କାମାକ୍ଷାନଗର,୦୩/୧୦: ସ୍ତ୍ରୀକୁ ଦୁର୍ବ୍ୟବହାର କରିବାରୁ ବିରୋଧ କରିଲେ ସ୍ୱାମୀ । ପ୍ରତିବାଦ କରିବାରୁ ସ୍ତ୍ରୀ ସମ୍ମୁଖରେ ସ୍ୱାମୀକୁ ପଥରରେ ଛେଚି ହତ୍ୟା କଲେ ୩ ଦୁର୍ବୃତ୍ତ । ୩ ଅଭିଯୁକ୍ତ ରୁପାବେଡା ଜୁଆଙ୍ଗ ସାହିର ଗ୍ରାମର ଦିପୁ, ଶଙ୍କର ଓ ବିଟଲ ବୋଲି ଜଣାପଡ଼ିଛି । ମୃତକ ରୁପାବେଡା ଗ୍ରାମର ଗଗନ ନାୟକ ବୋଲି ଜଣାପଡ଼ିଛି । ଢେଙ୍କାନାଳ ଜିଲ୍ଲା କାମାକ୍ଷାନଗର ବ୍ଲକ ଅନ୍ତର୍ଗତ କଙ୍କଡାହାଡ ଥାନା ରୁପାବେଡା ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୂତାବକ, ବୁଧବାର ସନ୍ଧ୍ୟା ସମୟରେ ଗଗନ ଓ ତାଙ୍କ ସ୍ତ୍ରୀ କାମ ସାରି କଙ୍କଡାହାଡରୁ ଫେରୁଥିଲେ । ଏହି ସମୟରେ ଜୁଆଙ୍ଗ ସାହିର ୩ ଜଣ ଯୁବକ ତାଙ୍କ ସ୍ତ୍ରୀକୁ ଟଣା ଓଟରା କରିଥିଲେ । ଏହାକୁ ଗଗନ ବିରୋଧ କରିବାରୁ ତିନି ଯୁବକ ଗଗନକୁ ନିସ୍ତୁକ ମାଡ ମାରିବା ସହ ମୁଣ୍ଡର ପଛପଟେ ପଥର ଛେଚି ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ । ଏହି ଦୁର୍ଘଟଣାରେ ଗୁରୁତର ହୋଇପଡ଼ିଥିଲେ ଗଗନ । ଏହା ଦେଖି ତାଙ୍କ ସ୍ତ୍ରୀ କିଛି ସ୍ଥାନୀୟଲୋକଙ୍କ ସାହାୟତାରେ ଗଗନକୁ କଙ୍କଡାହାଡ ମେଡିକାଲରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଏହି ଘଟଣା ସମ୍ବନ୍ଧରେ ପୋଲିସକୁ ଖବର ଦେଇଥିଲେ ମୃତକଙ୍କ ସ୍ତ୍ରୀ । ଖବରପାଇ କଙ୍କଡାହାଡ ପୋଲିସ ମେଡିକାଲରେ ପହଞ୍ଚି ମୃତଦେହ ଜବତ କରିଛି । ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଗୁରୁବାର କାମାକ୍ଷାନଗର ମେଡିକାଲକୁ ପଠାଇବା ସହ ଅଧିକ ତଦନ୍ତ ଜାରି ରଖିଛି । ଅନ୍ୟପଟେ ଗଗନଙ୍କୁ ହତ୍ୟାକରି ତିନି ଅଭିଯୁକ୍ତ ଫେରାର ଅଛନ୍ତି ।
