କୋଲକତା,୨୨/୧ : ଭାରତ-ଇଂଲଣ୍ଡ ମଧ୍ୟରେ ଆଜିଠୁ (ବୁଧବାର) ଟି-ଟ୍ବେଣ୍ଟି ସିରିଜ ଆରମ୍ଭ ହେବ । ଇଡେନ ଗାର୍ଡେନରେ ହେବ ପ୍ରଥମ ଲଢେଇ । ସୂର୍ଯ୍ୟକୁମାର ଯାଦବଙ୍କ ନେତୃତ୍ବରେ ଯୁବ ଖେଳାଳିଙ୍କୁ ନେଇ ମଇଦାନକୁ ଓହ୍ଲାଇବ ଭାରତ । କୋଲକାତାର ଐତିହାସିକ ଇଡେନ ଗାର୍ଡେନରେ ଟି-୨୦ ସିରିଜର ପ୍ରଥମ ମ୍ୟାଚ୍ ଖେଳାଯିବ । ଇଂଲଣ୍ଡ ବିପକ୍ଷରେ ଘରୋଇ ମଇଦାନରେ ଫଟାଫଟ ପାଞ୍ଚ ମ୍ୟାଚ ବିଶିଷ୍ଟ ଶୃଙ୍ଖଳାରେ ପ୍ରଥମ ମ୍ୟାଚ ଖେଳିବ ଭାରତ । ଦୀର୍ଘ ଦିନ ପରେ ଭାରତୀୟ ଦଳକୁ ଫେରିଥିବା ମହମ୍ମଦ ସାମିଙ୍କ ଉପରେ ଫୋକସ୍ ରହିବ । ଟି-ଟ୍ବେଣ୍ଟି ବିଜୟରୁ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛି ସୂର୍ଯ୍ୟସେନା । ସଂନ୍ଧ୍ୟା ୭ଟାରୁ ମ୍ୟାଚ ଆରମ୍ଭ ହେବ ।
ଘରୋଇ ମାଟିରେ ଇଂଲଣ୍ଡକୁ ସାମ୍ନା କରିବ ସୂର୍ଯ୍ୟସେନା । ଦୁଇ ମହାଶକ୍ତି ମଧ୍ୟରେ ହେବ ମୁକାବିଲା । ଇଡେନ ଗାର୍ଡେନରେ ପ୍ରଥମ ମ୍ୟାଚ ଖେଳାଯିବ । ଦୁଇ ବ୍ୟାଟିଂ ପାୱାର ହାଉସ୍ଙ୍କ ମଧ୍ୟରେ ହେବାକୁ ଥିବା ଏହି ମ୍ୟାଚକୁ ନେଇ ଦର୍ଶକ ଉତ୍ସାହିତ ଅଛନ୍ତି । ଉଭୟ ଦଳ ଗତ ୩ ଦିନ ଧରି ଏଠାରେ ଅଭ୍ୟାସ ଜାରି ରଖିଛନ୍ତି । ଇଂଲଣ୍ଡ ଚୂଡ଼ାନ୍ତ ଏକାଦଶ ଘୋଷଣା କରିସାରିଛି । ଉଭୟ ଦଳର ଯୁବ ତାରକାମାନେ ଇଡେନ୍ ଗାର୍ଡେନ୍ସରେ ଛକା ବର୍ଷା କରିବାକୁ ଅପେକ୍ଷା କରି ରହିଛନ୍ତି । କେବଳ ରଣନୀତି ଓ ବୋଲିଂ ବିଭାଗ ଉପରେ ମ୍ୟାଚ୍ର ଫଳାଫଳ ନିର୍ଭର କରିବ । ଏସବୁ ମଧ୍ୟରେ ଦର୍ଶକଙ୍କ ନଜର ଦୁଇ ଚର୍ଚ୍ଚିତ ପେସ୍ ବୋଲର ମହମ୍ମଦ ସାମି ଓ ଜୋଫ୍ରା ଆର୍ଚରଙ୍କ ଉପରେ ରହିବ । ବିଜୟରୁ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି ଦୁଇ ଦଳ ।
