ହାଇଦ୍ରାବାଦ: ବୁଧବାର ହାଇଦ୍ରାବାଦର ଏକ ସିନେମା ହଲ୍ ସାମ୍ନାରେ ହୋଇଥିବା ଦଳାଚକଟା ଏବଂ ଏଥିରେ ଜଣେ ମହିଳାଙ୍କ ମୃତ୍ୟୁ ମାମଲାରେ ସାଉଥ୍ ସୁପର ଷ୍ଟାର ଅଲ୍ଲୁ ଅର୍ଜୁନଙ୍କ ଅଡ଼ୁଆ ବଢ଼ିଛି । ଆଜି ରିଲିଜ୍ ହୋଇଥିବା ହାଇ ଭୋଲଟେଜ୍ ଫିଲ୍ମ ‘ପୁଷ୍ପା-୨’ର ପ୍ରିମିୟର ବେଳେ ଏହି ଦଳଚକଟା ହୋଇଥିଲା । ପ୍ରିମିୟରରେ ଅଲ୍ଲୁ ଅର୍ଜୁନ୍ ସାମିଲ ହେବେ ବୋଲି ପୋଲିସ ପାଖରେ କୌଣସି ସୂଚନା ନଥିଲା । ହେଲେ ପ୍ରିମିୟରରେ ଅଲ୍ଲୁ ଅର୍ଜୁନ ହଠାତ ଆସିଯିବାରୁ ଭିଡ଼ ବଢ଼ିଥିଲା ଏବଂ ଦଳଚକଟା ହୋଇଥିଲା । ଏଥିପାଇଁ ପୁଷ୍ପା-୨ ଷ୍ଟାର ଅଲ୍ଲୁ ଅର୍ଜୁନଙ୍କ ବିରୋଧରେ ମାମଲା ରୁଜୁ ହେବ ବୋଲି ହାଇଦ୍ରାବାଦ ପୋଲିସ ପକ୍ଷରୁ ସୂଚନା ମିଳିଛି ।
ଏନେଇ ଅଲ୍ଲୁ ଅର୍ଜୁନଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ । ହାଇଦ୍ରାବାଦ ପୋଲିସ କମିଶନର ସିଭି ଆନନ୍ଦ କହିଛନ୍ତି, ପ୍ରିମିୟରରେ ଅଲ୍ଲୁ ଅର୍ଜୁନ ଯୋଗ ଦେବେ ବୋଲି ସିନେମା ହଲ୍ କର୍ତ୍ତୃପକ୍ଷ କିମ୍ବା ଅଭିନେତାଙ୍କ ପକ୍ଷରୁ ଆଗୁଆ ସୂଚନା ଦିଆଯାଇ ନଥିଲା । ଏପରିକି ସିନେମା ହଲ୍ ଭିତରକୁ ପଶିବା କିମ୍ବା ବାହାରିବା ଲାଗି କୌଣସି ସୁତନ୍ତ୍ର ବ୍ୟବସ୍ଥା ହୋଇନଥିଲା । ହଠାତ ଅଭିନେତା ହଲ୍ରେ ପହଞ୍ଚିବା ପରେ ଦଳଚକଟା ପରିସ୍ଥିତି ସୃଷ୍ଟି ହୋଇଥିଲା । ଏଥିରେ ଜଣେ ୩୫ ବର୍ଷୀୟା ମହିଳା ଅଣ ନିଃଶ୍ବାସୀ ହୋଇ ମୃତ୍ୟୁବରଣ କରିଥିବା ବେଳେ ତାଙ୍କ ପୁଅ ଗୁରୁତର ହୋଇଛନ୍ତି ।’
ପୋଲିସର ସୂଚନା ଅନୁସାରେ, ଅଲ୍ଲୁ ଅର୍ଜୁନ ହଲରେ ରାତି ପ୍ରାୟ ୯.୩୦ରେ ପହଞ୍ଚିଥିଲେ । ଏହି ସମୟରେ ଶତାଧିକ ଫ୍ୟାନ ତାଙ୍କର ଟିକେ ଝଲକ ପାଇବାକୁ ହଲ୍ ଭିତରକୁ ଧସେଇ ପଶିଥିଲେ । ଏହା ପରେ ଅଭିନେତାଙ୍କ ବ୍ୟକ୍ତିଗତ ସୁରକ୍ଷା କର୍ମୀ ଲୋକମାନଙ୍କୁ ପଛକୁ ଠେଲିବାରୁ ସ୍ଥିତି ଅଣାୟତ୍ତ ହୋଇଥିଲା । ଅଭିନେତା ଏବଂ ତାଙ୍କ ସୁରକ୍ଷା କର୍ମୀ ହଲ୍ର ତଳ ବାଲକୋନିକୁ ପଶିଥିଲେ । ସେଠାରେ ଥିବା ରେବତୀ ନାମକ ମହିଳା ଏବଂ ତାଙ୍କ ପୁଅ ତେଜା ଭୀଷଣ ଭିଡ଼ ଭିତରେ ଅଣ ନିଃଶ୍ବାସୀ ଅନୁଭବ କରିଥିଲେ । ପୋଲିସ ସେମାନଙ୍କୁ ବାହାରକୁ ଆଣି ସିପିଆର ଦେଇଥିଲା ଏବଂ ହସ୍ପିଟାଲ ନେଇଥିଲା । କିନ୍ତୁ ରେବତୀଙ୍କୁ ଡାକ୍ତର ମୃତ ଘୋଷଣା କରିଥିଲେ । ତାଙ୍କ ପୁଅ ଗୁରୁତର ଥିବାରୁ ତାଙ୍କୁ ଅନ୍ୟ ହସ୍ପିଟାଲକୁ ସ୍ଥାନନ୍ତର କରାଯାଇଛି ବୋଲି ପୋଲିସ କହିଛି ।
ସେପଟେ ମୃତ ମହିଳାଙ୍କ ପକ୍ଷରୁ ଅଭିଯୋଗ ହେବା ପରେ ଭାରତୀୟ ନ୍ୟାୟ ସଂହିତା ଆଧାରରେ ବିଭିନ୍ନ ମାମଲା ରୁଜୁ ହୋଇଛି । ଘଟଣା ପାଇଁ ଯେଉଁମାନେ ଦାୟୀ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ହେବ ବୋଲି ପୋଲିସ କହିଛି । ଏସବୁ ଭତରେ ପ୍ରଯୋଜନା ସଂସ୍ଥା ମୃତ ରେବତୀଙ୍କ ପାଇଁ ଶୋକ ପ୍ରକାଶ କରିବା ସହ ତାଙ୍କ ପରିବାରକୁ ସବୁ ପ୍ରକାର ସହାୟତା ଦେବାକୁ ପ୍ରତିଶ୍ରୁତି ଦେଇଛି ।
