ବାଙ୍ଗିରିପୋଷି,୧୨/୭ : ସୁଦୂର ଗୁଜୁରାଟରୁ ଚୋରି ହେଲା ଶିଶୁକନ୍ୟା। ପଡ଼ୋଶୀ ପଡ଼ୋଶୀ ମଧ୍ୟରେ ଝଗଡ଼ା ପରେ ବାଙ୍ଗିରିପୋଷିରୁ ଉଦ୍ଧାର। ଏପରି ଏକ ସମ୍ବେଦନଶୀଳ ଏବଂ ଅମାନବିକତାର ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଅଞ୍ଚଳରେ। ଘଟଣାଟି ପ୍ରଘଟ ପରେ ଏକ ୩ବର୍ଷର ଶିଶୁକନ୍ୟାକୁ ଅଙ୍ଗନବାଡି କର୍ମୀଙ୍କ ଦ୍ୱାରା ଉଦ୍ଧାର ହେବା ପରେ ଏକ ସ୍ପର୍ଶକାତରତା ଘଟଣା ସାମ୍ନାକୁ ଆସିଛି ।
ସୂଚନା ଅନୁସାରେ, ମୟୂରଭଞ୍ଜ ଜିଲ୍ଲାର ବାଙ୍ଗିରିପୋଷି ଥାନା ଅନ୍ତର୍ଗତ ଅଳାଁଗୁଞ୍ଜା ଗ୍ରାମର ରିନା ସିଂ ନାମକ ଜଣେ ମହିଳା ଏକ ଶିଶୁ କନ୍ୟାକୁ ଘରେ ରଖିଥିଲେ। ଏ କଥା ରିନାଙ୍କ ଶାଶୁ ସ୍ଥାନୀୟ ଅଙ୍ଗନବାଡି କର୍ମୀ ସରିତା ଜୟନ୍ତୀ ବେହେରାକୁ ଖବର ଦେବା ପରେ ଅଙ୍ଗନବାଡି କର୍ମୀ ଯଥାଶୀଘ୍ର ତାଙ୍କ ଉପରିସ୍ଥ ଅଧିକାରୀଙ୍କୁ ଜଣାଇଥିଲେ । ଏହି ଘଟଣା ପ୍ରଚାରିତ ହେବା ପରେ ଗ୍ରାମବାସୀ ଏବଂ ଅଙ୍ଗନୱାଡି କର୍ମୀ ଶିଶୁକନ୍ୟାକୁ ବାଙ୍ଗିରିପୋଷି ଥାନାକୁ ନେଇ ଆସିଥିଲେ । ଗ୍ରାମବାସୀଙ୍କ କହିବା ମୁତାବକ, ଶିଶୁକନ୍ୟାକୁ ରଖିଥିବା ରିନା ସିଂ ଏହି ଶିଶୁକନ୍ୟାକୁ ଗାଁର ମୁନି ସିଂଙ୍କ ଘରେ ପୂର୍ବରୁ ଦେଖିଥିଲେ । ହେଲେ ମୁନି ସିଂଙ୍କ ଏହି ଶିଶୁ ନିଜର ହୋଇ ନ ଥିବାବେଳେ ବାରମ୍ବାର ନିର୍ଯାତନା ମଧ୍ୟ ଦେଉଥିବା ଦେଖି ମୁନି ସିଂଙ୍କୁ ତାଗିଦ୍ କରିଥିଲେ। ଫଳରେ ମୁନି ଏବଂ ରିନାଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ମୁନି ସିଂ ରାଗିଯାଇ ଶିଶୁକନ୍ୟାକୁ ତୁ ରଖ କହି ତାଙ୍କ ଘରେ ଛାଡ଼ି ଚାଲି ଯାଇଥିଲେ । ମୁନି ସିଂ ଏବଂ ତାଙ୍କ ସ୍ୱାମୀ ବଜ୍ଞାଡା ସିଂ ପୂର୍ବରୁ ଗୁଜୁରାଟରେ ଶ୍ରମିକ ଭାବେ କାର୍ଯ୍ୟ କରୁଥିଲେ ଏବଂ ଗାଁକୁ ଫେରିବାବେଳେ ଶିଶୁକନ୍ୟାକୁ ସାଙ୍ଗରେ ଆଣିଥିଲେ ।
ଏହି ଘଟଣା ଜିଲ୍ଲା ଶିଶୁ ସୁରକ୍ଷା ୟୁନିଟ ହସ୍ତକ୍ଷେପ ପରେ ଥାନାକୁ ଆସିଥିଲା । ପୋଲିସ ଏହି ଘଟଣାକୁ ଏକ ଷ୍ଟେସନ ଡାଏରୀ କରି ତଦନ୍ତ ଆରମ୍ଭ କରିଛି । ପ୍ରାଥମିକ ତଦନ୍ତରୁ ଜଣାପଡ଼ିଛି କି ମୁନି ସିଂ ଏବଂ ତାଙ୍କ ସ୍ୱାମୀ ବଜ୍ଞାଡା ଗୁଜରାଟରୁ ଫେରିବାବେଳେ ଷ୍ଟେସନରେ ଶିଶୁକନ୍ୟାଟି କାନ୍ଦୁଥିବାର ଦେଖିବାକୁ ପାଇଥିଲେ ଏବଂ ସେହି ଠାରୁ ସେମାନେ ଶିଶୁକନ୍ୟାକୁ ସାଙ୍ଗରେ ନେଇ ଆସିଥିଲେ। ଏକ ମାସ ଧରି ନିଜ ସଙ୍ଗରେ ରଖିବା ସହ ଅନେକ ଥର ଶିଶୁକନ୍ୟା କୁ ନିର୍ଯ୍ୟାତନା ମଧ୍ୟ ଦେଉଥିଲେ । ଶିଶୁ ସୁରକ୍ଷା ୟୁନିଟ ଶିଶୁକନ୍ୟା କୁ ଚିକିତ୍ସା କରାଇଛନ୍ତି। ପୋଲିସ ଏବେ ଶିଶୁକନ୍ୟା ଟି କାହାର ଏବଂ ପ୍ରକୃତରେ କେଉଁ ଅଞ୍ଚଳର ସେ ନେଇ ବିଭିନ୍ନ ଥାନାକୁ ଖବର ଦେଇଛିନ୍ତି । ଶିଶୁଟି କେଉଁ ପରିସ୍ଥିତିରେ ମୁନି ସିଂ ଏବଂ ତାଙ୍କ ସ୍ୱାମୀ ଗୁଜରାଟରୁ ଆଣିଛନ୍ତି ସେ ନେଇ ମଧ୍ୟ ତଦନ୍ତ କରିବା ସହ ଦମ୍ପତିଙ୍କ ଉପରେ ନଜର ରଖିଛି ବୋଲି ବାଙ୍ଗିରିପୋଷି ଆଇଆଇସି ବିରେନ୍ଦ୍ର ସେନାପତି କହିଛନ୍ତି । ଅନ୍ୟପକ୍ଷେ ଶିଶୁଟିକୁ ପାଇଥିଲେ କିମ୍ବା ଚୋରି କରି ଆଣିଥିଲେ ତାହା ତଦନ୍ତ ଜରୁରୀ ବୋଲି ଗ୍ରାମବାସୀ କହିଛନ୍ତି।
