ନୂଆଦିଲ୍ଲୀ, ୨୦।୭: ଇଲେକ୍ଟୋରାଲ ବଣ୍ଡ ମାମଲା ପୁଣି ସୁପ୍ରିମକୋର୍ଟରେ ପହଞ୍ଚିଛି । ସ୍ୱେଚ୍ଛାସେବୀ ସଙ୍ଗଠନ କମନ କଜ୍ ଏବଂ ସେଣ୍ଟର ଫର ପବ୍ଲିକ ଇଣ୍ଟରେଷ୍ଟ ଲିଟିଗେସନ (ସିପିଆଇଏଲ) ପକ୍ଷରୁ ସର୍ବୋଚ୍ଚ ଅଦାଲତରେ ଏକ ପିଟିସନ ଫାଇଲ କରାଯାଇଛି । ସେଥିରେ ବିଭିନ୍ନ ଦଳକୁ ଚାନ୍ଦା ନେଣଦେଣର ତଦନ୍ତ ଏସ୍ଆଇଟି ଦ୍ୱାରା କରାଇବା ଏବଂ ବିଭିନ୍ନ ଦଳ ପାଇଥିବା ଚାନ୍ଦା ସେମାନଙ୍କ ଠାରୁ ଫେରାଇବା ଲାଗି ନିର୍ଦ୍ଦେଶ ଦେବାକୁ ଅନୁରୋଧ କରାଯାଇଛି । ସୁପ୍ରିମକୋର୍ଟର ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ଼, ବିଚାରପତି ଜେବି ପାରଦିୱାଲା ଓ ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଆସନ୍ତା ୨୨ ତାରିଖ (ସୋମବାର) ଏହା ଉପରେ ଶୁଣାଣି କରିବେ । ଉଭୟ ସଙ୍ଗଠନ ପକ୍ଷରୁ ଆଡଭୋକେଟ ପ୍ରଶାନ୍ତ ଭୂଷଣ ଏହି ପିଟିସନ ଦାଖଲ କରିଛନ୍ତି । ଏହାକୁ ସୁପ୍ରିମକୋର୍ଟ ବିଚାର ପାଇଁ ଗ୍ରହଣ କରିବା ସହ ଏ ସଂକ୍ରାନ୍ତରେ ପୂର୍ବରୁ ଆଗତ କିଛି ପିଟିସନକୁ ଏକାଠି କରିବାକୁ ଆଦେଶ ଦେଇଛନ୍ତି ।
୨୦୨୪ ମାର୍ଚ୍ଚରେ ଇଲେକ୍ଟୋରାଲ ବଣ୍ଡ ତଥ୍ୟ ସାର୍ବଜନୀନ ହେବା ପରେ ପ୍ରଥମଥର ପାଇଁ ଏହି ପିଟିସନ ଅଣାଯାଇଛି । ଏଥିରେ ମୁଖ୍ୟତଃ ଦୁଇଟି ଦାବି ରଖାଯାଇଛି । ପ୍ରଥମଟି ହେଲା ଇଲେକ୍ଟୋରାଲ ବଣ୍ଡ ମାଧ୍ୟମରେ ବିଭିନ୍ନ କର୍ପୋରେଟ ସଂସ୍ଥା ଓ ରାଜନୈତିକ ଦଳ ଭିତରେ ହୋଇଥିବା ଚାନ୍ଦା ଦିଆନିଆ ଘଟଣାର ଏସ୍ଆଇଟି ତଦନ୍ତ କରାଯାଉ । ଏହି ତଦନ୍ତ ସୁପ୍ରିମକୋର୍ଟଙ୍କର ଜଣେ ଅବସରପ୍ରାପ୍ତ ବିଚାରପତିଙ୍କ ତଦାରଖରେ ହେଉ । ସେହିଭଳି ଦ୍ୱିତୀୟ ଦାବି ହେଉଛି କ୍ଷତିରେ ଚାଲୁଥିବା କିଛି କମ୍ପାନି ଓ କିଛି ନକଲି କମ୍ପାନି ବିଭିନ୍ନ ରାଜନୈତକ ଦଳକୁ ଯେଉଁ ଚାନ୍ଦା ଦେଇଛନ୍ତି ତାକୁ ସେମାନଙ୍କ ଠାରୁ ଅସୁଲ କରାଯାଉ । କାରଣ ଏହି ଅର୍ଥ ଅପରାଧ ଜରିଆରେ ସଂଗ୍ରହ କରାଯାଇଛି ।
ଆବେଦନକାରୀ ଅଭିଯୋଗ କରିଛନ୍ତି କି କିଛି କମ୍ପାନି ନିଜର ଫାଇଦା ଲାଗି ଇଲେକ୍ଟୋରାଲ ବଣ୍ଡ ଜରିଆରେ ରାଜନୈତିକ ଦଳମାନଙ୍କୁ ଚାନ୍ଦା ଦେଇଛନ୍ତି । ସେଥିରେ ସରକାରୀ କାମର ଠିକା ଓ ଲାଇସେନ୍ସ ପାଇବା, କେନ୍ଦ୍ରୀୟ ତଦନ୍ତ ସଂସ୍ଥା (ସିବିଆଇ, ଇଡି ଓ ଆଇଟି)ର ଯାଞ୍ଚରୁ ବଞ୍ଚିବା ଓ ନୀତିରେ ପରିବର୍ତ୍ତନ ଭଳି ଫାଇଦା ରହିଛି । ନିମ୍ନମାନର ଔଷଧ ପ୍ରସ୍ତୁତ କରୁଥିବା କିଛି କମ୍ପାନି ମଧ୍ୟ ଇଲେକ୍ଟୋରାଲ ବଣ୍ଡ କିଣିଛନ୍ତି । ଯାହାକି ଦୁର୍ନୀତି ନିବାରଣ ଆଇନ ୧୯୮୮ର ଉଲ୍ଲଂଘନ । ରାଜନୈତିକ ଦଳମାନେ ସଂଗ୍ରହ କରୁଥିବା ଚାନ୍ଦାରେ ପାରଦର୍ଶିତା ଆଣିବା ଲକ୍ଷ୍ୟରେ କେନ୍ଦ୍ର ସରକାର ୨୦୧୭ରେ ଇଲେକ୍ଟୋରାଲ ବଣ୍ଡ ଯୋଜନା ଆଣିଥିଲେ । ହେଲେ ଏଥିରେ ବ୍ୟାପକ ଅନିୟମିତତା ଅଭିଯୋଗ ହେବା ପରେ ସୁପ୍ରିମକୋର୍ଟ ଗତ ଫେବ୍ରୁଆରୀ ୧୫ ତାରିଖରେ ଏହାକୁ ଅସାମ୍ବିଧାନିକ ବୋଲି କହିବା ସହ ରଦ୍ଦ କରିଦେଇଥିଲେ ।
