ନୂଆଦିଲ୍ଲୀ: କ୍ୟାନସର ଔଷଧ ଉପରେ ଜିଏସଟି ହ୍ରାସ କରିବାକୁ ନିଷ୍ପତ୍ତି ନେଇଛି ଜିଏସଟି କାଉନସିଲ୍ । ଆଜି (ସୋମବାର) ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜିଏସଟି କାଉନସିଲ୍ର ୫୪ ତମ ବୈଠକରେ ଏହି ନିଷ୍ପତ୍ତି ନିଆଯାଇଛି । ବର୍ତ୍ତମାନ ୧୨ ପ୍ରତିଶତ ବଦଳରେ କ୍ୟାନସର ଔଷଧ ଉପରେ ୫ ପ୍ରତିଶତ ଜିଏସଟି ଲାଗୁ କରାଯିବ ବୋଲି ନିଷ୍ପତ୍ତି ହୋଇଛି । ଏହା ବ୍ୟତୀତ ଜିଏସଟି କାଉନସିଲ୍ ସ୍ୱାସ୍ଥ୍ୟ ଏବଂ ଜୀବନ ବୀମାର ପ୍ରିମିୟମ ଦେୟ ଉପରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇ ନାହିଁ । ତେବେ ଧାର୍ମିକ ଯାତ୍ରା ପାଇଁ ହେଲିକପ୍ଟର ସେବା ବ୍ୟବହାର କରିବା ବେଳେ ବର୍ତ୍ତମାନ ୧୮ ପ୍ରତିଶତ ବଦଳରେ କେବଳ ୫ ପ୍ରତିଶତ ଜିଏସଟି ଦେବାକୁ ପଡିବ ।
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ରାଜ୍ୟର ଅର୍ଥମନ୍ତ୍ରୀଙ୍କ ସହ ଜିଏସଟି କାଉନସିଲର ବୈଠକରେ ସ୍ୱାସ୍ଥ୍ୟ ବୀମା ଏବଂ ଜୀବନ ବୀମାର ପ୍ରିମିୟମ ଦେୟ ଉପରେ ଜିଏସଟି ହ୍ରାସ ଉପରେ ଆଲୋଚନା ହୋଇଥିଲା । ଏହା ପରେ ଏହି ସମସ୍ୟାକୁ ଅଧିକ ଅଧ୍ୟୟନ ପାଇଁ ଗ୍ରୁପ୍ ଅଫ୍ ମିନିଷ୍ଟର୍ସ (GOM) କୁ ପଠାଯାଇଛି । ଅକ୍ଟୋବର ୨୦୨୪ ସୁଦ୍ଧା GOM କୁ ଏହାର ରିପୋର୍ଟ ପ୍ରସ୍ତୁତ କରିବାକୁ ପଡିବ । ନଭେମ୍ବର ୨୦୨୪ ରେ ହେବାକୁ ଥିବା ଜିଏସଟି କାଉନସିଲ୍ ବୈଠକରେ ଏହି ପ୍ରସଙ୍ଗ ଉପରେ ଆଲୋଚନା କରାଯିବ ।
ତେବେ ଆଜିର ଜିଏସଟି କାଉନସିଲ ବୈଠକରେ ଧାର୍ମିକ ତୀର୍ଥଯାତ୍ରା କରୁଥିବା ଲୋକଙ୍କୁ ମଧ୍ୟ ଆଶ୍ବସ୍ତି ଦିଆଯାଇଛି । ଧାର୍ମିକ ତୀର୍ଥଯାତ୍ରା ପାଇଁ ହେଲିକପ୍ଟର ସେବା ବ୍ୟବହାର କରିବାବେଳେ ବର୍ତ୍ତମାନ ୧୮ ପ୍ରତିଶତ ବଦଳରେ କେବଳ ୫ ପ୍ରତିଶତ ଜିଏସଟି ଦେବାକୁ ପଡିବ । ଉତ୍ତରପ୍ରଦେଶ ଅର୍ଥମନ୍ତ୍ରୀ ପ୍ରେମଚାନ୍ଦ ଅଗ୍ରୱାଲ ANI କୁ ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ ଜିଏସଟି କାଉନସିଲ ଆମର ଦାବି ଗ୍ରହଣ କରିଛି ।