ନୂଆଦିଲ୍ଲୀ: ଆଇପିଏଲ ୨୦୨୫ ମାର୍ଚ୍ଚ ୨୪ରୁ ଆରମ୍ଭ ହେବାକୁ ଯାଉଛି । ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ସବୁ ଦିଳ ନିଜ ନିଜର ଅଧିନାୟକଙ୍କ ନାଁ ଘୋଷଣା କରୁଛନ୍ତି । ଏହାରି ଭିତରେ, ଲକ୍ଷ୍ନୌ ସୁପର ଜାଏଣ୍ଟସ୍ (ଏଲଏସ୍ଜି) ନିଜର ନୂଆ ଅଧିନାୟକ ନିଯୁକ୍ତ କରିଛି । କେଏଲ ରାହୁଲ ଏଲଏସ୍ଜିରେ ନଥିବା ବେଳେ ଏବେ ଏହି ଦାୟିତ୍ବ ରିଷଭ ପନ୍ତଙ୍କୁ ମିଳିଛି ।
ଆଇପିଏଲ ୨୦୨୫ ଲାଗି ହୋଇଥିବା ମେଗା ଅକ୍ସନରେ ସବୁଠାରୁ ଅଧିକ ୨୭ କୋଟି ଟଙ୍କାରେ ରିଷଭ ପନ୍ତଙ୍କୁ କିଣିଥିଲା ଲକ୍ଷ୍ନୌ ଟିମ୍ । ଏବେ ତାଙ୍କୁ ଦଳର ଅଧିନାୟକ କରାଯାଇଛି । ଏହା ପୂର୍ବରୁ ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଥିଲେ ରିଷଭ ପନ୍ତ । ଲକ୍ଷ୍ନୌ ସୁପର ଜାଏଣ୍ଟସ୍ ୨୦୨୨ରେ ଆଇପିଏଲ୍ ଯାତ୍ରା ଆରମ୍ଭ କରିଥିଲା । ୨୦୨୨, ୨୦୨୩ ଏବଂ ୨୦୨୪ରେ ଲକ୍ଷ୍ନୌ ସୁପର ଜାଏଣ୍ଟସ୍ର ଅଧିନାୟକ ଥିଲେ କେଏଲ ରାହୁଲ । ତାଙ୍କ ନେତୃତ୍ବରେ ଟିମ୍ ୨୦୨୨ ଏବଂ ୨୦୨୩ରେ ପ୍ଲେଅଫ୍ ଲାଗି କ୍ବାଲିଫାଏ କରିଥିଲା । କିନ୍ତୁ ୨୦୨୪ରେ ଦଳକୁ ନିରାଶ ହେବାକୁ ପଡ଼ିଥିଲା ।
ଏହାକୁ ନେଇ ଟିମ୍ର ମାଲିକ ସଞ୍ଜୀବ ଗୋୟଙ୍କା ଏବଂ ତତ୍କାଳୀନ ଅଧିନାୟକ କେଏଲ ରାହୁଲଙ୍କ ମଧ୍ୟରେ ବଚସା ହୋଇଥିଲା । ପରେ ଦଳ କେଏଲ ରାହୁଲଙ୍କୁ ରିଟେନ୍ କରିନଥିଲା ଏବଂ ସେ ମେଗା ଅକ୍ସନରେ ସାମିଲ ହୋଇଥିଲେ । ଏବେ କେଏଲ ରାହୁଲ ଦିଲ୍ଲୀ ଟିମ୍ରେ ସାମିଲ ହୋଇଛନ୍ତି ।
ସେପଟେ ରିଷଭ ପନ୍ତଙ୍କୁ ଅଧିନାୟକ କରାଇବା ପରେ ଟିମ୍ର ମାଲିକ ସଞ୍ଜୀବ ଗୋୟଙ୍କା କହିଛନ୍ତି, ପନ୍ତଙ୍କୁ କ୍ୟାପ୍ଟେନ କରିବା ଲାଗି ସମସ୍ତେ ମତ ଦେଇଛନ୍ତି । ସମୟ କହିବ ପନ୍ତ କେବଳ ଆଇପିଏଲର ଦାମୀ ଖେଳାଳି ନୁହେଁ ବରଂ ସର୍ବଶ୍ରେଷ୍ଠ ଖେଳାଳି । ସେହିଭଳି ଗୁରୁ ଦାୟିତ୍ବ ମିଳିବା ପରେ ରିଷଭ ପନ୍ତ କହିଛନ୍ତି, ସାର୍ (ସଞ୍ଜୀବ ଗୋୟଙ୍କା) ମୋ ବିଷୟରେ ଯାହା କହିଛନ୍ତି, ମୁଁ ଏଥିରେ ବହୁତ ଖୁସି ଅଛି ।
