ପୁରୀ, ୨୨/୧୦ : ବଙ୍ଗୋପସାଗର ଅଶାନ୍ତ। ସମୁଦ୍ର ଭିତରେ ଦାନା ବାନ୍ଧୁଛି ବାତ୍ୟା। ଭୀଷଣ ରୂପ ନେଇ ଓଡ଼ିଶା ଉପକୂଳରେ ମାଡ଼ ହେବା ଅଶଙ୍କା ସୃଷ୍ଟି ହୋଇଛି। ଏହାକୁ ଦୃଷ୍ଟିରେ ରଖି ପୁରୀ ମହୋଦଧିରେ ସ୍ନାନ ନିମନ୍ତେ ଯାତ୍ରୀଙ୍କୁ ବାରଣ କରାଯାଉଛି। ସମୁଦ୍ରରେ ରିପ୍‌ କରେଣ୍ଟ ବଢ଼ିଥିବାରୁ ବେଳାଭୂମିର ବିଭିନ୍ନ ସ୍ଥାନରେ ନାଲି ପତାକା ପୋତାଯାଇଛି। ଯାତ୍ରୀମାନଙ୍କୁ ଏହି ସ୍ଥାନମାନଙ୍କରେ ଆଦୌ ସମୁଦ୍ର ସ୍ନାନ ନକରିବାକୁ କୁହାଯାଉଛି। 

ଲାଇଫ୍‌ ଗାର୍ଡମାନେ ସତର୍କ ରହି ଯାତ୍ରୀଙ୍କୁ ସମୁଦ୍ର ସ୍ନାନ ନକରିବାକୁ ସଚେତନ କରୁଛନ୍ତି। ସେହିପରି ମତ୍ସ୍ୟଜୀବୀମାନଙ୍କୁ ଗଭୀର ସମୁଦ୍ରକୁ ଯାଇ ମାଛ ଧରିବାକୁ ପ୍ରଶାସନ ବାରଣ କରୁଛି। ସମୁଦ୍ର ଭିତରେ ରହି ଯାଇଥିବା ଧୀବରମାନେ ଡଙ୍ଗା ଧରି ଶୀଘ୍ର କୂଳରେ ପହଞ୍ଚିବାକୁ ବାର୍ତ୍ତା ଦିଆଯାଇଥିବା ଜଣାପଡ଼ିଛି।