ହରଭଙ୍ଗା, ୯।୭ (ଚିତ୍ତ ରଞ୍ଜନ ସିଂ) : କେନାଲ ଅଛି କିନ୍ତୁ ଚାଷ ପାଇଁ ଚାଷୀଙ୍କୁ ମିଳୁନି ପାଣି। ଏ ନେଇ ବୌଦ୍ଧ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଛନ୍ତି ଚାଷୀ। ବୌଦ୍ଧ କ୍ଷୁଦ୍ର ଜଳସେଚନ ବିଭାଗର ହରଭଙ୍ଗା ଠାରେ ଥିବା ସଗଡ଼ିଆ କ୍ଷୁଦ୍ର ଜଳସେଚନ ପ୍ରକଳ୍ପରୁ ପାଣି ମିଳୁ ନ ଥିବା ଅଭିଯୋଗ କରିଛନ୍ତି ଚାଷୀ।
ଉକ୍ତ ପ୍ରକଳ୍ପରୁ ହରଭଙ୍ଗା ଓ ସଂକୁଲେଇ ଦୁଇ ଗୋଟି ପଞ୍ଚାୟତର ହରଭଙ୍ଗା, ସଂକୁଲେଇ, ବୁକେସିଙ୍ଗା, ଡିଆଘାଟ, କୁଡ଼ାସିଙ୍ଗା, ସୁରୁଣ୍ଡି, ଭେଜିଗୋରା, ମଲିକପଡ଼ା, ରାଉତପଡ଼ା, ଆଦି ଏଗାର ଗୋଟିରୁ ଉର୍ଦ୍ଧ ଗ୍ରାମର ଚାଷୀ ମାନେ ଉପକୃତ ହୋଇଥାନ୍ତି। ବିଶେଷ କରି ଚାଷ କାର୍ଯ୍ୟ ପାଇଁ ଏହି କେନାଲ ଉପରେ ହିଁ ନିର୍ଭର କରିଥାନ୍ତି। କିନ୍ତୁ ମୁଖ୍ୟ କେନାଲ ସହିତ ଶାଖା କେନାଲରେ ଅନାବନା ଗଛ ସହିତ ମାଟି ପଙ୍କରେ ପରିପୂର୍ଣ ହୋଇ ଥିବାରୁ କେନାଲ ଦେଇ ଜଳ ପ୍ରବାହିତ ହୋଇ ପାରୁ ନାହିଁ। ଫଳରେ ଅଞ୍ଚଳର ଚାଷୀମାନେ ପାଣି ପାଇ ପାରୁନାହାନ୍ତି।ଉକ୍ତ କେନାଲର ସମସ୍ୟାକୁ ନେଇ ହରଭଙ୍ଗା ଓ କୁଡ଼ାସିଙ୍ଗା ଅଞ୍ଚଳର ଚାଷୀ ଜିଲ୍ଲାପାଳ ଙ୍କ ନିକଟରେ ଏକ ଲିଖିତ ଅଭିଯୋଗ କରିଥିଲେ। ଜିଲ୍ଲାପାଳ ଅଭିଯୋଗକୁ ଭିତ୍ତି କରି ତୁରନ୍ତ ଏ ଦିଗରେ ପଦକ୍ଷେପ ନେଇ ଉକ୍ତ ସମସ୍ୟାର ସମାଧାନ କରିବା ପାଇଁ ବୌଦ୍ଧ କ୍ଷୁଦ୍ର ଜଳସେଚନ ବିଭାଗକୁ ଗତ ଏପ୍ରିଲ ୨୫ ତାରିଖ ରେ ନିର୍ଦେଶ ଦେଇଥିଲେ।କିନ୍ତୁ ଦୀର୍ଘ ଦିନ ବିତି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇପାରିଲା ନାହିଁ। ତେଣୁ ଅଞ୍ଚଳର ଚାଷୀ ମାନଙ୍କ ଭିତରେ ଅସନ୍ତୋଷ ଦେଖା ଦେଇଛି।
ଏ ବାବଦରେ ପୁରୁଣାକଟକ କ୍ଷୁଦ୍ର ଜଳସେଚନ ବିଭାଗର କନିଷ୍ଠ ଯନ୍ତ୍ରୀ ରାକେଶ ସେଠୀଙ୍କୁ ପଚାରିବାରୁ ଉକ୍ତ ସମସ୍ୟା ଉପରେ ଅବଗତ ଥିବା ସହିତ ତୁରନ୍ତ କେନାଲ ମରାମତି ଓ କେନାଲ ରୁ ଅନାବନା ଗଛ, ପଙ୍କ ସଫା କରାଯିବ ବୋଲି କହିଥିଲେ। ଆଗାମୀ ଦଶ ଦିନ ଭିତରେ ବିଭାଗ ପକ୍ଷରୁ ତୁରନ୍ତ ପଦକ୍ଷେପ ନେବା ସହିତ କେନାଲ ରେ ଥିବା ଅନାବନା ଗଛ ସାଙ୍ଗକୁ କେନାଲରୁ ମାଟି ପଙ୍କ ସଫା କରିବାକୁ ଚାଷୀ ଦାବି କରିଛନ୍ତି। ନଚେତ ପୁରୁଣାକଟକ କ୍ଷୁଦ୍ର ଜଳସେଚନ ବିଭାଗ କାର୍ଯ୍ୟାଳୟ ଘେରାଉ କରିବା ସହିତ ଆନ୍ଦୋଳନ କରିବେ ବୋଲି ଚାଷୀ ନାକୁ ନାୟକ, ଦନାର ବେହେରା, ପବିତ୍ର ନାୟକ, ସୁରଥ ରଣା, ସୀତାରାମ ପାଣ୍ଡେ, ପହଲା ନାୟକ ପ୍ରମୁଖ ଚେତାବନୀ ଦେଇଛନ୍ତି।