ଫୋକସରେ ମହମ୍ମଦ ସାମି- ୧୫ମାସ ପରେ କୌଣସି ଅନ୍ତର୍ଜାତୀୟ କ୍ରିକେଟ୍ ଖେଳିବାକୁ ଯାଉଛନ୍ତି ମହମ୍ମଦ ସାମି । ଦିନିକିଆ ବିଶ୍ବକପର ହିରୋ ସାଜିଥିବା ସାମିଙ୍କ ଭାରତୀୟ ଦଳକୁ କମବ୍ୟାକ ହୋଇଛି । ତାଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିବ । ଟି-ଟ୍ୱେଣ୍ଟି ବିଶ୍ୱକପ୍ ବିଜୟ ପରଠୁ ଉଭୟ ଦଳ ପ୍ରଥମ କରି ପରସ୍ପରକୁ ଭେଟିବେ । ବିଶ୍ୱକପ୍ ଦଳ ଓ ବର୍ତ୍ତମାନର ଦଳ ମଧ୍ୟରେ ଆକାଶ ପାତାଳ ଫରକ । ଉଭୟ ଦଳରେ ଯୁବ ଓ ଅଭିଜ୍ଞ ଖେଳାଳିଙ୍କ ସମନ୍ୱୟ ରହିଛି । ଭାରତର ବ୍ୟାଟିଂ ଅନୁକୂଳ ପିଚ୍, ସୁପର ଫାଷ୍ଟ ଆଉଟ୍ ଫିଲ୍ଡ ଓ ଛୋଟ ବାଉଣ୍ଡାରୀ ବିସ୍ଫୋରକ ବ୍ୟାଟିଂ ପାଇଁ ଭୂସ୍ୱର୍ଗ । ଉଭୟ ଦଳରେ ରହିଥିବା ଯୁବ ବ୍ୟାଟରମାନେ ଧୂଆଁଧାର ବ୍ୟାଟିଂ କରିବାରେ ସିଦ୍ଧହସ୍ତ । ଟି-ଟ୍ୱେଣ୍ଟି ବିଶ୍ୱକପ୍ ବିଜୟ ପରେ ବିରାଟ କୋହଲି, ରୋହିତ ଶର୍ମା ଓ ରବିନ୍ଦ୍ର ଜାଡେଜା ଏହି ଛୋଟ ଫର୍ମାଟ୍ରୁ ଅବସର ଘୋଷଣା କରିଥିଲେ । ସେମାନଙ୍କ ଅନୁପସ୍ଥିତିରେ ଯୁବ ଦଳ ଅନେକ ରେକର୍ଡ ଭଙ୍ଗ କରିଛି । ଟି-ଟ୍ୱେଣ୍ଟି ବିଶ୍ୱକପ୍ ପରେ ଭାରତ ୧୧ଟି ମ୍ୟାଚ୍ ଖେଳିଛି ଓ ଏଥିରୁ ୭ଟି ମ୍ୟାଚ୍ରେ ୨୦୦ରୁ ଊଦ୍ଧ୍ୱର୍ ସ୍କୋର ସଂଗ୍ରହ କରିଛି । ୨ଟି ମ୍ୟାଚ୍ରେ ଯଥାକ୍ରମେ ଦଳର ସ୍କୋର ୨୯୭ ଓ ୨୮୩ ରହିଥିଲା ।
