ନୂଆଦିଲ୍ଲୀ,୨୦/୧: ଆଇସିସି ଚମ୍ପିଅନ୍ସ ଟ୍ରଫି ୨୦୨୫ର ବିଗୁଲ ବାଜି ସାରିଛି । ଫେବୃଆରୀ ୧୯ ତାରିଖରୁ ସମ୍ମାନଜନକ ଚମ୍ପିଅନ୍ସ ଟ୍ରଫି ଆରମ୍ଭ ହେବ । ଏହାକୁ ନେଇ କ୍ରିକେଟପ୍ରେମୀଙ୍କ ମଧ୍ୟରେ ନାହିଁ ନଥିବା ଉତ୍ସାହ ଭରି ରହିଛି । ଭାରତୀୟ ଦଳର ୧୫ ଯୋଦ୍ଧା ଘୋଷଣା ସରିଛି । ନିକଟରେ ଏହି ମେଗା ଟୁର୍ଣ୍ଣାମେଣ୍ଟ ପାଇଁ ଆଇସିସି ପ୍ରୋମୋ ରିଲିଜ କରିଛି । ତେବେ ପ୍ରଶ୍ନ ଉଠୁଛି ଚମ୍ପିଅନ୍ସ ଟ୍ରଫି ବିଜେତା ଦଳ କାହିଁକି ଧଳା କୋର୍ଟ ପିନ୍ଧନ୍ତି । କେବେଠୁ ଏହି ପରମ୍ପରା ଆରମ୍ଭ ହୋଇଛି । ଏହା ପଛରେ କଣ କାହାଣୀ ରହିଛି ଆସନ୍ତୁ ଜାଣିବା ।
କାହିଁକି ଧଳା କୋର୍ଟ ପିନ୍ଧନ୍ତି ବିଜେତା- ୨୦୧୩ରେ ମହେନ୍ଦ୍ର ସିଂହ ଧୋନୀଙ୍କ ନେତୃତ୍ବରେ ଭାରତ ଚମ୍ପିଅନ୍ସ ଟ୍ରଫି ଜିତିଥିଲା । ବିଜୟ ସେଲିବ୍ରେସନ ସହିତ ଭାରତୀୟ ଦଳ ଧଳା ଜ୍ୟାକେଟ ପିନ୍ଧିଥିଲେ । ଏହା ପଛରେ କିଛି ବିଶେଷ କାରଣ ରହିଛି । ଆଇସିସି ଅନୁସାରେ ଚମ୍ପିଅନ୍ସଙ୍କ ଦ୍ବାରା ପିନ୍ଧାଯାଉଥିବା ଧଳା କୋର୍ଟ ସମ୍ମାନର ପ୍ରତୀକ ହୋଇଥାଏ । ବିଜୟ ଯାତ୍ରାକୁ ଦର୍ଶାଇଥାଏ ଧଳା ଜ୍ୟାକେଟ । ଚମ୍ପିଅନ୍ସ ଟ୍ରଫିର ସବୁ ମ୍ୟାଚର ମହତ୍ତ୍ବ ରହିଛି । ଟପ୍ ୮ଟି ଦଳ ମଧ୍ୟରେ ମ୍ୟାଚ ଖେଳାଯାଏ । ଟ୍ରଫି ଜିତିବାକୁ ଚମ୍ପିଅନ୍ସ ପରି ଖେଳିଥାନ୍ତି ଦଳ । ଧଳା କୋର୍ଟ ବିଜୟର ସଂଘର୍ଷକୁ ଦର୍ଶାଇଥାଏ । ଏହା ବ୍ୟତୀତ ଧଳା କୋର୍ଟ ଖେଳାଳିଙ୍କ ପରିଶ୍ରମକୁ ସମ୍ମାନ ଦେଇଥାଏ । ବିଜେତାଙ୍କୁ ଅଲଗା ଅନନ୍ୟ ପରିଚୟ ଦେଇଥାଏ । ଦର୍ଶକ ଓ ପ୍ରଶଂସକଙ୍କୁ ମନେ ପକାଇଦିଏ ଯେ କେଉଁ ଦଳ ଏହି ପ୍ରତିଷ୍ଠିତ ଟ୍ରଫି ଜିତିଛି । ଧଳା କୋର୍ଟର ଏହି ପରମ୍ପରା ବିଜୟୀ ଦଳକୁ ଅନ୍ୟ ଟିମଠୁ ଅଲଗା ପରିଚୟ ଦେଇଥାଏ । ଧଳା କୋର୍ଟ କେବଳ ପରମ୍ପରାର ଅଂଶ ନୁହେଁ ଏହା ମାର୍କେଟିଂ ମଧ୍ୟ କରିଥାଏ । ଯେବେ ବିଜେତା ଦଳ ଧଳା କୋର୍ଟ ପିନ୍ଧି ଫଟୋ ଉଠାଇଥାନ୍ତି । ଏହା ଫ୍ୟାନ୍ସଙ୍କ ହୃଦୟରେ ଜୀବନ୍ତ ହୋଇ ରହିଥାଏ । ଲୋକପ୍ରିୟାତ ବଢିଥାଏ । ଫଳରେ ଟୁର୍ଣ୍ଣାମେଣ୍ଟର ମହତ୍ତ୍ବ ବଢିଯାଏ । ଆଇସିସିର ରୋଜଗାର ବଢେ ।
ଚମ୍ପିଅନ୍ସ ଟ୍ରଫି ଭଳି ବଡ ଟୁର୍ଣ୍ଣାମେଣ୍ଟ ଜିତିବାକୁ ଖେଳାଳୀଙ୍କୁ ବହୁତ ପରିଶ୍ରମ କରିବାକୁ ପଡିଥାଏ । ଅନୁଶାସନ ପାଳନ କିରବାକୁ ପଡିଥାଏ । ଧଳା କୋର୍ଟ ତାଙ୍କ ପ୍ରୟାସ ଏବଂ ବଳିଦାନର ପ୍ରତୀକ ହୋଇଥାଏ । ତାଙ୍କ ପରିଶ୍ରମର ଫଳ ତାଙ୍କୁ ମିଳିଥିବା ମନେ ପକାଇଥାଏ । ଟ୍ରଫି ବୋର୍ଡ କାର୍ଯ୍ୟାଳୟରେ ରହିଥାଏ ମାତ୍ର ଧଳା କୋର୍ଟ ସର୍ବଦା ପ୍ଲେୟାରଙ୍କ ପାଖରେ ରହିଥାଏ । ୧୯୯୮ରୁ ଆଇସିସି ଚମ୍ପିଅନ୍ସ ଟ୍ରଫି ଆରମ୍ଭ ହୋଇଥିଲା । ଧଳା କୋର୍ଟ ପରମ୍ପରା ୨୦୦୯ରୁ ଆରମ୍ଭ ହୋଇଥିଲା।
