ଭୁବନେଶ୍ୱର,୧୭/୧୦: ଜାମତରା ଗ୍ୟାଙ୍ଗ ଭଳି ନକଲି କଲ୍ ସେଣ୍ଟର ଚଳାଉଥିଲେ । କିନ୍ତୁ ଆମେରିକା ଓ ବ୍ରିଟେନ୍ ବାସିନ୍ଦା ଏମାନଙ୍କ ଟାର୍ଗେଟରେ ଥିଲେ । ଆଣ୍ଟି ଭାଇରସ ଯୋଗାଇବା ନାଁରେ ବିଦେଶୀଙ୍କଠୁ ଶହ ଶହ ଡଲାର ଚୂନ ଲଗାଉଥିଲେ । ରାଜଧାନୀ ଉପକଣ୍ଠ ସୁନ୍ଦରପଦାର କାଞ୍ଚନ ଟାୱାର ଆପାର୍ଟମେଣ୍ଟରୁ ଏଭଳି ଏକ ନକଲି କଲ ସେଣ୍ଟର ଠାବ ହୋଇଛି । ସାଇବର ଓ ଅର୍ଥନୈତିକ ଥାନା ପୁଲିସ ଆପାର୍ଟମେଣ୍ଟରୁ ୬ଜଣଙ୍କୁ ଗିରଫ କରିଛି । ସେମାନେ ହେଲେ, ସମୀର ମୋବିନ୍, ମହମ୍ମଦ ଜାଭେଦ୍ ହୁସେନ୍, ମହମ୍ମଦ ତୋସିଫ, ଫୈଜାନ ଆଲାମ୍, ସାଇବ୍ ରାଜା, ମହମ୍ମଦ ହାଇଦର ଅଲ୍ଲୀ । ସମସ୍ତଙ୍କ ଘର ପଶ୍ଚିମବଙ୍ଗର କୋଲକାତା ସହରରେ । ସମୀର ହେଉଛି ଗ୍ୟାଙ୍ଗର ମାଷ୍ଟରମାଇଣ୍ଡ । ସେମାନଙ୍କଠାରୁ ୬ଟି ଲାପ୍ଟପ୍, ୧୧ଟି ମୋବାଇଲ୍, ଜିଓ ଏୟାର ଫାଇବର, ୱାଇ-ଫାଇ ରାଉଟର ଓ ଅନ୍ୟାନ୍ୟ ଇଣ୍ଟରନେଟ୍ ସରଞ୍ଜାମ ଜବତ କରାଯାଇଛି । ଡିସିପି ପିନାକ ମିଶ୍ର କହିଛନ୍ତି, କମିଶନରେଟ ପୁଲିସର ୬ ଜଣିଆ ସାଇବର ଟିମ୍ ବୁଧବାର ସକାଳୁ ଉକ୍ତ ଫ୍ଲାଟ୍ରେ ଚଢ଼ାଉ କରିଥିଲା । କାଞ୍ଚନ ଟାୱାର ଆପାର୍ଟମେଣ୍ଟ ‘ବ୍ଲକ୍-ଏ’ର ଫ୍ଲାଟ୍ ନଂ-୨୦୫ର ମାଲିକ ହେଉଛନ୍ତି ବିକାଶ ରଞ୍ଜନ ସାହୁ । ସେ ଏକ ଘରୋଇ ବ୍ୟାଙ୍କର ଉଚ୍ଚପଦସ୍ଥ ଅଧିକାରୀ । ତାଙ୍କଠାରୁ ୪ ମାସ ତଳେ ସମୀର ଏହି ଫ୍ଲାଟ୍କୁ ଭଡ଼ା ହିସାବରେ ନେଇଥିଲେ । ପରେ ଅନ୍ୟ ସହଯୋଗୀଙ୍କୁ ଡକାଇ ଆରମ୍ଭ କରିଥିଲେ ନକଲି କଲ୍ ସେଣ୍ଟର । ଏମାନେ ଦିନତମାମ ସହରରେ ବୁଲୁଥିଲେ, ଫ୍ଲାଟ୍ରେ ଶୋଇ ରହୁଥିଲେ । ରାତି ଅଧରେ ସ୍କାଏପ୍ ଓ ଭିଓଆଇପି ଯୋଗେ ଆମେରିକା, ଲଣ୍ଡନର ନାଗରିକଙ୍କୁ ଫୋନ୍ କରି ଆଣ୍ଟି ଭାଇରସ ଯୋଗାଇବା ନାଁରେ ଚୂନ ଲଗାଉଥିଲେ । ଅଧିକ ତଦନ୍ତ ପାଇଁ ଟେକ୍ନିକାଲ ଟିମ୍ର ସାହାଯ୍ୟ ନିଆଯାଉଥିବା ଶ୍ରୀ ମିଶ୍ର କହିଛନ୍ତି ।
କିଏ ସେ ସଞ୍ଜୟ?
