ନୂଆଦିଲ୍ଲୀ,୨୮/୦୮: ଭାରତର ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍ (UPI) ର ଚାହିଦା ବିଦେଶରେ ପହଞ୍ଚିଛି। ବର୍ତ୍ତମାନ ୟୁପିଆଇକୁ ନେଇ ଏକ ବଡ଼ ଖବର ଆସିଛି ଯେ, ସେଠାରେ ଥିବା ୟୁପିଆଇର ବ୍ୟବସାୟିକ ବ୍ୟବହାର ପାଇଁ ବାଣିଜ୍ୟିକ ସହଭାଗୀତା ପାଇଁ ଭାରତର ଅନେକ ଆଫ୍ରିକୀୟ ଦେଶ ସହିତ ଆଲୋଚନା ଚାଲିଛି। ନାମିବ୍ୟା, ମୋଜାମ୍ବିକ ଏବଂ କେନିଆ ସମେତ ଅନେକ ଆଫ୍ରିକୀୟ ଦେଶ ସହିତ ଭାରତ ଏହାର ୟୁପିଆଇ ଏବଂ ପେମେଣ୍ଟ ପ୍ଲାଟଫର୍ମ ମଧ୍ୟରେ ବ୍ୟବସାୟିକ ସହଭାଗିତା ବିକାଶ ପାଇଁ ଆଲୋଚନା କରୁଛି। ଭାରତର ଏହି ପଦକ୍ଷେପକୁ ବିଶ୍ୱ ଫୋରମରେ ବିକାଶଶୀଳ ଦେଶର ସ୍ୱର ହେବା ଦିଗରେ ନିଆଯାଉଥିବା ପଦକ୍ଷେପ କହିଲେ ଅତ୍ୟୁକ୍ତି ହେବ ନାହିଁ।
ଲାଇଭମିଣ୍ଟର ଖବର ଅନୁଯାୟୀ, ନ୍ୟାସନାଲ ପେମେଣ୍ଟ କର୍ପୋରେସନ୍ ଅଫ୍ ଇଣ୍ଡିଆର ଆନ୍ତର୍ଜାତୀୟ ସିଇଓ ରିତେଶ ଶୁକ୍ଲା ଏହି ସୂଚନା ଦେଇଛନ୍ତି ଏବଂ କହିଛନ୍ତି ଯେ, ଆସନ୍ତା ୧୨ ରୁ ୧୮ ମାସ ମଧ୍ୟରେ ଯେଉଁଠାରେ ୟୁପିଆଇ ଲାଇଭ ହେବ, ସେଠାରେ ଏହାର ସଂଖ୍ୟା ଦ୍ବିଗୁଣିତ ହୋଇଯିବ। ଉଲ୍ଲେଖଯୋଗ୍ୟ ଯେ, ରିତେଶ ଶୁକ୍ଲା ହିଁ ୟୁପିଆଇକୁ ବିକଶିତ କରିଛନ୍ତି। ସେ କହିଛନ୍ତି ଯେ "ୟୁପିଆଇ ଆରମ୍ଭ ହେବା ପୂର୍ବରୁ ଭାରତ ଯେଉଁ ସମସ୍ୟାର ସମ୍ମୁଖୀନ ହେଉଥିଲା - ଏହି ସମୟରେ ଅନେକ ଦେଶ ସମାନ ସମସ୍ୟାର ସମ୍ମୁଖୀନ ହେଉଛନ୍ତି। ଫିଣ୍ଟେକ୍ ଇନକ୍ୟୁବେସନ, ସ୍ୱଚ୍ଛତା ଏବଂ ଅନ୍ୟାନ୍ୟ ଜିନିଷ ଅଛି ଯାହା ଦ୍ବାରା କିଛି ଦେଶ ସମସ୍ୟାର ସମ୍ମୁଖୀନ ହେଉଛନ୍ତି। ତେଣୁ ଭାରତ ସେମାନଙ୍କ ସହ ସହଭାଗୀ ହେବା ପାଇଁ "ଆଲୋଚନା ଏବଂ ସେମାନଙ୍କୁ ସାହାଯ୍ୟ କରିବାକୁ ଚେଷ୍ଟା କରୁଛି ଯାହା ଦ୍ବାରା ସେମାନେ ୟୁପିଆଇର ନିଜସ୍ୱ ସଂସ୍କରଣକୁ ବ୍ୟବହାର କରିବାକୁ ସମର୍ଥ ହେବେ।
ବିଦେଶରେ ବୃଦ୍ଧି ହେଊଛି ଭାରତର ୟୁପିଆଇ:
ସାମ୍ପ୍ରତିକ ବର୍ଷଗୁଡିକରେ, ଭାରତ ଅନେକ ବିକାଶଶୀଳ ଦେଶରେ ଏହାର ସିଗ୍ନେଚର ୟୁପିଆଇ ପ୍ଲାଟଫର୍ମ ବଣ୍ଟନ କରିଛି। ୟୁପିଆର ବିଶ୍ବସ୍ତରୀୟ ଫୁଟପ୍ରିଣ୍ଟକୁ ପ୍ରୋତ୍ସାହିତ କରିବା ପାଇଁ ଭାରତ ଦୁଇଟି ରଣନୀତି ଅନୁସରଣ କରୁଛି। ପ୍ରଥମଟି ହେଉଛି ଭାଗୀଦାରୀ ଦେଶମାନଙ୍କ ପାଇଁ ପ୍ଲାଟଫର୍ମ ଏବଂ ଡିଜିଟାଲ୍ ଭିତ୍ତିଭୂମି ନିର୍ମାଣରେ ସାହାଯ୍ୟ କରିବା, ଦ୍ୱିତୀୟଟି ହେଉଛି ଭାରତୀୟ ସହଭାଗୀ ତଥା ପ୍ରବାସୀମାନଙ୍କ ପାଇଁ ଜୀବନକୁ ସହଜ କରିବା ପାଇଁ ବାଣିଜ୍ୟିକ ସହଭାଗୀତା ଏବଂ ବିଦେଶରେ ଥିବା ପ୍ଲାଟଫର୍ମ ସହିତ ଲିଙ୍କେଜ୍ ସ୍ୱାକ୍ଷର କରିବା ।
ଭାରତର ଅନେକ ପଡୋଶୀ ଦେଶ ୟୁପିଆଇ ବ୍ୟବସ୍ଥା ଗ୍ରହଣ କରିଛନ୍ତି, ଏମାନଙ୍କ ଭିତରେ ନେପାଳ ଏବଂ ଭୁଟାନ ଏହି ପ୍ଲାଟଫର୍ମ ବ୍ୟବହାର କରୁଥିବାବେଳେ ଆସନ୍ତା ମାସରେ ଶ୍ରୀଲଙ୍କାରେ ୟୁପିଆଇ କାର୍ଯ୍ୟକ୍ଷମ ହେବ ବୋଲି ଆଶା କରାଯାଉଛି। ଚଳିତ ବର୍ଷ ଭାରତ ଏବଂ ସିଙ୍ଗାପୁର ମଧ୍ୟ ସେମାନଙ୍କ ପେମେଣ୍ଟ ସିଷ୍ଟମକୁ ଟଙ୍କା ପଠାଇବା ପ୍ରବାହକୁ ସହଜ କରିଛନ୍ତି।
You can also read:
