ଜଗତସିଂହପୁର,୨୭/୧୨ : ଲଘୁଚାପ ଜନିତ ଅଦିନିଆ ବର୍ଷାରେ ଜଗତସିଂହପୁର ଜିଲ୍ଲାରେ ଧାନ ସହ ପନିପରିବା ଫସଲ ବ୍ୟାପକ କ୍ଷତିଗ୍ରସ୍ତ ହୋଇଛି । ତେବେ ଫସଲହାନିର କ୍ଷୟକ୍ଷତି ଆକଳନ କରିବାରେ ପ୍ରଶାସନିକ ସ୍ତରରେ ବିଳମ୍ୱ କରାଯାଇଛି। ତୁହାକୁ ତୁହା ବୈଠକ ସତ୍ତ୍ଵେ ପ୍ରକୃତ କ୍ଷତି ସଂପର୍କିତ ତଥ୍ୟ ଗଣମାଧ୍ୟମ ସମ୍ମୁଖରେ ରଖିବାକୁ ବିଭାଗୀୟ ଅଧିକାରୀମାନେ କୁନ୍ଥକୁନ୍ଥ ହେଉଛନ୍ତି । ପ୍ରଥମ ଲଗାଣ ବର୍ଷାରେ ଧାନ ଫସଲ ନଷ୍ଟ ହୋଇନଥିଲା । ଦ୍ୱିତୀୟ ପର୍ଯ୍ୟାୟ ବର୍ଷାରେ କ୍ଷୟକ୍ଷତି ହୋଇଥିବା ନେଇ ଆକଳନ କରାଯାଉଛି । ଏବେଯାଏ ଚୂଡ଼ାନ୍ତ ରିପୋର୍ଟ ପ୍ରସ୍ତୁତ ହୋଇନାହିଁ ବୋଲି ଜିଲ୍ଲା କୃଷି ବିଭାଗ ପକ୍ଷରୁ ସଫେଇ ଦିଆଯାଇଛି ।
ଆଶ୍ଚର୍ଯ୍ୟର ବିଷୟ, ପ୍ରଥମ ବର୍ଷାରେ ପନିପରିବାକୁ କ୍ଷତି ପହଞ୍ଚି ନଥିଲା । ଦ୍ୱିତୀୟ ବର୍ଷାରେ କ୍ଷତି ହୋଇଥିବାର ଖବର ଆସୁଥିବାରୁ ଏ ଦିଗରେ କ୍ଷେତ୍ର ପରିଦର୍ଶନ ସହ କ୍ଷୟକ୍ଷତିର ଆକଳନ ହେବ ବୋଲି ପ୍ରତିକ୍ରିୟା ରଖିଛନ୍ତି ଜିଲ୍ଲା ଉଦ୍ୟାନ କୃଷି ଅଧିକାରୀ ଅନୀଲ ସେଠୀ । ଅପରପକ୍ଷେ କିନ୍ତୁ ଜିଲ୍ଲାରେ ୩୩ ପ୍ରତିଶତ ଧାନ ଫସଲ ନଷ୍ଟ ହୋଇଥିବାର ଏକ ରିପୋର୍ଟ ଜିଲ୍ଲା କୃଷି ବିଭାଗ ପକ୍ଷରୁ ସରକାରଙ୍କୁ ପ୍ରଦାନ କରାଯାଇଥିବା ଜଣାପଡ଼ିଛି । ଆଗକୁ ଯଦି ପୁଣି ବର୍ଷା ହୁଏ ତେବେ କ୍ଷତି ହାର ବଢ଼ିବ ବୋଲି ସରକାରଙ୍କୁ ଅବଗତ କରାଯାଇଛି । ଜିଲ୍ଲାରେ ପ୍ରାୟ ୮୦ ହଜାର ହେକ୍ଟରରୁ ଅଧିକ ଜମିରେ ଧାନ ଚାଷ ହୋଇଛି । ସେହିପରି ପାଖାପାଖି ୨ ହଜାର ହେକ୍ଟର ଜମିରେ ପନିପରିବା ଚାଷ କରାଯାଇଛି । ୨୧ ତାରିଖ ଲଗାଣ ବର୍ଷାରୁ ଉଭୟ ପନିପରିବା ଓ ଧାନ ଫସଲ ପ୍ରଭାବିତ ହୋଇଥିଲା । ୨୧ ତାରିଖରେ ଜିଲ୍ଲାରେ ୪୫୪.