କଟକ,୧୯/୧୦: ବାରବାଟୀରେ ଶୁକ୍ରବାର ଜାମ୍ମୁ-କାଶ୍ମୀର ବିପକ୍ଷରେ ରଣଜୀ ପଦାର୍ପଣ କରି ଚର୍ଚ୍ଚାକୁ ଆସିଛନ୍ତି ଓଡ଼ିଶାର ବାମହାତୀ ସ୍ପିନର ସୁମିତ ଶର୍ମା । ପ୍ରଥମ ଇନିଂସରେ ଅଗ୍ନି ବର୍ଷୀ ବୋଲିଂ କରି ଭ୍ରମଣକାରୀ ଦଳର ବିପର୍ଯ୍ୟୟ ଘଟାଇ ୫ଟି ୱିକେଟ୍ ହାସଲ କରିଛନ୍ତି । ସୁମିତଙ୍କର ଚମକପୂର୍ଣ୍ଣ ପଦାର୍ପଣକୁ ନେଇ କ୍ରିକେଟ୍ପ୍ରେମୀ ବେଶ ଉତ୍ସାହିତ । କେବଳ ସେ ଏକା ନୁହଁନ୍ତି, ପୂରା ଓଡ଼ିଶାର ବୋଲିଂ ବାହିନୀ ପ୍ରଥମ ଦିବସରେ ଅତି ସନ୍ତୁଳିତ ପ୍ରଦର୍ଶନ ରି ଜାମ୍ମୁ-କାଶ୍ମୀର ଉପରେ ଭାରି ପଡ଼ିଥିଲେ । ତଥାପି ଆଇପିଏଲ୍ ଖେଳାଳି ଅବଦୁଲ ସାମଦ ଲଢ଼ୁଆ ବ୍ୟାଟିଂ କରି ଶତକୀୟ ଇନିଂସ (୧୨୭) ଖେଳିଥିଲେ । ଫଳରେ ଜାମ୍ମୁ-କାଶ୍ମୀର ପ୍ରଥମ ଇନିଂସରେ ୨୭୦ ରନ୍ କରିଥିଲା । ଓଡ଼ିଶା ପ୍ରଥମ ଇନିଂସ ଆରମ୍ଭ କରି ପ୍ରଥମ ଦିବସ ଶେଷ ସୁଦ୍ଧା ୧ ୱିକେଟ୍ରେ ୧୫ ରନ୍ କରିଛି ।
ତ୍ରିପୁରା ବିପକ୍ଷ ପ୍ରଥମ ମ୍ୟାଚ୍ ବର୍ଷାରେ ଧୋଇ ଯିବା ପରେ ଚଳିତ ରଣଜୀ ଟ୍ରଫିର ଦ୍ୱିତୀୟ ରାଉଣ୍ଡରେ ଓଡ଼ିଶା ଆଜି ବାରବାଟୀ ଷ୍ଟାଡିୟମରେ ଭ୍ରମଣକାରୀ ଜାମ୍ମୁ-କାଶ୍ମୀର ବିପକ୍ଷରେ ବେଶ୍ ଭଲ ଆରମ୍ଭ କରିଛି । ଅଧିନାୟକ ପାରସ ଡୋଗ୍ରା ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ । ଓଡ଼ିଶା ବାମହାତୀ ଅର୍ଥୋଡକ୍ସ ସୁମିତଙ୍କୁ ପଦାର୍ପଣ କରାଇଥିଲା । ୩ ପେସର୍ ଓ ଜଣେ ପେସାଦାର ସ୍ପିନର୍କୁ ନେଇ ଅଧିନାୟକ ଗୋବିନ୍ଦ ପୋଦ୍ଦାର ମଇଦାନକୁ ଓହ୍ଲାଇଥିଲେ । ରାଜେଶ ଓ ସୂର୍ଯ୍ୟକାନ୍ତଙ୍କୁ ୨ଟି ଲେଖାଏଁ ୱିକେଟ୍ ଆରମ୍ଭରୁ ଘରୋଇ ଦଳକୁ ମିଳିଥିଲା ବଡ଼ ସଫଳତା । ମାତ୍ର ୧୪ ରନ୍ ମଧ୍ୟରେ ଭ୍ରମଣକାରୀ ଦଳର ୨ ଓପନର ପାଭିଲିୟନ ଫେରିଥିଲେ । ଅଭିନବ ପୁରୀଙ୍କୁ (୬) ରାଜେଶ ମହାନ୍ତି ଏଲ୍ବିଡବ୍ଲ୍ୟୁ କରାଇଥିଲେ । ପ୍ରଥମ ମ୍ୟାଚ୍ରେ ଦ୍ୱିଶତକୀୟ ଇନିଂସ ଖେଳିଥିବା ଶୁଭମ ଖଜୁରିଆଙ୍କୁ (୭) ନିଜର ଶିକାର ବନାଇଥିଲେ ସୂର୍ଯ୍ୟକାନ୍ତ ପ୍ରଧାନ । ସହଳ ଦୁଇ ଓପନର ଫେରିଯିବା ପରେ ଅଧିନାୟକ ଗୋବିନ୍ଦ ସ୍ପିନର୍ ସୁମିତଙ୍କୁ ଲଗାଇଥିଲେ । ସେ ମଧ୍ୟ ଅଧିନାୟକଙ୍କ ବିଶ୍ୱାସ ଜିତିଥିଲେ । ଶୁଭମ ପୁନ୍ଦିରଙ୍କୁ (୨୦) ବଡ ସଟ୍ ଖେଳିବାକୁ ସୁଯୋଗ ଦେଇ ନିଜ ବୋଲିଂ ଜାଲରେ ଫସାଇଥିଲେ ସୁମିତ । ପ୍ରଥମ ଶ୍ରେଣୀ କ୍ରିକେଟ୍ରେ ଏହା ତାଙ୍କର ଥିଲା ପ୍ରଥମ ୱିକେଟ୍ । ୱିକେଟରକ୍ଷକ ଶିବାଂଶ (୪) ଶର୍ମା ମଧ୍ୟ ସୁମିତଙ୍କ ଶିକାର ହୋଇଥିଲେ । ଅଧିନାୟକ ଡୋଗ୍ରା (୫) ମଧ୍ୟ ଦଳକୁ ନିରାଶ କରିଥିଲେ । ୫୮ ରନ୍ରେ ଜାମ୍ମୁ-କାଶ୍ମୀର ପ୍ରାରମ୍ଭିକ ୪ଟି ୱିକେଟ୍ ହରାଇ ଚାପର ବସବର୍ତ୍ତୀ ହୋଇଥିଲା । ମାତ୍ର ଅବଦୁଲ୍ ସାମଦ୍ ନିଜ ଅଭିଜ୍ଞତାର ପରିଚୟ ଦେଇଥିଲେ । ଘରୋଇ ବୋଲରଙ୍କୁ ସାହସର ସହ ସାମ୍ନା କରି ଦଳୀୟ ସ୍କୋରକୁ ଦ୍ରୁତ ଗତିରେ ଆଗେଇ ନେଇଥିଲେ । ଦଳକୁ ସେ ବିପର୍ଯ୍ୟୟରୁ ଉଦ୍ଧାର କରିଥିଲେ । ଶେଷରେ ସେ ସୁମିତଙ୍କ ଦ୍ୱାରା ଆଉଟ୍ ହୋଇଥିଲେ । ୧୧୭ ବଲ୍ରୁ ୬ ଚୌକା ଓ ୯ ବିଶାଳ ଛକା ମାରି ସାମଦ୍ ୧୨୭ ରନ୍ କରିଥିଲେ । ମଧ୍ୟଭାଗରେ ସାହିଲ ଲୋତ୍ରାଙ୍କ ଯୋଗଦାନ ମଧ୍ୟ ଗୁରୁତ୍ୱପୂର୍ଣ୍ଣ ରହିଥିଲା । ସେ ୩୯ ରନ୍ କରି ସମାଦଙ୍କୁ ସହାୟତା କରିଥିଲେ । ପରେ ଅନ୍ୟ ବ୍ୟାଟରମାନେ ଅଧିକ ସମୟ ତିଷ୍ଟି ପାରିନଥିଲେ । ଶେଷରେ ଦଳ ୨୭୦ ରନ୍ରେ ସୀମିତ ରହିଥିଲା । ଆବିଦ୍ ମୁସ୍ତାକ୍ ୧୭, ଯୁଧବୀର୍ ସିଂ ୧୮, ଉମର୍ ନଜିର୍ ମିର୍ ୧୧ ଏବଂ ଆକିବ ନବି ୧୨ (ଅପରାଜିତ) ରନ୍ କରିଥିଲେ । ସୁମିତ ଶର୍ମା ୧୭ ଓଭର ବୋଲିଂ କରି ୭୯ ରନ୍ରେ ୫ ୱିକେଟ ନେଇଥିଲେ । ରାଜେଶ ମହାନ୍ତି, ସୂର୍ଯ୍ୟକାନ୍ତ ପ୍ରଧାନଙ୍କୁ ୨ଟି ଲେଖାଏଁ ଏବଂ ଦେବବ୍ରତ ପ୍ରଧାନଙ୍କୁ ଗୋଟିଏ ୱିକେଟ ମିଳିଥିଲା । ଖାତା ଖୋଲିପାରିଲେନି ଶାନ୍ତନୁ ଜବାବରେ ଓଡ଼ିଶା ପ୍ରଥମ ଦିବସ ଶେଷ ସୁଦ୍ଧା ୯ ଓଭର ବ୍ୟାଟିଂ କରି ୧୫ ରନ୍ କରିଥିଲା । ପ୍ରଥମ ଓଭରର ଦ୍ୱିତୀୟ ବଲ୍ରେ ଶାନ୍ତନୁ ଖାତା ନଖୋଲି ଆଉଟ୍ ହୋଇଥିଲେ । ଷ୍ଟମ୍ପ ଅପସାରଣ ବେଳକୁ ଅନୁରାଗ ଷଢଙ୍ଗୀ ୮ ଓ ସନ୍ଦୀପ ପଟ୍ଟନାୟକ ୬ ରନ୍ କରି ଅପରାଜିତ ରହିଥିଲେ ।