ଅନୁଗୁଳ,୨୭/୧୨ : ଅଦିନିଆ ବର୍ଷା ଦୋହଲାଇ ଦେଇଛି ଚାଷୀର ମେରୁଦଣ୍ଡ । ଅମଳକ୍ଷମ ଧାନ ବିଲରେ ଉଜୁଡ଼ୁଛି । ଗଜା ହେଲାଣି ପାଚିଲା ଧାନ, ଅମଳ ଆଶା ଛାଡ଼ିଲେଣି ଚାଷୀ । ଆଖି ସାମ୍ନାରେ ବର୍ଷକର ପରିଶ୍ରମ ଉଜୁଡ଼ି ଯାଉଥିବା ଦେଖି ଚାଷୀ କାନ୍ଦୁଥିବା ବେଳେ କ୍ଷୟକ୍ଷତି ଆକଳନ କରି ତୁରନ୍ତ କ୍ଷତିପୂରଣ ରାଶି ଦେବାକୁ ଦାବି ହୋଇଛି । କ୍ଷତିଗ୍ରସ୍ତ ଚାଷୀଙ୍କୁ ଏକର ପିଛା ୨୦ ହଜାର ଟଙ୍କା କ୍ଷତିପୂରଣ ପ୍ରଦାନ କରିବାକୁ ଅଲ୍ ଇଣ୍ଡିଆ କିଷାନ କ୍ଷେତ ମଜଦୁର ସଂଘ ଓ ଚାଷୀ ସୁରକ୍ଷା କମିଟି ଦାବି କରିଛି । ଏ ସଂକ୍ରାନ୍ତରେ ରାଜସ୍ୱ ମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି।
ଉଦ୍ବେଗର ବିଷୟ, ଜିଲ୍ଲାରେ ଏକର ଏକର ଫସଲ ଉଜାଡ଼ି ଦେଇଛି ଅଦିନିଆ ବର୍ଷା । ମାତ୍ର ସରକାରୀ ବାବୁମାନେ ବିଲ ମୁଣ୍ଡକୁ ନ ଯାଇ କୃଷି ବିଭାଗ ଓ ତହସିଲ୍ କର୍ତ୍ତୃପକ୍ଷ ଅଫିସ୍ରେ ବସି କ୍ଷୟକ୍ଷତି ରିପୋର୍ଟ ପ୍ରସ୍ତୁତ କରୁଛନ୍ତି । ଜିଲ୍ଲାରେ ଚାଷ ହୋଇଥିବା ଅଧାଅଧି ଧାନ ଅମଳ ହୋଇନାହିଁ । ବିଲରେ କଟାଧାନ ପଡ଼ିଛି । କୃଷି ବିଭାଗ ମାତ୍ର ୫ ପ୍ରତିଶତ ଚାଷ ଅମଳ ପାଇଁ ରହିଥିବା କହୁଛି । ତରବରିଆ ରିପୋର୍ଟ ପ୍ରକାଶ କରି ବର୍ଷାରେ କୌଣସି ଧାନଚାଷ କ୍ଷୟକ୍ଷତି ହୋଇ ନ ଥିବା କୁହାଯାଉଥିବାରୁ ଏହାକୁ ବିରୋଧ କରିଛି ସଙ୍ଗଠନ । ଧାନ ଫସଲ କ୍ଷତି ପାଇଁ ଏକର ପିଛା ୨୦ ହଜାର ଟଙ୍କା କ୍ଷତିପୂରଣ ଦିଆଯାଉ।
ସେହିପରି ପନିପରିବା କ୍ଷତିର ଉପଯୁକ୍ତ କ୍ଷତିପୂରଣ, କୃଷି ଋଣ ଛାଡ଼ କରାଯିବା, ସ୍ୱାମୀନାଥନ କମିଶନ ରିପୋର୍ଟ ଅନୁଯାୟୀ ଏମ୍ଏସ୍ପି ନିର୍ଦ୍ଧାରଣ, ବନ୍ୟଜନ୍ତୁଙ୍କ ଦ୍ୱାରା ଚାଷ ଉପଦ୍ରବରେ ଅଙ୍କୁଶ ଲଗାଇବା, ଚାଷୀର ଧନଜୀବନ ସୁରକ୍ଷା କରିବା, ଭାଗଚାଷୀଙ୍କୁ ଧାନ ମଣ୍ଡିରେ ଧାନ ବିକ୍ରି ଓ ପ୍ରାକୃତିକ ବିପର୍ଯ୍ୟୟ କ୍ଷତିପୂରଣ ପାଇଁ ପରିଚୟପତ୍ର ପ୍ରଦାନ କରିବାକୁ ଦାବି ହୋଇଛି । ଦାବିପତ୍ର ପ୍ରଦାନ ବେଳେ ସଙ୍ଗଠନର ଜିଲ୍ଲା ସଭାପତି ସୁବାସ ପ୍ରଧାନ, ସଞ୍ଜୟ ସାହୁ, ସୁବାସ ଦେହୁରୀ, ଚାଷୀ ସୁରକ୍ଷା କମିଟିର ସମ୍ପାଦକ ହେମନ୍ତ କୁମାର ଦାସ, ଅଚ୍ୟୁତାନନ୍ଦ ମିଶ୍ର, ବ୍ରଜମୋହନ ସାହୁ, ଦୁର୍ଗାଚରଣ ପ୍ରଧାନ ଉପସ୍ଥିତ ଥିଲେ ।
