ପ୍ରୟାଗରାଜ ୦୧/୦୨: ମହାକୁମ୍ଭକୁ ଚର୍ମଚକ୍ଷୁରେ ଦେଖିବାର ଅଭିଳାଷ କେବଳ ଭାରତୀୟଙ୍କର ନାହିଁ, ସାରା ବିଶ୍ୱର ଲୋକଙ୍କ ମନରେ ଏହି ଇଚ୍ଛା ରହିଛି । ସେଥିପାଇଁ ମହାକୁମ୍ଭର ମହାୟୋଜନକୁ ଦେଖିବାକୁ ସମଗ୍ର ବିଶ୍ୱରୁ ଲୋକେ ଧାଇଁ ଆସୁଛନ୍ତି । ଏହି କ୍ରମରେ ଏକ ଭିଡିଓ ଭାଇରାଲ ହେଉଛି । ଏଥିରେ ଜଣେ ବିଦେଶୀ ବ୍ୟକ୍ତି ଭଣ୍ଡାରାରୁ ମିଳୁଥିବା ଖାଦ୍ୟକୁ ଅତି ଆନନ୍ଦର ସହ ଖାଉଥିବା ନଜର ଆସିଛନ୍ତି । ଲୋକେ ତାଙ୍କୁ ‘ହ୍ୟାରି ପୋଟର୍’ ନାମରେ ସମ୍ବୋଧନ କରୁଛନ୍ତି । ସେ କହିଛନ୍ତି- ମୁଁ ଡାନିଏଲଙ୍କଠୁ ଅଧିକ ସୁନ୍ଦର । ସୋସିଆଲ ମିଡିଆରେ ଭାଇରାଲ ଏହି ‘ହ୍ୟାରି ପୋଟର୍’ ଫେମ୍ ହେଉଛନ୍ତି ଇଟାଲିର ନିକୋଲୋ ବ୍ରୁଗ୍ନାରା । ମହାକୁମ୍ଭରେ ତାଙ୍କୁ ଯେଉଁ ଖ୍ୟାତି ମିଳୁଛି, ତା’ର ସେ ଭରପୂର ଆନନ୍ଦ ଉଠାଉଛନ୍ତି । ଅତ୍ୟନ୍ତ ଖୁସିରେ ମହାକୁମ୍ଭ, ୟୁରୋପ, ଭାରତ, ଯୋଗ ଓ ଯୋଗୀ ସରକାରଙ୍କ ବିଷୟରେ ସେ ଅନେକ କଥା କହିଛନ୍ତି ଏବଂ ମୁକ୍ତ କଣ୍ଠରେ ପ୍ରଶଂସା କରିଛନ୍ତି ।
ଇଟାଲିର ନ୍ୟୁଜ୍ ଏଜେନ୍ସି ତରଫରୁ ଜଣେ କ୍ୟାମେରାମ୍ୟାନ୍ ଭାବେ ନିକୋଲୋ ଆସିଥିଲେ ମହାକୁମ୍ଭର ନ୍ୟୁଜ୍ କରିବାକୁ, ଫଟୋ ଉଠାଇବାକୁ; କିନ୍ତୁ ଏଠାକୁ ଆସି ସେ ନିଜେ ଖବର ପାଲଟିଛନ୍ତି । ଲୋକେ ତାଙ୍କ ସହ ସେଲ୍ଫି ନେଉଛନ୍ତି । ରିଲ୍ସ କରୁଛନ୍ତି ଓ ତାଙ୍କ ସହ କଥା ହେବାକୁ ପାଗଳ ହେଉଛନ୍ତି । ବିଦେଶରେ ଏଭଳି ପ୍ରସିଦ୍ଧ ହୋଇଯିବେ ବୋଲି ନିକୋଲୋ କେବେ ଭାବି ନ ଥିଲେ । ମହାକୁମ୍ଭ ଖବର ସଂଗ୍ରହ କରିବାକୁ ଇଟାଲିରୁ ମହାକୁମ୍ଭକୁ ଆସିଥିବାରୁ ନିକୋଲୋ ନିଜକୁ ଅତ୍ୟନ୍ତ ଭାଗ୍ୟଶାଳୀ କହିଛନ୍ତି । ତାଙ୍କ ଅନୁସାରେ, ଏକ ସୀମିତ କ୍ଷେତ୍ରରେ କୋଟି କୋଟି ଲୋକଙ୍କ ମିଳନ, ସ୍ନାନ-ପୂଜନ ଓ ଧ୍ୟାନ ଏବଂ ଏତେ ସୁନ୍ଦର ଭାବେ ସମଗ୍ର ପ୍ରକ୍ରିୟାର ବ୍ୟବସ୍ଥା ହେବା କୌଣସି ଆଶ୍ଚର୍ଯ୍ୟଠୁ କମ୍ ନୁହେଁ । ସେ କହିଛନ୍ତି, ଭାରତ ସମସ୍ତଙ୍କୁ ପ୍ରେମର ସହ ନିଜର ଅଙ୍ଗ କରିନିଏ । ଏହା ଭାରତର ମହାନତା । ଏଠାରେ କୋଟି କୋଟି ଲୋକ ଯେଉଁଭଳି ଭାବେ ନିଜେ ନିଜେ ଆସି ଶାନ୍ତିପୂର୍ବକ ପୂଜା-ଆରାଧନା କରୁଛନ୍ତି, ତାହା ଅକଳ୍ପନୀୟ ଦୃଶ୍ୟ । ୟୁରୋପରେ ଏଭଳି ଦୃଶ୍ୟ ବିଷୟରେ ଚିନ୍ତା କରାଯାଇ ପାରିବ ନାହିଁ । କାରଣ ଲୋକସଂଖ୍ୟା ସହିତ ବ୍ୟବହାର ଦୃଷ୍ଟିରୁ ମଧ୍ୟ ୟୁରୋପୀୟ ଦେଶମାନଙ୍କ ପାଇଁ ଏତେ ବିଶାଳ ଜନସମୁଦ୍ରର ପ୍ରବନ୍ଧନ ଅସମ୍ଭବ । ଯୋଗୀ ସରକାରଙ୍କ ପ୍ରୟାସକୁ ନିକୋଲୋ ପ୍ରଶଂସା କରିଛନ୍ତି ।
