ଭୁବନେଶ୍ୱର ୨୮/୦୧: ଶିମିଳିପାଳରେ ଶିକାରୀଙ୍କୁ ଧରୁଛି ଏଆଇ କ୍ୟାମେରା। ଜନ୍ତୁ ଶିକାର କରିବାକୁ ଆସି ଧରାପଡ଼ିଲେ ୫ ଶିକାରୀ। ୫ଟି ଦେଶୀ ବନ୍ଧୁକ, ସମ୍ବର ଓ ହରିଣ ଶିଙ୍ଗ, ଧନୁତୀର ସହ ଫାଶ ଜବତ କଲା ବନ ବିଭାଗର ସ୍ବତନ୍ତ୍ର ଏନଫୋର୍ସମେଣ୍ଟ ଟିମ୍ ।

ସୂଚନାଯୋଗ୍ୟ ଯେ, ଶିମିଳିପାଳ ଅଭୟାରଣ୍ୟରେ ଶିକାରୀଙ୍କୁ ଧରାଇଦେଇଛି ଏଆଇ କ୍ୟାମେରା । ଜନ୍ତୁ ଶିକାର କରିବା ବିଫଳ ହେଉଛନ୍ତି ଶିକାରୀ। ଏଆଇ କ୍ୟାମେରା ଦ୍ବାରା ଅବୈଧ ଶୀକାରରେ ଲାଗିଛି ରୋକ୍। ବନ କର୍ମଚାରୀଙ୍କ ପାଇଁ କୃତିମ ବୁଦ୍ଧିମତା ବିଶିଷ୍ଟ କ୍ୟାମେରା ବନ ସୁରକ୍ଷା ଦେବା ପାଇଁ ସାଜିଛି। ବରଦାନ। ସୋମବାର ବିଳମ୍ବିତ ରାତି ଜଙ୍ଗଲକୁ ବନ୍ୟଜନ୍ତୁ ଶିକାରୀ କରିବାକୁ ଆସିଥିବା ୫ ଶିକାରୀଙ୍କୁ ଗିରଫ କରିବାରେ ସଫଳ ହୋଇଛି ବନ ବିଭାଗ  । ଗିରଫ ଶିକାରୀମାନଙ୍କ ନିକଟରୁ ୫ଟି ଦେଶୀ ବନ୍ଧୁକ, ସମ୍ବର ଓ ହରିଣ ଶିଙ୍ଗ, ଧନୁତୀର ଓ ଫାଶ ଜବତ ହୋଇଛି । ଗିରଫ ହୋଇଥିବା ସମସ୍ତ ଅଭିଯୁକ୍ତ କପ୍ତିପଦା ଥାନା ଅଞ୍ଚଳର ବୋଲି ଜଣାପଡିଛି । ଏ ନେଇ ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡର ଉପ ନିର୍ଦ୍ଦେଶକ ସମ୍ରାଟ୍ ଗୌଡା ସୂଚନା ଦେଇଛନ୍ତି ।

ଉଲ୍ଲେଖ ଯୋଗ୍ୟ ଯେ, ଗତ ୨୩ ତାରିଖରେ ମଧ୍ୟ ୩ ଜଣ ଶିକାରୀଙ୍କୁ ଧରାଇ ଦେଇଥିଲା AI କ୍ୟାମେରା । ଶିମିଳିପାଳ ଅଭୟାରଣ୍ୟରେ ଶିକାର ପାଇଁ କିଛି ଶିକାରୀ ଉଦ୍ୟମ କରୁଥିଲେ । ଏହି ସମୟରେ ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡରୁ ୩ ଶିକାରୀଙ୍କୁ ଧରିଥିଲା ସ୍ବତନ୍ତ୍ର ଏନଫୋର୍ସମେଣ୍ଟ ଟିମ୍ । ସେମାନଙ୍କ ନିକଟରୁ ୨ଟି ଦେଶୀ ବନ୍ଧୁକ, ଧନୁ ତୀର ଓ ଶିକାର ପାଇଁ ବ୍ୟବହୃତ ଫାଶ ଜବତ ହୋଇଛି । ୩ ଅଭିଯୁକ୍ତ ଉଦଳା ଥାନା ଅଞ୍ଚଳର ବୋଲି ଜଣାପଡିଥିଲା । ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ବନଖଣ୍ଡର ଉପ ନିର୍ଦ୍ଦେଶକ ସମ୍ରାଟ୍ ଗୌଡା ଏହି ସୂଚନା ଦେଇଥିଲେ ।