ନିଆଳି ,୨୩।୪ : ବିଲରୁ ମୁଗ ଗୋଚ୍ଛା ଆଣୁଥିବା ବେଳେ ଟଳିପଡିଲେ ଚାଷୀ । ମୃତ ଚାଷୀ ଜଣକ ହେଲେ ବିମ୍ବାଧର ଦାଶ। ନିଆଳି ତହସିଲ ଅଧିନସ୍ଥ ବିଳାଶୁଣୀ ପଂଚାୟତ ତରବଣ ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି। ଅଂଶୁଘାତରେ ମୃତ୍ୟୁ ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି।
ତରବଣ ଗ୍ରାମର ଚାଷୀ ବିମ୍ବାଧର ଦାଶ (୭୨)ବିଲରୁ ମୁଗ ଗୋଚ୍ଛା ନେଇ ଆସୁଥିବା ସମୟରେ ବିଲରେ ଟଳି ପଡ଼ିଥିଲେ। ଏହା ଦେଖି ସେଠାରେ ଥିବା ଲୋକମାନେ ବିଲକୁ ଦୌଡିଯାଇଥିଲେ। ବିମ୍ବାଧର ମରିଯାଇଥିବା ଦେଖିବାକୁ ପାଇଥିଲେ। ଖବର ପାଇ ଘଟଣା ସ୍ଥଳରେ ଲିଲନ ପ୍ରସାଦ ସାହୁ, ନିଆଳି ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଏସ ନବୀନ, ବିଳାଶୁଣୀ ସରପଞ୍ଚ ସବିତା ନନ୍ଦ, ସମିତି ସଭ୍ୟ ସମ୍ପଦ ମହାନ୍ତି, ମନୋରଞ୍ଜନ ବେହେରା, ପ୍ରଦୀପ୍ତ ବେହେରା, ଆର ଆଇ ସୁଶାନ୍ତ ବିଶ୍ୱାଳ ପହଂଚିଥିଲେ। ନିଆଳି ଥାନା ପୋଲିସ ପହଂଚି ଶବ ବ୍ୟବଛେଦ ନିମନ୍ତେ ବଡ଼ ଡାକ୍ତର ଖାନା ପଠାଇଛନ୍ତି। ବ୍ୟବଛେଦ ରିପୋର୍ଟ ଆସିଲା ପରେ ପ୍ରକୃତ ସତ୍ୟତା ଜଣା ପଡିବ। ଖରାରେ ମୁଗ ଆଣୁଥିବା ବେଳେ ଟଳି ପଡୁଥିବାରୁ ପରିବାର ଲୋକେ ଅଂଶୁଘାତରେ ମୃତ୍ୟୁ ହୋଇଥିବା ଅଭିଯୋଗ ଆଣିଛନ୍ତି।