ପୁଲିସ ସ୍କାନର୍ରେ ଏବେ ସଞ୍ଜୟ ନାମକ ଜଣେ ବ୍ୟକ୍ତି । ଏହି ବ୍ୟକ୍ତି ପ୍ରତି ସପ୍ତାହରେ ୨/୩ ଥର ଉକ୍ତ ‘୍ଲାଟ୍କୁ ଯିବା ଆସିବା କରୁଥିଲା । ଆପାର୍ଟମେଣ୍ଟର ସିକ୍ୟୁରିଟି ଗାର୍ଡଙ୍କୁ ଜିଓ କର୍ମଚାରୀ ବୋଲି ପରିଚୟ ଦେଉଥିଲା । କାନ୍ଧରେ ବ୍ୟାଗ୍ ଖଣ୍ଡେ ଝୁଲେଇ ଟହଲ ମାରି ‘୍ଲାଟ୍ ଭିତରକୁ ପଶୁଥିଲା । ରେଜିଷ୍ଟର ଖାତାରେ ନିଜ ନାଁ, ମୋବାଇଲ୍ ନମ୍ବର ସହ ଜିଓ କର୍ମଚାରୀ ବୋଲି ଉଲ୍ଲେଖ କରିଥିଲା । ପୁଲିସର ସନ୍ଦେହ ହେଉଛି, କେହି ଜିଓ କର୍ମଚାରୀ ରାଉଟର କିମ୍ବା ନେଟୱର୍କ ସଜାଡିବା ଉଦ୍ଦେଶ୍ୟରେ ‘୍ଲାଟ୍କୁ ଏତେ ଥର ଯା’ ଆସ କରିବେନି । ସଞ୍ଜୟର ଏହି ଗ୍ୟାଙ୍ଗ ସହ କୌଣସି ଭିତିରି ସମ୍ପୃକ୍ତି ରହିଛି ।
ରାତିକରେ ୫ ଲକ୍ଷ ରୋଜଗାର
ଜଣେ ସାଇବର ଠକ ଗୋଟିଏ ଦିନରେ ଅତି କମ୍ରେ ଶହେ କିମ୍ବା ଦେଢ଼ ଶହ ବିଦେଶୀ ନାଗରିକଙ୍କ ଇ-ମେଲ୍କୁ ‘ିସିଂ ମେଲ୍ ପଠାଉଥିଲେ । ପ୍ରତି ଆଣ୍ଟି ଭାଇରସ୍ ପିଛା ୭୫ରୁ ୧୦୦ ଡଲାର ଡିମାଣ୍ଡ୍ କରୁଥିଲେ । ସେଥିରୁ ଯଦି ୧୦ ଜଣ ବି ଏମାନଙ୍କ ‘ଆଣ୍ଟି ଭାଇରସ’ ଜାଲରେ ‘ସୁଥିଲେ, ସେମାନଙ୍କଠାରୁ ଅତିକମ୍ରେ ରାତିକରେ ହଜାରେ ଡଲାର କମାଉଥିଲେ । ଯାହାକି ଭାରତୀୟ ମୁଦ୍ରା ହିସାବରେ ୮୫ ହଜାର ଟଙ୍କା । ଏହି କଲ୍ ସେଣ୍ଟରରେ କାମ କରୁଥିବା ୬ଜଣ ଠକ ଗୋଟିଏ ରାତିରେ ୫ ଲକ୍ଷ ଟଙ୍କା କମାଉଥିଲେ ।
ମେଲ୍କୁ ପଠାଉଥିଲେ ଫିସିଂ ମେଲ୍
ଏହି ସାଇବର ଠକ ଗ୍ୟାଙ୍ଗର ଠକେଇ ତରିକା ପୂରା ଭିନ୍ନ । ଆମେରିକା, ବ୍ରିଟେନ୍ ବିଦେଶୀ ନାଗରିକ ଏମାନଙ୍କ ମୁଖ୍ୟ ଟାର୍ଗେଟ ଥିଲା । ଜାମତରା ଗ୍ୟାଙ୍ଗ ଶୈଳୀରେ ଏମାନଙ୍କ ପାଖରେ ହଜାର ହଜାର ବିଦେଶୀଙ୍କ ଡାଟାବେସ୍ ରହୁଥିଲା । ଏସବୁ ଡାଟାବେସ୍ରୁ ଇମେଲ୍ ଆଇଡି ବାହାର କରି ଉକ୍ତ ଆଇଡିକୁ ମ୍ୟାକ୍ଫି ଓ ନରଟୋନ ଫିସିଂ ମେଲ୍ ପଠାଉଥିଲେ । ଯାହାକି ଏକ ରକମର ଆଣ୍ଟି ଭାଇରସ । ସମ୍ପୃକ୍ତ ବିଦେଶୀଙ୍କ ଲାପ୍ଟପ୍ କିମ୍ବା କମ୍ପ୍ୟୁଟରରୁ ମେଲ୍ ଆଇଡି ଖୋଲିବା କ୍ଷଣି ଏହି ଆଣ୍ଟି ଭାଇରସଟି ଦେଖା ଯାଉଥିଲା । ତା’ ତଳେ ଏକ ଟୋଲ୍ ଫ୍ରି ନମ୍ବର (ତ୍କ୧୮୪୫୪୭୮୪୨୩୬) ଉଲ୍ଲେଖ ରହୁଥିଲା ।
କୋଲକାତା ସଲ୍ଟ ଲେକ୍ରୁ ଠକେଇ ଶିଖିଥିଲେ
ଦୀର୍ଘ ବର୍ଷ ଧରି କୋଲକାତା ସଲ୍ଟଲେକ୍ରେ ଏଭଳି ମାଳ ମାଳ ନକଲି କଲ୍ ସେଣ୍ଟର ଚାଲିଛି । ଗ୍ୟାଙ୍ଗର ସଦସ୍ୟମାନେ ସେଇଠୁ ବିଦେଶୀଙ୍କୁ ଚୂନ ଲଗାଇବା ତରିକା ଶିଖିଥିଲେ । ଆଗାମୀ ଦିନରେ ୬ ଜଣ ଅଭିଯୁକ୍ତଙ୍କୁ ରିମାଣ୍ଡରେ ନିଆଯିବ । ଗ୍ୟାଙ୍ଗରେ ଆଉ କେଉଁମାନେ ସଂପୃକ୍ତ ଅଛନ୍ତି, ସେନେଇ ଜେରା କରାଯିବ । ଯଦି ସଲ୍ଟଲେକ୍ରେ କେହି ସହଯୋଗୀ ଥିବାର ତଥ୍ୟ ମିଳେ, ସେମାନଙ୍କୁ ଧରିବା ପାଇଁ ପୁଲିସର ଏକ ଦଳ କୋଲକାତା ଯାଇପାରେ ।
ଅନର୍ଗଳ ଇଂରାଜୀ କହି ଭକୁଆ ବନାଉଥିଲେ
ଏହି ନମ୍ବରକୁ ବିଦେଶୀଜଣକ ଯୋଗାଯୋଗ କରିବା ପରେ ଠକେଇର ଦ୍ୱିତୀୟ ପର୍ଯ୍ୟାୟ ଆରମ୍ଭ ହେଉଥିଲା । ଲାଟିନ୍ ଆମେରିକା ଭଳି ଅନର୍ଗଳ ଇଂରାଜୀରେ ଗପି ପାରୁଥିବା ସାଇବର ଠକ ହିଁ ସମ୍ପୃକ୍ତ ବିଦେଶୀଙ୍କ ସହ ଡିଲ୍ କରୁଥିଲେ । ନିଜକୁ ମ୍ୟାକ୍ଫି ଓ ନରନୋଟ ଆଣ୍ଟି ଭାଇରସର କଷ୍ଟମର କେୟାର ଏଜେଣ୍ଟ ବୋଲି ପରିଚୟ ଦେଉଥିଲେ । ସ୍କାଏପ୍ ଓ ଭିଓଆଇପି ଜରିଆରେ ଏମାନେ ବିଦେଶୀଙ୍କ ସହ କଥା ହେଉଥିଲେ । ଆଣ୍ଟି ଭାଇରସ ଜରିଆରେ ହ୍ୟାଙ୍ଗ ହେଉଥିବା କମ୍ପ୍ୟୁଟର କିମ୍ବା ଲାପଟପ ସଜାଡ଼ିଥିବା ଦର୍ଶାଇ ଶହ ଶହ ଡଲାର ଲୁଟୁଥିଲେ । ଏସବୁ ଡଲାରକୁ ନାନା ହାୱାଲା ଜରିଆରେ ଭାରତୀୟ ମୁଦ୍ରାରେ ବଦଳାଇ ଗୋଟିଏ ରାତିରେ ଲକ୍ଷ ଲକ୍ଷ ଟଙ୍କା କମାଉଥିଲେ ।
