କଲମ୍ବୋ,୨୨/୧: ଇତିହାସ ରଚିଲା ଭାରତ । ଦିବ୍ୟାଙ୍ଗ ଚାମ୍ପିଅନ୍ସ ଟ୍ରଫି କ୍ରିକେଟରେ ଦମଦାର ପ୍ରଦର୍ଶନ କରିଛି ଭାରତୀୟ ଦଳ । ଶ୍ରୀଲଙ୍କାରେ ଆୟୋଜିତ ପୁରୁଷ ଦିବ୍ୟାଙ୍ଗ କ୍ରିକେଟ ଚାମ୍ପିଅନ୍ସ ଟ୍ରଫିରେ ଭାରତ ଚାମ୍ପିଅନ ହୋଇଛି । ଇଂଲଣ୍ଡକୁ ୭୯ରନରେ ହରାଇ ବିଜୟୀ ହୋଇଛି ଟିମ୍ ଇଣ୍ଡିଆ ।
ଶ୍ରୀଲଙ୍କାର କାତୁନାୟକେଠାରେ ଦିବ୍ୟାଙ୍ଗ ଚାମ୍ପିଅନ୍ସ ଟ୍ରଫି କ୍ରିକେଟ ଟୁର୍ଣ୍ଣାମେଣ୍ଟର ଫାଇନାଲ ଖେଳାଯାଇଥିଲା । ଟସ୍ ଜିତି ଭାରତ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା । ନିର୍ଦ୍ଧାରିତ ୨୦ ଓଭରରେ ୪ ୱିକେଟ ହରାଇ ଭାରତ ୧୯୭ ରନ କରିଥିଲା । ଯୋଗେନ୍ଦ୍ର ଭଦୋରିଆ ଦ୍ରୁତ ବ୍ୟାଟିଂ କରି ୪୦ବଲରେ ୭୩ରନ ଦମଦାର ପାଳି ଖେଳିଥିଲେ । ଯେଉଁଥିରେ ୪ଟି ଚୌକା ଓ ୫ଟି ଛକା ସାମିଲ ରହିଛି । ଅଧିନାୟକ ବିକ୍ରାନ୍ତ କେନି ସମଗ୍ର ଟୁର୍ଣ୍ଣାମେଣ୍ଟରେ ଦମଦାର ପ୍ରଦର୍ଶନ କରି ଦଳକୁ ଚାମ୍ପିଅନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । ଫାଇନାଲ ଫାଇଟରେ କ୍ୟାପ୍ଟେନ ବିକ୍ରାନ୍ତ ଅଲରାଉଣ୍ଡର ପ୍ରଦର୍ଶନ କରିଥିଲେ । ଉଭୟ ବ୍ୟାଟିଂ ଓ ବୋଲିଂରେ ଯାଦୁ ଦେଖାଇଥିଲେ ବିକ୍ରାନ୍ତ ।
୧୯୮ରନର ବିଜୟ ଲକ୍ଷ୍ୟ ପିଛା କରି ବ୍ୟାଟିଂ ଆରମ୍ଭ କରିଥିଲା ଇଂଲଣ୍ଡ । ଭାରତୀୟ ବୋଲର ଇଂଲଣ୍ଡକୁ ଘାଇଲା କରିଥିଲେ । ଟାର୍ଗେଟର ପିଛା କରି ଇଂଲଣ୍ଡ ମାତ୍ର ୧୧୮ ରନ କରିବାକୁ ସକ୍ଷମ ହୋଇଥିଲା । ୭୯ରନରେ ବିଜୟ ହାସଲ କରିଥିଲା ଭାରତ । ଫାଇନାଲରେ ଭାରତ ପକ୍ଷରୁ ରାଧିକା ପ୍ରସାଦ ଘାତକ ବୋଲିଂ କରି ଇଂଲଣ୍ଡର ବିପର୍ଯ୍ୟୟ ଘଟାଇଥିଲେ । ସେ ୩.୨ ଓଭର ବୋଲିଂ କରି ୧୯ରନ ଦେଇ ୪ଟି ୱିକେଟ ଅକ୍ତିଆର କରିଥିଲେ । ଅଧିନାୟକ ବିକ୍ରାନ୍ତ କେନି ରବିନ୍ଦ୍ର ସାନ୍ତେ ୨ଟି ଲେଖାଏଁ ୱିକେଟ ନେବାରେ ସଫଳ ହୋଇଥିଲେ ।
