ଭୁବନେଶ୍ୱର,୦୭/୦୨: ଜଙ୍ଗଲଜମି ଏବଂ ସରକାରୀ ଜମିକୁ ଜବରଦଖଲ କରି ପ୍ରଶାସନର ନାକ ତଳେ ଦୀର୍ଘ ବର୍ଷରୁ ବେଆଇନ ଭାବରେ ଚାଲୁଥିଲା ପିଚୁପ୍ଲାଣ୍ଟ । ଅଞ୍ଚଳବାସୀ ବାରମ୍ବାର ଅଭିଯୋଗ କରିଥିଲେ ମଧ୍ୟ ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ନେଉ ନଥିଲା । ହେଲେ ଗଣମାଧ୍ୟମରେ ବାରମ୍ବାର ଖବର ପ୍ରସାରଣ ପରେ ଚେତିଲା ପ୍ରଶାସନ । ଶେଷରେ ପିଚୁ ପ୍ଲାଣ୍ଟରେ ଚଢ଼ାଉ କରି ସିଲ୍ କଲା ରାଜସ୍ୱ ବିଭାଗ । କଳାହାଣ୍ଡି ଜିଲ୍ଲା ଭବାନୀପାଟଣା ତହସିଲ ଅନ୍ତର୍ଗତ ଦେପୁର ପଞ୍ଚାୟତରେ ଏଭଳି ଘଟଣା ଘିଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ବାନୀପାଟଣା ତହସିଲ ଅନ୍ତର୍ଗତ ଦେପୁର ପଞ୍ଚାୟତ ଛତିଗୁଡାରେ ଦୀର୍ଘ ବର୍ଷରୁ ଜଣେ ବ୍ୟକ୍ତି ଜଙ୍ଗଲ ଜମି ଏବଂ ଜଣେ ଅନୁସୂଚିତ ଜନଜାତି ସମ୍ପ୍ରଦାୟର ବ୍ୟକ୍ତିଙ୍କ ଜମିକୁ ଜବର ଦଖଲ କରି ବିନା କାଗଜପତ୍ରରେ ଏବଂ ପ୍ରଦୂଷଣ ବୋର୍ଡର ବିନା ଅନୁମତିରେ ପିଚୁପ୍ଲାଣ୍ଟ କରିଥିଲେ । ଏହି ପିଚୁପ୍ଲାଣ୍ଟରୁ ନିର୍ଗତ ଧୂଆଁ ପାଇଁ କପା, ଧାନ, ପନିପରିବା ଚାଷ ନଷ୍ଟ ହେବା ସହିତ ଅନେକ ଲୋକ ଶ୍ୱାସ ଜନିତ ରୋଗରେ ଆକ୍ରାନ୍ତ ହେଉଥିଲେ । ତେବେ ଏହି ପିଚୁପ୍ଲାଣ୍ଟ ପାଇଁ ଅଞ୍ଚଳବାସୀ ଅତିଷ୍ଠ ହୋଇ ପ୍ରଶାସନ ପାଖରେ ବାରମ୍ବାର ଅଭିଯୋଗ କରିଥିଲେ ମଧ୍ୟ ପ୍ରଶାସନ ପିଚୁପ୍ଲାଣ୍ଟ ବିରୁଦ୍ଧରେ କୌଣସି କାର୍ଯାନୁଷ୍ଠାନ ନେଉ ନ ଥିଲା । ଗ୍ରାମବାସୀଙ୍କ ବାରମ୍ୱାର ଅଭିଯୋଗ ପରେ ଗଣମାଧ୍ୟମରେ ବାରମ୍ବାର ଖବର ପ୍ରସାରଣ ହୋଇଥିଲା । ଶେଷରେ ପିଚୁପ୍ଲାଣ୍ଟ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ ବାଧ୍ୟ ହୋଇ ଶୁକ୍ରବାର ଭବାନୀପାଟଣା ତହସିଲଦାର, ଜିଲ୍ଲା ମାଇନିଙ୍ଗ ଅଧିକାରୀ ଏବଂ ପୋଲିସ ପ୍ଲାଣ୍ଟରେ ଚଢ଼ାଉ କରି ସିଲ୍ କରିଛନ୍ତି । ତେବେ ପିଚୁପ୍ଲାଣ୍ଟ ପାଇଁ ଆବଶ୍ୟକ କାଗଜପତ୍ର ନଥିବା ଯୋଗୁଁ ପିଚୁପ୍ଲାଣ୍ଟକୁ ସିଲ୍ କରା ଯାଇଛି ବୋଲି ଭବାନୀପାଟଣା ତହସିଲଦାର କହିଛନ୍ତି ।
