ଚୌଦ୍ୱାର, ୨୧/୦୧: ଅଜଣା ଗାଡ଼ିକୁ ପଛପଟୁ ଧକ୍କା ଦେଲା ଡାଲା ଅଟୋ । ଅଟୋ ଭିତରେ ଚାପି ହୋଇ ଚାଲିଗଲା ହେଲ୍ପର୍ର ଜୀବନ । ମୃତକଙ୍କ ପରିଚୟ ଅସ୍ପଷ୍ଟ ରହିଥିବା ବେଳେ ଘଟଣା ସ୍ଥଳରୁ ଅଟୋ ଡ୍ରାଇଭର ଫେରାର୍ ହୋଇଛି । କଟକ ଜିଲ୍ଲା ଚୌଦ୍ୱାର ଅଞ୍ଚଳର ଟୋଲ୍ ଗେଟ୍ ନିକଟରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ମଙ୍ଗଳବାର ସକାଳୁ ଛତିଆରୁ କଟକ ଅଭିମୁଖେ ଏକ ଡାଲା ଅଟୋ ଆସୁଥିଲା । ଟୋଲ୍ ଗୋଟ୍ ନିକଟରେ ଏକ ଅଜଣା ଗାଡ଼ିକୁ ଧକ୍କା ଦେଇଥିଲା । ଫଳରେ ଡାଲା ଅଟୋ ଭିତରେ ଥିବା ହେଲ୍ପର ଚାପି ହୋଇ ପ୍ରାଣ ହରାଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ରାଜପଥ ପୋଲିସ ପହଞ୍ଚି ଚୌଦ୍ବାର ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀର ଏକ ଟିମ୍ ଘଟଣା ସ୍ଥଳରେ ପହଞ୍ଚି ଅଟୋର ଆଗ ଅଂଶ କାଟି ହେଲ୍ପର ଜଣକୁ ଉଦ୍ଧାର କରିଥିଲେ । ଏହା ପରେ ଶବ ବ୍ୟବଚ୍ଛେଦ ପାଇଁ କଟକ ବଡ଼ ମେଡ଼ିକାଲକୁ ପଠାଇଛି ପୋଲିସ । ଘଟଣା ସ୍ଥଳରୁ ଡାଲା ଅଟୋର ଚାଳକ ଫେରାର ହୋଇଯାଇ ଥିବା ବେଳେ ପୋଲିସ ଘଟଣାର ତଦନ୍ତ ଜାରି ରଖିଛି।
