ହରଭଙ୍ଗା,୧୦/୭ (ଚିତ୍ତ ରଞ୍ଜନ ସିଂ) : ହୀରାକୁଦ ଜଳ ଭଣ୍ଡାରରୁ ୨୦ଟି ଗେଟ ଦ୍ୱାରା ବନ୍ୟା ଜଳ ନିଷ୍କାସନ ହେବା ଦ୍ୱାରା ହରଭଙ୍ଗା ଦେଇ ଯାଇଥିବା ମହାନଦୀର ତଳ ମୁଣ୍ଡରେ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା । ଫଳରେ ଚାଷ ଜମି ସବୁ ଜଳ ମଗ୍ନ ହେବା ସହିତ କୁସଙ୍ଗ ପଞ୍ଚାୟତର ମାରଡ଼ା ଗାଁଟି ଏବେ ବି ଜଳବନ୍ଦୀ ଅବସ୍ଥାରେ ରହିଛି । ଉଦଣ୍ଡି ନାଳରେ ବର୍ତ୍ତମାନ ବି ୪ଫୁଟରୁ ଊର୍ଦ୍ଧ୍ବ ବନ୍ୟା ଜଳ ପ୍ରବାହିତ ହେଉଛି । ଏହି ଖବରଟି ବିଭିନ୍ନ ଗଣମାଧ୍ୟମରେ ପ୍ରସାରଣ ପରେ ଜିଲ୍ଲା ପ୍ରଶାସନ ତତ୍ପର ହୋଇ ଉଠିଛି ।
ଜିଲ୍ଲାପାଳ ସୁବ୍ରତ ପଣ୍ଡାଙ୍କ ନିର୍ଦେଶ ପରେ ବ୍ଲକ ପ୍ରଶାସନ ପକ୍ଷରୁ ବିପନ୍ନ ପରିବାରଙ୍କୁ ରିଲିଫ, ଶୁଖିଲା ଖାଦ୍ୟ ଯଥା ଡାଲି, ଚାଉଳ, ବିସ୍କୁଟ ମହମ ବତି, ଭଳି ନିତ୍ୟ ବ୍ୟବହାର୍ଯ୍ୟ ଜିନିଷ ବିପନ୍ନ ପରିବାରଙ୍କ ନିକଟରେ ଯୋଗେଇ ଦେଇ ଥିଲେ । ହରଭଙ୍ଗା ଗୋଷ୍ଠି ଉନ୍ନୟନ ଅଧିକାରୀ ଶରତ ଚନ୍ଦ୍ର ସେଠୀଙ୍କ ନେତୃତ୍ୱରେ କନିଷ୍ଠ ଯନ୍ତ୍ରୀ ବିନୟ ତିରିୟା ଓ ସରପଞ୍ଚ ରଞ୍ଜିତ ବେହେରା ଓ ସ୍ୱାସ୍ଥ୍ୟ ସେବା ଦଳ ପ୍ରମୁଖ ମାରଡ଼ା ଗାଁକୁ ଯାଇ ବିପନ୍ନ ପରିବାରକୁ ଶୁଖିଲା ଖାଦ୍ୟ ଯୋଗେଇ ଦେବା ସହ ବିପନ୍ନ ପରିବାରଙ୍କ ସ୍ୱାସ୍ଥ୍ୟ ପରୀକ୍ଷା ଓ ଔଷଧ ବଣ୍ଟନ କରିଥିଲେ। ବର୍ତ୍ତମାନ ମହାନଦୀର ଜଳସ୍ତର ୮୪.୯ମିଟର ଥିବାବେଳେ ବନ୍ୟା ଜଳ ସାମାନ୍ୟ ହ୍ରାସ ହେବାରେ ଲାଗିଛି । ଲୋକମାନେ ଭୟବୀତ ନ ହେବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସତର୍କ କରାଯାଇଥିବା ସୂଚନା ମିଳିଛି ।
