ଢେଙ୍କାନାଳ,୧୦/୧୦: ଢେଙ୍କାନାଳ ସହର ମହିଷାପାଟ ୫୫ ନମ୍ବର ଜାତୀୟ ରାଜପଥ କଡ଼ରେ ନିର୍ମାଣାଧୀନ ପାଞ୍ଚ ମହଲା କୋଠାର ଛାତ ଓ ଖମ୍ବ ଭୁଶୁଡ଼ି ପଡ଼ିଛି । ଏଥିରେ ଜଣେ ଶ୍ରମିକଙ୍କର ମୃତ୍ୟୁ ଘଟିଥବା ବେଳେ ୨ ଜଣ ଗୁରୁତର ହୋଇଛନ୍ତି । ମୃତକ ହେଲେ ସୁଧାଂଶୁ ରାଉତ (୩୫) ଏବଂ ଗୁରୁତର ଦ୍ୱୟ ହେଲେ ସମରେନ୍ଦ୍ର ରାଉତ ଓ କୈଳାସ ଚନ୍ଦ୍ର ରାଉତ । ସମସ୍ତଙ୍କ ଘର ଢେଙ୍କାନାଳ ସଦର ଥାନା ଖୁଣ୍ଟୁଝରି ଗାଁରେ । ଗୁରୁତର ଶ୍ରମିକଦ୍ୱୟଙ୍କୁ କଟକ ସ୍ଥାନାନ୍ତର କରାଯାଇଛି । ସେମାନଙ୍କ ମଧ୍ୟରୁ କୈଳାସଙ୍କ ୨ଟି ଯାକ ହାତ ଅଧାରୁ ଛିଡ଼ି ପଡ଼ିଛି । ଏକାଧିକ ଶ୍ରମିକ କଂକ୍ରିଟ୍ ତଳେ ଚାପି ହୋଇ ରହିଥିବା ଆଶଙ୍କା କରାଯାଉଛି ।
ପୁଲିସ ଓ ପ୍ରାଶାସନିକ ଅଧିକାରୀ ଘଟଣାସ୍ଥଳରେ ରହିଥିବା ବେଳେ ଏନ୍ଡିଆର୍ଏଫ୍, ଓଡ୍ରାଫ୍, ଅଗ୍ନିଶମ ବାହିନୀ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଏନ୍ଡିଆର୍ଏଫ୍ର ସନ୍ଧାନୀ କୁକୁର ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ ରହିଛି । ସୂଚନା ଅନୁସାରେ, ଢେଙ୍କାନାଳ ସହରର ଜଣେ ପ୍ରତିଷ୍ଠିତ ବ୍ୟବସାୟୀ ମହିଷାପାଟଠାରେ ଇଡ୍କୋ ଜମି ଲିଜ୍ରେ ନେଇ ପ୍ରାୟ ୪ ବର୍ଷ ହେଲା ଏକ ହୋଟେଲ୍ କୋଠା ନିର୍ମାଣ କରୁଛନ୍ତି । ହୋଟେଲର ସମ୍ମୁଖ ଭାଗର ଡିଜାଇନ୍ ଅନୁସାରେ ୪ଟି ସୁଉଚ୍ଚ ଖମ୍ବ ସହ ୨ ମହଲାରୁ ଛାତ ପଡ଼ୁଥିଲା । ଅପରାହ୍ଣ ବେଳକୁ ପ୍ରାୟତଃ ଛାତ ପଡ଼ିସାରିଥିଲା । ମାତ୍ର ସାଢ଼େ ୪ଟା ବେଳେ ପିଲାର ଭାଙ୍ଗିବା ପରି ଶବ୍ଦ ହୋଇଥିଲା । କାର୍ଯ୍ୟରେ ନିୟୋଜିତ ୨୦ରୁ ଉଦ୍ଧ୍ୱର୍ ଶ୍ରମିକଙ୍କ ମଧ୍ୟରୁ ଅନେକ ତଳକୁ ଡେଇଁପଡ଼ିଥିଲେ । ମାତ୍ର ଛାତ ତଳ ଭାଗରେ ରହିଥିବା ଏବଂ ଉପରେ ରହିଥିବା କିଛି ଶ୍ରମିକ ବାହାରି ପାରିନଥିଲେ । ଖମ୍ବ ମୂଳରୁ ଭାଙ୍ଗିଯିବା ସହ ଛାତ ଭୁଶୁଡ଼ି ପଡ଼ିଥିଲା ।
ଜିଲ୍ଲାପାଳ ସୌମେଶ କୁମାର ଉପାଧ୍ୟାୟ, ଏସ୍ପି ଅଭିନବ ସୋନକର, ଅତିରିକ୍ତ ଜିଲ୍ଲାପାଳ ରମେଶ ଚନ୍ଦ୍ର ସେଠୀଙ୍କ ସମେତ ପ୍ରାଶାସନିକ ଅଧିକାରୀ ଓ ପୁଲିସ ଅଧିକାରୀ ଉଦ୍ଧାର କାର୍ଯ୍ୟ ପରିଚାଳନା କରୁଛନ୍ତି । ଆବଶ୍ୟକ ସୁରକ୍ଷା ବ୍ୟବସ୍ଥା ଓ ଅନୁମତି ନେଇ କାମ ହେଉଥିଲା କି ନାହିଁ ତାହା ତଦନ୍ତ ପରେ ଜଣାପଡ଼ିବ ବୋଲି ପ୍ରଶାସନ ପକ୍ଷରୁ କୁହାଯାଇଛି ।
