ଭୁବନେଶ୍ୱର,୨୫/୦୪: ରାଜ୍ୟରେ ଚାଲୁଥିବା ଡଙ୍ଗା ଗୁଡ଼ିକ ବଦଳିବ । ନୂଆ ରୂପ ନେବ ପର୍ଯ୍ୟଟନ ଡଙ୍ଗା । ବିଶେଷକରି ଚିଲିକା ଏବଂ ଅନ୍ୟାନ୍ୟ ଜଳ ଉତ୍ସରେ ଚାଲୁଥିବା ପୁରାତନ ତଥା ପାରମ୍ପରିକ ପର୍ଯ୍ୟଟନ ଡଙ୍ଗାକୁ ଆଧୁନିକ ତଥା ପର୍ଯ୍ୟଟକଙ୍କ ନିରାପଦ ଓ ସୁରକ୍ଷାକୁ ଦୃଷ୍ଟିରେ ରଖି ବଦଳା ଯିବ । ଏହା ସହ ହୋମ୍ ଷ୍ଟେ ନୀତି କାର୍ଯ୍ୟକାରୀ ପାଇଁ ପୂର୍ବ ଯୋଜନା ଗୁଡ଼ିକ ପୁନର୍ବିଚାର ପର୍ଯ୍ୟାୟରେ ରହିଛି । ବିଭାଗ ତରଫରୁ ସମୀକ୍ଷା ବୈଠକରେ ଏ ନେଇ ଆଲୋଚନା ହୋଇଛି । ବହୁ ପୂର୍ବରୁ ଯୋଜନା ହୋଇଥିଲେ ବି ଠିକଣା ଭାବେ କାର୍ଯ୍ୟକାରୀ ହୋଇପାରିନି, ଯାହାକୁ ଏବେ ସରକାର କାର୍ଯ୍ୟକାରୀ କରିବାକୁ ଅଣ୍ଟା ଭିଡ଼ିଛନ୍ତି । ସେଥିପାଇଁ ନିକଟରେ ଅନୁଷ୍ଠିତ ସ୍ୱତନ୍ତ୍ର ବିଭାଗୀୟ ବୈଠକରେ ଏ ବିଷୟରେ ଆଲୋଚନା ହୋଇଛି ।
ବିଭାଗ ପକ୍ଷରୁ ମିଳିଥିବା ସୂଚନା ମୁତାବକ, ୨୦୨୧ ମସିହାରେ ଓଡ଼ିଶା ପର୍ଯ୍ୟଟନ ବିଭାଗ ପକ୍ଷରୁ ଓଡ଼ିଶାରେ ଫାଇବର୍ ଗ୍ଲାସ୍ ଡଙ୍ଗା (ଏଫ୍ଆର୍ପି ବୋଟ୍)କୁ ନବୀକରଣ କରାଯିବାକୁ ଏକ ଯୋଜନା ହୋଇଥିଲା । ଚଳିତ ବର୍ଷ ଏଥିରେ ସଂଶୋଧନ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ୨୦୨୫- ୨୬ ବର୍ଷ ପାଇଁ ବାର୍ଷିକ ଯୋଜନାରେ ଏହାକୁ କାର୍ଯ୍ୟକାରୀ କରିବାକୁ ପ୍ରସ୍ତାବ ଦେଇଛନ୍ତି । ଏହି ଯୋଜନା ଅଧୀନରେ ପର୍ଯ୍ୟଟକଙ୍କ ସୁରକ୍ଷା ଏବଂ ସେମାନଙ୍କୁ ଆରାମ ଦେବା ପାଇଁ ଚିଲିକା ପରି ପ୍ରମୁଖ ପର୍ଯ୍ୟଟନସ୍ଥଳୀରେ ପର୍ଯ୍ୟଟନ ଡଙ୍ଗାର ନବୀକରଣ କରାଯିବ । ଏହି ଯୋଜନାର ଅବଧି ୨୦୨୦-୨୦୨୫ ପର୍ଯ୍ୟନ୍ତ ରହିଥିଲା ବେଳେ ଏହା ଅଧୀନରେ ଉଭୟ ପଞ୍ଜୀକୃତ ତଥା ଅଣପଞ୍ଜୀକୃତ ଡଙ୍ଗା ପରିଚାଳକଙ୍କୁ ଆଣିବା ଲାଗି ପୁନର୍ବିଚାର କରାଯିବ ବୋଲି ବିଭାଗୀୟ ଅଧିକାରୀ କହିଛନ୍ତି । ଅଧିକାରୀଙ୍କ କହିବା କଥା, ଏବେ ବ୍ୟବହୃତ ଅଧିକାଂଶ ଡଙ୍ଗା ପାରମ୍ପରିକ କାଠ ଡଙ୍ଗା । ଯାହା