ସମ୍ବଲପୁର, ୨୭/୦୭: ହୀରାକୁଦ ଜଳଭଣ୍ଡାରର ଜଳସ୍ତର ଦ୍ରୁତଗତିରେ ବଢୁଛି । ୪ ଦିନରେ ଜଳସ୍ତର ୧୦ ଫୁଟ୍ ବୃଦ୍ଧି ପାଇଥିବାବେଳେ ଗତ ୧୫ ଘଣ୍ଟା ମଧ୍ୟରେ ଅଢ଼େଇ ଫୁଟ୍ ବଢ଼ିଲାଣି । ଆଉ ଦିନକ ପରେ ଅର୍ଥାତ ଆସନ୍ତା ୨୮ ତାରିଖରେ ଚଳିତବର୍ଷର ପ୍ରଥମ ବନ୍ୟାଜଳ ନିଷ୍କାସନ ହେବାକୁ ଥିବା ବେଳେ ଉକ୍ତଦିନ ସୁଦ୍ଧା ଜଳସ୍ତର ୬୧୭ ଫୁଟ୍ ଛୁଇଁବାର ସମ୍ଭାବନା ରହିଛି ।
ଲଘୁଚାପ ଯୋଗୁଁ ହୀରାକୁଦର ଉପରମୁଣ୍ଡ ଛତିଶଗଡ଼ରେ ଲଗାଣ ବର୍ଷା ଜାରି ରହିଛି । ବର୍ଷାର ପରିମାଣ କମିଥିଲେ ହେଁ ପୂରା ଛାଡ଼ିନାହିଁ । ଗତ ୨୪ ଘଣ୍ଟାରେ ଉପରମୁଣ୍ଡରେ ହାରାହାରି ୨୯.୦୯ ମିମି ବର୍ଷା ରେକର୍ଡ କରାଯାଇଛି । ଶୁକ୍ରବାର ସକାଳ ୯ଟା ସୁଦ୍ଧା ଜଳଭଣ୍ଡାରକୁ ୨ ଲକ୍ଷ ୪୪ ହଜାର ୨୧୯ କ୍ୟୁସେକ୍ ଜଳ ପ୍ରବେଶ କରୁଥିବା ବେଳେ ରାତି ୯ଟା ସୁଦ୍ଧା ୨ ଲକ୍ଷ ୩୧ ହଜାର ୬୯୩ କ୍ୟୁସେକ୍ ଜଳ ପ୍ରବେଶ କରୁଛି । ସେହିପରି ଜଳସ୍ତର ସକାଳ ୬ଟା ସୁଦ୍ଧା ୬୦୮.୫୮ ଫୁଟ୍ ଥିବା ବେଳେ ରାତି ୯ଟା ସୁଦ୍ଧା ୬୧୧.୧୯ ଫୁଟ୍ରେ ପହଞ୍ଚିଛି ।
ଅପରପକ୍ଷେ, ବିଭିନ୍ନ କେନାଲ, ପାୱାର୍ ଚ୍ୟାନେଲ ଏବଂ ଶିଳ୍ପ ଜଳଯୋଗାଣ ମିଶି ମୋଟ୍ ୩୯ ହଜାର ୧୦୯ କ୍ୟୁସେକ୍ ଜଳ ନିଷ୍କାସିତ ହେଉଛି । ୨୮ ତାରିଖ ଗେଟ୍ ଖୋଲିବା ପୂର୍ବରୁ ଜଳସ୍ତର ୬୧୭ ଫୁଟ୍ ଛୁଇଁପାରେ ବୋଲି ଆକଳନ କରାଯାଉଛି ।
