ନୂଆଦିଲ୍ଲୀ, ୨୬।୧: ଶୀତଦିନେ ଅଧିକାଂଶ ଲୋକ ଚା’ ପିଇଥାନ୍ତି । ଚା’ରେ ଅଦା, ତେଜପତ୍ର, ଗୋଲମରିଚ, ଗୁଜୁରାତି ଆଦି ପକାଇଲେ ଏହା ସ୍ୱାସ୍ଥ୍ୟ ପାଇଁ ଫଳପ୍ରଦ ହୋଇଥିବା ବେଳେ ଏହାର ସ୍ୱାଦ ବଢ଼ିଯାଏ । ଡାଲଚିନିକୁ ଆମେ ଗରମ ମସଲା ଭାବେ ତରକାରୀ ଆଦିରେ ବ୍ୟବହାର କରିଥାଉ । ଏହା ଖାଦ୍ୟର ସ୍ୱାଦ ବଢ଼ାଇଥାଏ । କିନ୍ତୁ, ଡାଲଚିନିକୁ ଚା’ରେ ପକାଇ ପିଇଲେ ଏହା ସ୍ୱାସ୍ଥ୍ୟ ପାଇଁ ଖୁବ୍ ଉପକାରୀ । ବିଶେଷ କରି ଏହା ହୃଦୟ ସହିତ ଜଡ଼ିତ ସମସ୍ୟାକୁ ଦୂର କରିଥାଏ । ଏଥିସହିତ ହାଇ ବ୍ଲଡ୍ ପ୍ରେସର, ଥଣ୍ଡା, କାଶ ଭଳି ସମସ୍ୟାରୁ ମଧ୍ୟ ଆରାମ ଦେଇଥାଏ ।
ଡାଲଚିନିରେ ଅନେକ ପ୍ରକାର ପୋଷକ ତତ୍ତ୍ୱ ରହିଛି, ଯେପରି ଭିଟାମିନ୍, ମିନେରାଲ୍ସ ଓ ଆଣ୍ଟି ଅକ୍ସିଡାଣ୍ଟ ଯାହା ଆମ ଶରୀର ଲାଗି ବହୁ ଲାଭଦାୟକ । ଏଥିରେ ସିନେମାଲଡେହାଇଡ୍ ନାମକ ତତ୍ତ୍ୱ ରହିଛି, ଯାହା ଶରୀରେ ଆଭ୍ୟନ୍ତରୀଣ ଭାଗର ଫୁଲାକୁ କମ୍ କରିଥାଏ । ଏଥିସହ ବ୍ଲଡ୍ ପ୍ରେସରକୁ ନିୟନ୍ତ୍ରଣ ରଖିଥାଏ ଓ ହୃଦୟକୁ ସୁସ୍ଥ ରଖିବାରେ ସାହାଯ୍ୟ କରେ ।
ଉଚ୍ଚ ରକ୍ତଚାପରୁ ମୁକ୍ତି ଦିଏ
ଏଥିରେ ଥିବା ପୋଟାସିୟମ୍, କ୍ୟାଲସିୟମ୍ ଓ ମାଗ୍ନେସିୟମ୍ ଭଳି ତତ୍ତ୍ୱ ଉଚ୍ଚ ରକ୍ତଚାପକୁ ନିୟନ୍ତ୍ରଣ ରଖିବାରେ ସହାୟତା କରିଥାଏ । ପ୍ରତିଦିନ ଡାଲଚିନି ଯୁକ୍ତ ଚା’ ପିଇବା ଦ୍ୱାରା ବ୍ଲଡ୍ ପ୍ରେସର ବାଲାନ୍ସ ରହିଥାଏ, ଯାହା ହାଇ ବିପି ସମସ୍ୟାକୁ ହ୍ରାସ କରିଥାଏ ।
ଡାଇବେଟିସ୍ ଆଶଙ୍କା ଦୂର କରେ
ଡାଲଚିନି ଖାଉଥିବା ବ୍ୟକ୍ତିଙ୍କଠାରେ ଡାଇବେଟିସ୍ ଆଶଙ୍କା କମ୍ ରହିଥାଏ । ଏହି ମସଲା ବ୍ଲଡ୍ ସୁଗାରକୁ ନିୟନ୍ତ୍ରଣ ପ୍ରଦାନ କରିବାରେ ସହାୟତା ପ୍ରଦାନ କରିଥାଏ ।
ହୃଦୟକୁ ସୁସ୍ଥ ରଖେ
ଏଥିରେ ଆଣ୍ଟି ଅନଫ୍ଲାମେଟୋରୀ ଓ ଆଣ୍ଟି ଅକ୍ସିଡାଣ୍ଟ ଗୁଣ ରହିଛି । ଯାହା ହୃଦୟକୁ ସୁସ୍ଥ ରଖେ । ଏହା ବ୍ଲଡ୍ ସର୍କୁଲେସନକୁ ସୁଧାରିଥାଏ ଓ ରକ୍ତ ଜମାଟ ବାନ୍ଧିବାକୁ ଦିଏନାହିଁ । ଏହା ହାର୍ଟ ଷ୍ଟ୍ରୋକ୍ ଓ ହୃଦ୍ରୋଗ ଜଡ଼ିତ ସମସ୍ୟାରୁ ମୁକ୍ତି ଦିଏ ।
ପାଚନ କ୍ରିୟା ଠିକ୍ ହୁଏ
ଡାଲଚିନି ସେବନ କରିବା ଦ୍ୱାରା ହଜମ ପ୍ରକ୍ରିୟା ଠିକ୍ ରୁହେ । ପେଟ ସମସ୍ୟା, ଗ୍ୟାସ୍, କାଷ୍ଠକାଠିନ୍ୟ ସମସ୍ୟା ଦୂର କରେ । ଯେଉଁମାନଙ୍କର ପେଟ ସମସ୍ୟା ରହିଛି ସେମାନେ ଡାଲଚିନି ନିହାତି ଖାଇବା ଆବଶ୍ୟକ ।
ଥଣ୍ଡା-କାଶରୁ ମୁକ୍ତି
ଡାଲଚିନି ଯୁକ୍ତ ଚା’ ପିଇବା ଦ୍ୱାରା ଥଣ୍ଡା, କାଶରୁ ମୁକ୍ତି ମିଳେ । ଡାଲଚିନିରେ ଆଣ୍ଟି ବ୍ୟାକ୍ଟେରିଆଲ ଓ ଆଣ୍ଟି ଭାଇରାଲ ଗୁଣ ରହିଛି, ଯାହା ସଂକ୍ରମଣ ସହ ଲଢ଼ିବାରେ ସାହାଯ୍ୟ କରେ ।
