ଭୁବନ,୦୩/୧୦: ପାରିବାରିକ କଳହ ନେଲା ଜୀବନ । ଅଧା ରାତିରେ ସ୍ତ୍ରୀକୁ ହତ୍ୟା କରି କୂଅରେ ପକାଇଲା ନୃଶଂସ ସ୍ବାମୀ । ମୃତ ମହିଳା ଜଣକ ବାସନ୍ତି ରାଉତ ବୋଲି ଜଣାପଡ଼ିଛି । ଏହି ଘଟଣାରେ ମହିଳାଙ୍କ ସ୍ୱାମୀ ଦୁଃଖବନ୍ଧୁ ରାଉତକୁ ଅଟକ ରଖିଛି ପୋଲିସ । ଢେଙ୍କାନାଳ ଜିଲ୍ଲା ଭୁବନ ଥାନା ଅନ୍ତର୍ଗତ ବାଲିବୋ ଗ୍ରାମ ମଝିସାହିରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଝିସାହିର ଦୁଃଖବନ୍ଧୁ ରାଉତ ବାର ବର୍ଷ ପୂର୍ବେ କେନ୍ଦୁଝର ଜିଲ୍ଲା ଘସିପୁରା ଥାନା ଅନ୍ତର୍ଗତ କଅଁସ ଗ୍ରାମର ଅନାମ ଚରଣ ସାହୁଙ୍କୁ ଝିଅ ବାସନ୍ତିଙ୍କୁ ଦ୍ବିତୀୟ ବିବାହ କରିଥିଲେ । ବିବାହର ବାର ବର୍ଷ ବିତି ଯାଇଥିଲେ ବି ତାଙ୍କର କୌଣସି ସନ୍ତାନ ନଥିଲେ । ସ୍ବାମୀ ଦୁଃଖବନ୍ଧୁ ପ୍ରତିଦିନ ମଦ୍ୟପାନ ଓ ଗଞ୍ଜେଇ ଟାଣି ସ୍ତ୍ରୀଙ୍କ ସହିତ ଝଗଡା କରୁଥିଲେ । କିନ୍ତୁ ବୁଧବାର ରାତିରେ ସ୍ବାମୀ-ସ୍ତ୍ରୀଙ୍କ ଝଗଡା ଚରମ ସୀମାରେ ପହଞ୍ଚିଥିଲା । ନିଜ ସ୍ତ୍ରୀକୁ ହତ୍ୟା କରି କୂଅରେ ଫିଙ୍ଗି ଦେଲା ନୃଶଂସ ସ୍ୱାମୀ । ଏହା ଦେଖି ତାଙ୍କ ପରିବାର ଲୋକେ ତୁରନ୍ତ ଭୁବନ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ସ୍ବାମୀ ଦୁଃଖବନ୍ଧୁଙ୍କ ଅଟକ ରଖି ଅଗ୍ନିଶମବାହିନୀକୁ ଖବର କରିଥିଲେ । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ମହିଳାଙ୍କ ମୃତଦେହକୁ କୂଅରୁ ଉଦ୍ଧାର କରିଛି । ଏହା ସହ ମୃତଦେହକୁ ବ୍ୟବଚ୍ଛେଦ ପାଇଁ ଭୁବନ ମେଡିକାଲକୁ ପଠାଇଛି ପୋଲିସ । ଏଥି ସହିତ ଘଟଣାର ତଦନ୍ତ ଚଳାଇଛି ପୋଲିସ ।
ତେବେ ମୃତ ମହିଳାଙ୍କ ବାପଘର ଲୋକେ ଭୁବନ ଥାନାରେ ହତ୍ୟା ମାମଲା ରୁଜୁ କରିଥିବା ଜଣାପଡିଛି । ଘଟଣାସ୍ଥଳରେ ସାଇଣ୍ଟିଫିକ ଦଳକୁ ତଦନ୍ତ କରିବାକୁ ଯାଇଥିବା ନେଇ ଭୁବନ ପୋଲିସ ପକ୍ଷରୁ ଖବର ମିଳିଛି ।
