କଟକ ୧୯/୦୫: କଟକରେ କାଳବୈଶାଖୀ ପ୍ରଭାବରେ ବର୍ଷା ଜାରି। ଘଡ଼ଘଡ଼ି ସହ ପ୍ରବଳ ବର୍ଷାରେ ବେହାଲ ହୋଇଛି କଟକ ସହର। ପ୍ରବଳ ବର୍ଷା ପାଇଁ ତଳିଆ ଅଞ୍ଚଳରେ ବର୍ଷା ପାଣି ଜମି ରହିଛି । ପ୍ରବଳ ବର୍ଷା ଯୋଗୁ ଜୀବନ ଯାତ୍ରା ପ୍ରଭାବିତ ହୋଇଛି । ଗତ କିଛି ଦିନ ଧରି କଟକରେ ଅସହ୍ୟ ଗରମ ଓ ଗୁଳୁଗୁଳି ଅନୁଭୁତ ହେଉଥିଲା।
ଆଜିର କାଳବୈଶାଖୀ ବର୍ଷା ଜନଜୀବନକୁ ଆଶ୍ବସ୍ତ କରିଛି । ପ୍ରାୟ ୧ ଘଣ୍ଟା ଧରି ହୋଇଥିବା ବର୍ଷାରେ କାଜିବଜାର, ଗଙ୍ଗା ମନ୍ଦିର, ଗହ୍ମାଡିଆ, କେଶରପୁର, ପଟ୍ଟାପୋଲ, ତୁଳସୀପୁର, ଦେଉଳସାହି, ବିଡାନାସୀ ସମେତ ବିଭିନ୍ନ ସାହି ବସ୍ତିରେ ବର୍ଷା ଜଳ ଜମି ରହିଛି । ସ୍ଥିତିକୁ ଦେଖି କିଛି ସ୍ଥାନରେ କଟକ ମହାନଗର ନିଗମ ତରଫରୁ ପମ୍ପ ମାଧ୍ୟମରେ ବର୍ଷା ଜଳ ନିସ୍କାସନ କରାଯାଉଛି। ଅନ୍ୟପକ୍ଷରେ ଆଗକୁ ବର୍ଷା ଋତୁକୁ ଦୃଷ୍ଟିରେ ରଖି ବର୍ତ୍ତମାନ ସହରରେ ସିଏମସି ତରଫରୁ ପଙ୍କୋଦ୍ଧାର କାମ ଚାଲିଥିବା ବେଳେ ଆଜି ବର୍ଷା ପରେ ପଙ୍କ ଗୁଡ଼ିକ ପୁଣି ଡ୍ରେନରେ ମିଶିଯାଇଛି।
