ଭଦ୍ରକ, ୧୮/୩ : ଗତ ମାର୍ଚ୍ଚ ୧୭ତାରିଖରେ ଭଦ୍ରକ ଜିଲ୍ଲା ବାଉଦପୁର ନିକଟସ୍ଥ ରେଳଧାରଣରେ ମୁଣ୍ଡ ଓ ଏକ ହାତ ନ ଥିବା ଜଣେ ଯୁବକଙ୍କ ଶବ ଉଦ୍ଧାର ହୋଇଥିଲା । ଭଦ୍ରକ ରେଳବାଇ ପୋଲିସ ପରିବାର ଲୋକେ ଏ ନେଇ ହତ୍ୟା ଅଭିଯୋଗ କରିଛନ୍ତି I ପାରିପାର୍ଶ୍ବିକ ପରିସ୍ଥିତିକୁ ନେଇ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଭଦ୍ରକ ଟାଉନ ଥାନାରେ ଅଭିଯୋଗ କରିଛନ୍ତି ମୃତକଙ୍କ ପରିବାର। 

ସୂଚନା ଅନୁଯାୟୀ, ସାବରଙ୍ଗ ଥାନା ଅଧୀନସ୍ଥ ବ୍ରହ୍ମପୁର ଗାଁର ନିରଞ୍ଜନ ସାମନ୍ତରାଙ୍କ ପୁଅ ରଞ୍ଜନସାମନ୍ତରା ଭଦ୍ରକ ସହରରେ ଥିବା କନିକା ମେସରେ ରହି ବରପଦା ଇଞ୍ଜିନିୟରିଙ୍ଗ କଲେଜରେ ଡିପ୍ଲୋମା ପାଠ ପଢୁଥିଲେ । ତେବେ ଗତ ୧୬ତାରିଖ ରାତିରୁ ରଞ୍ଜନ ମେସକୁ ଫେରି ନ ଥିଲେ । ସୋମବାର ସକାଳୁ ଭଦ୍ରକ ମୁଖ୍ୟ ଚିକିତ୍ସାଳୟକୁ ରେଳବାଇ ପୁଲିସ ଯୁବକଙ୍କ ମୁଣ୍ଡ ବିହୀନ ଶବ ଆଣିଥିବା ପରିବାର ଲୋକେ ଖବରପାଇ ମେଡିକାଲରେ ପହଞ୍ଚିବା ପରେ ତାହା ରଞ୍ଜନଙ୍କ ଶବ ବୋଲି ଚିହ୍ନଟ କରିଥିଲେ । 

ତେବେ ରଞ୍ଜନଙ୍କ ମୁଣ୍ଡ ନ ଥିବା ସହିତ ଡାହାଣ ହାତଟି ମଧ୍ୟ ନ ଥିବା ସୂଚନା ମିଳିଛି । ତେବେ ରଞ୍ଜନଙ୍କ ଶରୀରରେ ଅନ୍ୟ କୌଣସି ସ୍ଥାନରେ କ୍ଷତ ଚିହ୍ନ ନାହିଁ । ପାରିପାର୍ଶ୍ବକ ପରିସ୍ଥିତିକୁ ଦେଖି ରଞ୍ଜନକୁ ହତ୍ୟା କରାଯାଇଥିବା ପରିବାର ପକ୍ଷରୁ ଭଦ୍ରକ ଟାଉନ ଥାନାରେ ଏକ ଲିଖିତ ଅଭିଯୋଗ କରାଯାଇଛି । ତେବେ ମୃତ ରଞ୍ଜନଙ୍କ ମୁଣ୍ଡ ଓ ହାତ କୁଆଡେ ଗଲା ବୋଲି ପରିବାର ଲୋକେ ପ୍ରଶ୍ନ କରିଛନ୍ତି । ଅନ୍ୟପଟେ ରାନ୍ଦିଆ ଓ ବାଉଦପୁର ରେଳଷ୍ଟେସନ ମଝିରେ ଥିବା ଶାଳନ୍ଦୀ ବ୍ରିଜ ରେଳ ଧାରଣା ନିକଟରୁ ରଞ୍ଜନଙ୍କ ମୃତଦେହ ଉଦ୍ଧାର କରାଯାଇଥିବା ରେଲୱେ ପୁଲିସ ପକ୍ଷରୁ କୁହାଯାଇଛି। ଆଖପାଖ ଅଞ୍ଚଳରେ ଖୋଜାଖୋଜି ପରେ ମଧ୍ୟ ମୁଣ୍ଡ ଓ ହାତ ମିଳିନାହିଁ । ଅଭିଯୋଗ ପରେ ଘଟଣାର ତଦନ୍ତ ଆରମ୍ଭ ହୋଇଥିବା କହିଛି ରେଳବାଇ ପୁଲିସ ।