କଣାସ,୨୨/୦୭: ଡେଲାଙ୍ଗ ହାଟ ସାହି ନିକଟରେ ଭୁଶୁଡିଲା ଦୟା ନଦୀବନ୍ଧ । ନିମ୍ନମାନର କାମ ହୋଇଥିବା ହେତୁ ଆଠ ଦିନ ପୂର୍ବରୁ ଏଭଳି ପରିସ୍ଥିତି ଉପୁଜିଥିଲା । ମାରାମତି ପରେ ବି ନଦୀବନ୍ଧର ଅବସ୍ଥା ଶୋଚନୀୟ ରହିଛି । ଫଳରେ ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି ।

ସୂଚନା ଅନୁଯାୟୀ, କିଛିଦିନ ପୂର୍ବରୁ ୨୫ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରାଯାଇ ଦୟା ନଦୀବନ୍ଧ କାମ କରାଯାଇଥିଲା। ନିମ୍ନମାନର କାମ ହୋଇଥିବା ହେତୁ ବନ୍ଧ ଭୁଶୁଡି ପଡିଥିଲା। ଏବେ ସଙ୍କଟାପନ୍ନ ଅବସ୍ଥାରେ ଡେଲାଙ୍ଗ ହାଟ ସାହି ଗାଁ ନିକଟ ଦୟା ନଦୀବନ୍ଧ ଧୀରେଧୀରେ ଦବିବାରେ ଲାଗିଛି । ବନ୍ୟା ସମୟରେ ଏହି ସ୍ଥାନ ରେଡ୍ ଜୋନରେ ଆସିଥାଏ ।  ଆଗକୁ ମାତ୍ରାଧିକ ବର୍ଷା ଯୋଗୁଁ ବନ୍ୟା ଆଶଙ୍କା ନେଇ ଭୟଭୀତ ହେଉଛନ୍ତି କଣାସ ଓ ଡେଲାଙ୍ଗ ବାସିନ୍ଦା ।

ନଦୀର ବାଙ୍କାଣୀ ସ୍ଥାନରେ ବନ୍ଧ ଭୁଶୁଡିଛି । ପୁରା ନଦୀର ସମ୍ପୂର୍ଣ୍ଣ ସ୍ରୋତ ଏହି ସ୍ଥାନରେ ମାଡ଼ ହୁଏ । ଏପରି ସ୍ଥିତିରେ କେବଳ ବାଉଁଶ, ବଲ୍ହା ସହିତ ବାଲି ଅଖାକୁ ପାଲ ଲଗାଇ ପଳାଇଛନ୍ତି ପ୍ରଶାସନିକ ଯନ୍ତ୍ରୀ । ତେବେ ପ୍ରଶାସନ ସ୍ଥାୟୀ ପ୍ରତିକାର ନକରି କେବଳ ବାଲି ବସ୍ତାକୁ ବିକଳ୍ପ କରି ଠିକାଦାରକୁ କାର୍ଯ୍ୟରେ ଲଗାଇଥିବା ଅଭିଯୋଗ ଆଣିଛନ୍ତି ସ୍ଥାନୀୟ ଲୋକେ । ଆଗକୁ ଅଛି ଅଧିକ ବର୍ଷା ତେବେ କ’ଣ ହେବ ଦୟା ନଦୀବନ୍ଧର ସ୍ଥିତି, ତାହା କେବଳ ସମୟ କହିବ ।