ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଲଗାତାର କିଛି ଦିନ ଧରି ଚାଲିଥିବା ସାମରିକ ସଂଘର୍ଷ ପରେ ଏବେ ଶାନ୍ତିର ବାତାବରଣ ରହିଛି। ସୂଚନାଥାଉକି, ଭାରତୀୟ ସଶସ୍ତ୍ର ବାହିନୀ ପାକିସ୍ତାନର ଆତଙ୍କବାଦୀ ଆଡ୍ଡା ଏବଂ ଏୟାରବେସକୁ ଟାର୍ଗେଟ କରି କିଛି ସମୟ ମଧ୍ୟରେ ଧରାଶାୟୀ କରିଦେଇଥିଲା। ଏହା ପରେ, ପାକିସ୍ତାନର ଅନୁରୋଧରେ, ଭାରତ ଯୁଦ୍ଧବିରତି ପାଇଁ ରାଜି ହୋଇଥିଲା। ତେବେ ଭାରତ ଏବଂ ପାକିସ୍ତାନ ମଧ୍ୟରେ ହୋଇଥିବା ଅସ୍ତ୍ରବିରତିକୁ ନଇ ବିଶ୍ୱର ବିଭିନ୍ନ ଦେଶ ଖୁସି ପ୍ରକାଶ କରିଛନ୍ତି। ଆଉ ଏହି ସମୟରେ, ସାଉଦି ଆରବର କ୍ରାଉନ୍ ପ୍ରିନ୍ସ ମହମ୍ମଦ ବିନ୍ ସଲମାନ ମଧ୍ୟ ପ୍ରଥମ ଥର ପାଇଁ ଭାରତ-ପାକିସ୍ତାନ ଯୁଦ୍ଧବିରତି ଉପରେ ଏକ ବିବୃତ୍ତି ଜାରି କରିଛନ୍ତି। ଏବେ ଆସନ୍ତୁ କ’ଣ କହିଛନ୍ତି ସେ…
ସାଉଦି ଆରବର ସରକାରୀ ଏଜେନ୍ସି ଦ୍ୱାରା ଜାରି ହୋଇଥିବା ସୂଚନା ଅନୁଯାୟୀ, ରିୟାଦରେ ଗଲ୍ଫ କୋଅପରେସନ କାଉନସିଲ ବୈଠକରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଅନ୍ୟ ନେତା ମାନଙ୍କୁ ସମ୍ବୋଧିତ କରିବା ସମୟରେ କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମାନ କହିଥିଲେ ଯେ, "ଆମେ ପାକିସ୍ତାନ ଏବଂ ଭାରତ ମଧ୍ୟରେ ଯୁଦ୍ଧବିରତି ଚୁକ୍ତିକୁ ସ୍ୱାଗତ କରୁଛୁ। ମୁଁ ଆଶା କରୁଛି ଏହା ଦୁଇ ଦେଶ ମଧ୍ୟରେ ଉତ୍ତେଜନା ହ୍ରାସ କରିବାରେ ଏବଂ ଶାନ୍ତି ଫେରାଇ ଆଣିବାରେ ସାହାଯ୍ୟ କରିବ।"
ଏପ୍ରିଲ ୨୨ରେ ଜମ୍ମୁକାଶ୍ମୀରର ପହଲଗାମରେ ପାକିସ୍ତାନୀ ଆତଙ୍କବାଦୀ ମାନେ ୨୬ ଜଣ ନିରୀହ ଲୋକଙ୍କୁ ହତ୍ୟା କରିଥିଲେ। ପହଲଗାମ ଆକ୍ରମଣର ଜବାବରେ ଭାରତ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ଆଡ୍ଡା ଗୁଡ଼ିକୁ ଧ୍ୱଂସ କରିଥିଲା। ସେବେଠାରୁ, ପାକିସ୍ତାନ ଜମ୍ମୁ-କାଶ୍ମୀରରୁ ଗୁଜରାଟ ପର୍ଯ୍ୟନ୍ତ କ୍ଷେପଣାସ୍ତ୍ର, ଡ୍ରୋନ୍ ଏବଂ ଯୁଦ୍ଧ ବିମାନ ସାହାଯ୍ୟରେ ଭାରତ ଉପରେ ନିରନ୍ତର ଆକ୍ରମଣ କରି ଆସୁଛି । ତେବେ ଭାରତୀୟ ସେନା ବାୟୁ ପ୍ରତିରକ୍ଷା ସହାୟତାରେ ପାକିସ୍ତାନର ସମସ୍ତ ପ୍ରୟାସକୁ ବିଫଳ କରିଛି।