୨ ମିଲି ମିଟର ବର୍ଷା ରେକର୍ଡ ହୋଇଥିଲା । ତା'ପରଦିନ ମଧ୍ୟ ଜିଲ୍ଲାରେ ୧୫୭.୮ ମିମି ବର୍ଷା ହୋଇଥିଲା । ଏହି ଦୁଇ ଦିନର ଝିପିଝିପି ବର୍ଷାରେ ଧାନ ବିଲ ପଚପଚ ହୋଇ ଉଠିଥିଲା । ଧାନ ଜମିରେ ଗୋଟେ ପ୍ରକାର ବନ୍ୟା ପାଣିର ଭ୍ରମ ସୃଷ୍ଟି ହୋଇଥିଲା । ଏଣେ ବହୁ ଚାଷୀ ଧାନ ଅମଳ ନିମନ୍ତେ ଗଛକୁ କାଟି ବିଲରେ ହିଁ କଚଡ଼ା ପକାଇ ଦେଇଥିଲେ । ହେଲେ ପାଣିର ଲହଡ଼ା ଭିତରେ କଚଡ଼ା ପଡ଼ିଥିବା ଧାନରୁ ଗଜା ବାହାରି ଆସିଥିଲା । ଜିଲ୍ଲାର ସମସ୍ତ ବ୍ଲକର ଅଧିକାଂଶ ଅଞ୍ଚଳରେ ଧାନ ଫସଲ ପ୍ରଭାବିତ ହୋଇଥିଲେ ସୁଦ୍ଧା ଉକ୍ତ ବର୍ଷାରେ ଧାନ ଫସଲ କ୍ଷତି ଶୂନ ଥିବାର ରିପୋର୍ଟ କୃଷି ବିଭାଗ ପକ୍ଷରୁ କରାଯାଇଥିବା ଚର୍ଚ୍ଚାର ପରିଧିକୁ ଆସିଛି ।
ଜିଲ୍ଲାରେ ହଜାର ହଜାର ଭାଗଚାଷୀ ପ୍ରଭାବିତ ହୋଇଥିବା ନେଇ ଉଦ୍ବେଗ ପ୍ରକାଶ କରିଛନ୍ତି ଜଗତସିଂହପୁର ବିଧାୟକ ଅମରେନ୍ଦ୍ର ଦାସ । ପ୍ରକୃତ ମାଲିକଙ୍କ ଠାରୁ ଭାଗରେ ଜମି ଆଣି ବହୁ ଚାଷୀ ନିଜ ଅର୍ଥ ଏବଂ ଋଣ କରି ଧାନ ଚାଷ କରିଛନ୍ତି । କିନ୍ତୁ ବର୍ଷା ବିତ୍ପାତରୁ ଅମଳ ପୂର୍ବରୁ ଧାନ ନଷ୍ଟ ହୋଇଥିବାରୁ ଭାଗଚାଷୀଙ୍କ ମୁଣ୍ଡରେ ଚଡ଼କ ପଡ଼ିଛି । ସରକାର ଏଥିପ୍ରତି ଯତ୍ନଶୀଳ ରହିଛନ୍ତି ଏବଂ ଭାଗଚାଷୀଙ୍କ ଫସଲ କ୍ଷତିର ଭରଣା ନିଶ୍ଚିତ ହେବ ବୋଲି ବିଧାୟକ ଶ୍ରୀ ଦାସ ପ୍ରତିଶ୍ରୁତି ରଖିବା ସହ ସ୍ୱତନ୍ତ୍ର ଭାବେ ଏକ ଫର୍ମ ବଣ୍ଟନ ହେବ ବୋଲି କହିଛନ୍ତି ।
