମ୍ୟାଚ୍ ରେଫରୀ ପୁନେ ପିଚ୍କୁ ‘ଦୁର୍ବଳ’ ମାନ୍ୟତା ଦେଇଥିଲେ ।
୨୦୧୯ରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଏଠାରେ ଦ୍ୱିତୀୟ ଟେଷ୍ଟ ଅନୁଷ୍ଠିତ ହୋଇଥିଲା । ବିରାଟ କୋହଲି ଦ୍ୱିଶତକ ଅର୍ଜନ କରିଥିଲେ ଓ ଭାରତ ଇନିଂସ ବିଜୟ ହାସଲ କରିଥିଲା ।