ଭୁବନେଶ୍ୱର, ୨୫/୦୪: ନକଲି ଟଙ୍କା କାରବାରରେ ଅଭିଯୁକ୍ତଙ୍କୁ ପୋଲିସ ଜିମା ଦେଲେ ଗ୍ରାମବାସୀ । ଡେଲାଙ୍ଗ ସାଧପଡା ଗାଁରେ ୩ ଜଣଙ୍କୁ ଅଟକ ରଖିଥିଲେ ଗ୍ରାମବାସୀ । ସେମାନଙ୍କ ନିକଟରୁ ଟଙ୍କା ଗଣତି ମେସିନ ଓ ଟଙ୍କା ଛପା ପେପର ସହ ଏକ କାର୍ ଜବତ କରାଯାଇଛି । ପୁରୀ ଜିଲ୍ଲା ପିପିଲି ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସାଧପଡ଼ା ଗାଁର କିଛି ଯୁବକଙ୍କୁ ଅଭିଯୁକ୍ତମାନେ ୫୦ ହଜାର ଟଙ୍କା ଦେଇ ୩ ଲକ୍ଷ ଟଙ୍କା ନିଅ ବୋଲି କହୁଥିଲେ । ଏନେଇ ସୂଚନା ପାଇ ଗ୍ରାମବାସୀ ନକଲି ଟଙ୍କା କାରବାର ଗ୍ୟାଙ୍ଗ ବୋଲି ସନ୍ଦେହ କରିଥିଲେ । ସନ୍ଦେହ କରି ଗୁରୁବାର ରାତିରୁ ଏକ କାର୍ ସହ ୩ ଜଣଙ୍କୁ ଏକ ଘରେ ଅଟକ ରଖିଥିଲେ ଗ୍ରାମବାସୀ । ଅଟକ ଥିବା ବ୍ୟକ୍ତିଙ୍କ ନିକଟରେ ଟଙ୍କା ଗଣତି ମେସିନ ଓ ଟଙ୍କା ଛପା ପେପର ଥିବା ଗ୍ରାମବାସୀ ଅଭିଯୋଗ କରିଛନ୍ତି । ପରେ ସମସ୍ତ ଅଭିଯୁକ୍ତଙ୍କୁ ପୋଲିସ ଜିମା ଦେଲେ ଗ୍ରାମବାସୀ । ୩ ଜଣଙ୍କୁ ଅଟକ ରଖି ତଦନ୍ତ କରୁଛି ପୋଲିସ ।