ଜାତୀୟ ବିପର୍ଯ୍ୟୟ ପରିଚାଳନା ପ୍ରତିଷ୍ଠାନ ଦ୍ୱାରା ଜାରି ସୁରକ୍ଷା ନିର୍ଦ୍ଦେଶାବଳୀ ପାଳନ କରୁନାହାନ୍ତି ବା ତା’ର ପରିସରରେ ଆସୁନାହାନ୍ତି । ତେଣୁ ପଞ୍ଜୀକୃତ କାଠ ଡଙ୍ଗା ଗୁଡ଼ିକୁ ଇଣ୍ଡିଆନ୍ ରେଜିଷ୍ଟର୍ କ୍ଲାସ୍ (ଆଇଆରସି) ଅନୁଯାୟୀ ଫାଇବର୍ଗ୍ଲାସ୍ ଡଙ୍ଗା (ଏଫ୍ଆର୍ପି ବୋଟ୍)ରେ ପରିଣତ କରାଯିବ । ଏହା ସହିତ ଏହାର ମୂଲ୍ୟ ଉପରେ ୫୦ ପ୍ରତିଶତ ସବ୍ସିଡି ଯୋଗାଇ ଦିଆଯିବ ।
ବଡ଼ କଥା ହେଲା ସର୍ବାଧିକ ପର୍ଯ୍ୟଟକ ବୋଟ୍ ବା ଡଙ୍ଗା ଚାଲୁଥିବା ଚିଲିକାରେ ବୋଟ୍ ଓ ଡଙ୍ଗାରେ ଇଥାନଲ୍ ଯୁକ୍ତ ଇନ୍ଧନର ବ୍ୟବହାର ପାଇଁ ଯୋଜନା ହୋଇଛି । ଏ ନେଇ ଉଚ୍ଚସ୍ତରୀୟ ବୈଠକରେ ନିଷ୍ପତ୍ତି ହୋଇଛି । ଏହାଛଡ଼ା ରାଜ୍ୟରେ ହୋମ୍ ଷ୍ଟେ ଯୋଜନାକୁ ପୁନଃ କାର୍ଯ୍ୟକ୍ଷମ କରିବାକୁ ମଧ୍ୟ ଓଡ଼ିଶା ପର୍ଯ୍ୟଟନ ବିଭାଗ ପକ୍ଷରୁ ନିଷ୍ପତ୍ତି ହୋଇଛି । ରାଜ୍ୟରେ ୨୦୨୧ରେ ଏହି ଯୋଜନାକୁ କାର୍ଯ୍ୟକାରୀ କରାଯାଇଥିଲା ବେଳେ ତାହା ପୂର୍ଣ୍ଣମାତ୍ରାରେ କାର୍ଯ୍ୟକ୍ଷମ ହୋଇପାରିନି ।
ଏହି ଯୋଜନାରେ ବିଭିନ୍ନ ସମସ୍ୟା ହେବା ଦ୍ୱାରା ଘର ମାଲିକମାନେ ନିର୍ଦ୍ଦେଶାବଳୀର ଉଲ୍ଲଂଘନ କରିଥିଲେ । ଏବେ ସେଥିରେ ସଂଶୋଧନ ପୂର୍ବକ ପର୍ଯ୍ୟଟକଙ୍କୁ ସମ୍ପୂର୍ଣ୍ଣ ଘରୋଇ ଓ ଅନନ୍ୟ ସାଂସ୍କୃତିକ ଅନୁଭୂତି ପ୍ରଦାନ ପାଇଁ ଯୋଜନାକୁ ନବୀକରଣ କରାଯାଉଛି ଯାହାର ମୂଳ ଊଦ୍ଦେଶ୍ୟ ପର୍ଯ୍ୟଟକଙ୍କୁ ହୋମ୍ ଷ୍ଟେ ମାଧ୍ୟମରେ ପୂରା ପାରିବାରିକ ତଥା ଘରୋଇ ସୁରକ୍ଷାରେ ସମସ୍ତ କଥା ବୁଝି ଆତିଥ୍ୟ ପରସିଦେବା । ରାଜ୍ୟ ସରକାର ଗୋଷ୍ଠୀ ବିକାଶକୁ ସର୍ବୋଚ୍ଚ ପ୍ରାଥମିକତା ଦେଉଥିଲା ବେଳେ ଓଡ଼ିଶା ହୋମ୍ ଷ୍ଟେ ନୀତି ଦ୍ୱାରା ଗୋଷ୍ଠୀଭିତ୍ତିକ ପର୍ଯ୍ୟଟନକୁ ତ୍ୱରାନ୍ୱିତ କରିବା ହେଉଛି ମୁଖ୍ୟ ଲକ୍ଷ୍ୟ । ଏହା କାର୍ଯ୍ୟକାରୀ ହେଲେ ପର୍ଯ୍ୟଟକ ଖାଣ୍ଟି ଓଡ଼ିଆ ଆତିଥେୟତାର ଅଭିଜ୍ଞତା ନେଇପାରିବେ ବୋଲି ଓଡ଼ିଶା ପର୍ଯ୍ୟଟନ ବିଭାଗ କହିଛି ।
