ନୂଆଦିଲ୍ଲୀ: ଅଶୋକ ଚନ୍ଦ୍ରା ହୋଇପାରନ୍ତି ପଞ୍ଜାବ ନ୍ୟାସନାଲ ବ୍ୟାଙ୍କର ପରବର୍ତ୍ତୀ ଏମଡି ତଥା ସିଇଓ । ଭାରତ ସରକାର ପଞ୍ଜାବ ନ୍ୟାସନାଲ ବ୍ୟାଙ୍କର ଦାୟିତ୍ବ ଅଶୋକ ଚନ୍ଦ୍ରାଙ୍କୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇପାରନ୍ତି। ଆର୍ଥିକ ସେବା ପ୍ରତିଷ୍ଠାନ ବ୍ୟୁରୋ (FSIB) ତାଙ୍କ ନିଯୁକ୍ତିକୁ ସୁପାରିଶ୍ କରିଛି । ଏହା ସହ ପିଏନବିର ନୂତନ ଏମଡି ତଥା ସିଇଓ ପଦରେ ତାଙ୍କୁ ନିଯୁକ୍ତ କରିବା ପାଇଁ ରାସ୍ତା ସଫା କରିଛି । ଅଶୋକ ଚନ୍ଦ୍ରା ବର୍ତ୍ତମାନ କାନାରା ବ୍ୟାଙ୍କର କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବରେ ନିଯୁକ୍ତ ଅଛନ୍ତି । ସେ ଅତୁଲ କୁମାର ଗୋଏଲଙ୍କ ସ୍ଥାନ ନେବେ, ଯିଏକି ଡିସେମ୍ବର ୩୧, ୨୦୨୪ ରେ ଅବସର ନେବାକୁ ଯାଉଛନ୍ତି ।  

ସୂଚନାଥାଉକି, ସରକାରୀ ବ୍ୟାଙ୍କ ଏବଂ ଆର୍ଥିକ ସଂସ୍ଥାର ନିର୍ଦ୍ଦେଶକ ଚୟନ କରୁଥିବା ସଂସ୍ଥା FSIB ସୋମବାର ଏହି ନିଷ୍ପତ୍ତି ନେଇଛି । ଏଥିପାଇଁ ୧୬ ଜଣ ଆଶାୟୀଙ୍କ ସାକ୍ଷାତକାର ନେଇଥିଲା ସଂସ୍ଥା । ଏନେଇ ସଂସ୍ଥା କହିଛି ଯେ, ସାକ୍ଷାତକାରରେ ତାଙ୍କ ପ୍ରଦର୍ଶନ, ସମଗ୍ର ଅନୁଭବ ଓ ଉପସ୍ଥିତ ମାପଦଣ୍ଡକୁ ଧ୍ୟାନରେ ରଖି ବ୍ୟୁରୋ ପିଏନବିରେ ଏମଡି ଏବଂ ସିଇଓ ପଦ ପାଇଁ ଅଶୋକ ଚନ୍ଦ୍ରାଙ୍କ ନାମରେ ସୁପାରିଶ୍ କରିଛି । ଏଫଏସଆଇବିର ସୁପାରିଶ୍ ଆଧାରରେ ଅନ୍ତିମ ନିର୍ଣ୍ଣୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କ୍ୟାବିନେଟ ନିଯୁକ୍ତି ସମିତି ଦ୍ବାରା ନିଆଯିବ ।