ଇଂଲଣ୍ଡ ମଧ୍ୟ ପଛରେ ନାହିଁ । ବ୍ରେଣ୍ଡନ ମ୍ୟାକ୍କୁଲମ ସୀମିତ ଓଭର କ୍ରିକେଟ୍ ଦଳର କୋଚ ଦାୟିତ୍ୱ ନେବା ପରେ ଇଂଲଣ୍ଡ ପୂର୍ବ ତୁଳନାରେ ଅଧିକ ବିସ୍ଫୋରକ ବ୍ୟାଟିଂ କରୁଛି । ବିଶ୍ୱକପ୍ ପରେ ଇଂଲଣ୍ଡ ଖେଳିଥିବା ମ୍ୟାଚ୍ରେ ହାରାହାରି ୨.୫୧ ବଲ୍ରେ ବାଉଣ୍ଡାରୀ ବାହାରକୁ ବଲ୍ ପଠାଉଛି । ଜୋସ ବଟଲର ଓ ଲାଏମ ଲିଭିଙ୍ଗଷ୍ଟୋନଙ୍କ ବିସ୍ଫୋରକ ବ୍ୟାଟିଂ ସହ ଭାରତ ପରିଚିତ । ଏମାନଙ୍କ ସହ ଫିଲ ସଲ୍ଟ, ହ୍ୟାରୀ ବ୍ରୁକ୍ ଓ ଜାକବ ବେଥେଲ ଯୋଡ଼ି ହୋଇଛନ୍ତି । ଗତ କିଛି ମାସ ହେଲା ବ୍ରୁକ୍ ଓ ବେଥେଲ ଚମତ୍କାର ଫର୍ମରେ ରହିଛନ୍ତି ।
ପିଚ୍ ରିପୋର୍ଟ- ଇଡେନ୍ ଗାର୍ଡେନର ପିଚ୍ ବର୍ତ୍ତମାନ ସମ୍ପୂର୍ଣ୍ଣ ସତେଜ । ଚଳିତ ସିଜନରେ ଇଡେନ ଗାର୍ଡେନ ଗୋଟିଏ ହେଲେ ଘରୋଇ ମ୍ୟାଚ୍ ଆୟୋଜନ କରିନାହିଁ । ଅର୍ଥାତ ପିଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ତଥାପି ପିଚ୍ ସମସ୍ତଙ୍କୁ ସହାୟତା କରିବ ବୋଲି ଅନୁମାନ କରାଯାଉଛି । ବିଶେଷ କରି ବ୍ୟାଟରମାନଙ୍କ ପାଇଁ ପିଚ୍ ବେଶ୍ ଅନୁକୂଳ । ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । କାରଣ ଦ୍ୱିତୀୟ ଭାଗରେ କାକର ଯୋଗୁଁ ବ୍ୟାଟିଂ ସହଜ ହୋଇଯିବ ।
ଭାରତୀୟ ସମ୍ଭାବ୍ୟ ଦଳ: ସୂର୍ଯ୍ୟକୁମାର ଯାଦବ (ଅଧିନାୟକ) ସଞ୍ଜୁ ସାମସନ, ଅଭିଷେକ ଶର୍ମା, ତିଳକ ବର୍ମା, ନୀତିଶ କୁମାର ରେଡ୍ଡୀ, ହାର୍ଦ୍ଦିକ ପାଣ୍ଡ୍ୟା, ରିଙ୍କୁ ସିଂହ, ୱାସିଂଟନ ସୁନ୍ଦର/ ରବି ବିଷ୍ଣୋଇ/ବରୁଣ ଚକ୍ରବର୍ତ୍ତୀ, ଅକ୍ଷର ପଟେଲ, ଅର୍ଶଦୀପ ସିଂହ, ମହମ୍ମଦ ସାମି ।
ଇଂଲଣ୍ଡ ଦଳ: ଫିଲ ସଲ୍ଟ ବେନ ଡକେଟ୍, ଜୋସ ବଟଲର (ଅଧିନାୟକ), ହ୍ୟାରୀ ବ୍ରୁକ୍, ଲାଏମ ଲିଭିଙ୍ଗଷ୍ଟୋନ, ଜାକବ ବେଥେଲ, ଜାମି ଓଭରଟନ, ଗସ ଆଟକିନସନ, ଜୋଫ୍ରା ଆର୍ଚର, ଆଦିଲ ରସିଦ, ମାର୍କ ଉଡ୍ ।
