କେନ୍ଦୁଝର, ୦୧/୧୧: କେନ୍ଦୁଝର ବନଖଣ୍ଡର ସଦର ରେଞ୍ଜକୁ ଧସେଇ ପଶିଥିଲେ ୨୮ ଟିକିଆ ହାତୀପଲ । ଏହି ହାତୀପଲ ବିଲରେ ପଶି ଖାଇ ଯାଉଛନ୍ତି ଏକର ଏକର ଫସଲ । ହାତୀପଲଙ୍କ ଏଭଳି ଉପଦ୍ରବ ଦେଖି ଲୋକେ ଭୟଭୃୀତ ଅବସ୍ଥାରେ ରହିଛନ୍ତି । 

ସୂଚନା ମୁତାବକ, କେନ୍ଦୁଝର ବନଖଣ୍ଡର ସଦର ରେଞ୍ଜକୁ ଏକ ୨୮ ଟିକିଆ ହାତୀପଲ ଧସେଇ ପଶି ଆସିଥିଲେ । ହାତୀ ପଲ ଗାଁ ନିକଟରେ ଥିବା ଜଙ୍ଗଲରେ ଡେରା ପକାଇବା ସହ ଗାଁରେ ଥିବା ବିଲରେ ପଶି ଯାଉଛନ୍ତି । ବିଲରେ ପଶି ଫସଲ ଖାଇ ନଷ୍ଟ ମଧ୍ୟ କରୁଛନ୍ତି । ତେଣୁ ଅନେକ ଥର ଗାଁ ଲୋକେ ଏହି ହାତୀପଲଙ୍କୁ ବିଲରୁ ତଡ଼ିବାକୁ ଚେଷ୍ଟା କରି ବିଫଳ ହେଉଛନ୍ତି । ଏବେ ହାତୀପଲଙ୍କ ମୁହଁରୁ ତାଙ୍କ ଚାଷକୁ କିପରି ସୁରକ୍ଷା ଦେବେ ଓ ପରିବାର ମୁହଁରେ ଆହାର ଦେବେ ସେହି ଚିନ୍ତାରେ ଅଛନ୍ତି ଚାଷୀ । 

ତେବେ ଏହି ଘଟଣା ବିଷୟରେ ବନ ବିଭାଗକୁ ଖବର ଦେଇଥିଲେ ଗ୍ରାମବାସୀ । ଖବର ପାଇ ବନ ବିଭାଗର ଏକ ଟିମ୍‌ ଏହି ଅଞ୍ଚଳରେ ହାତୀଙ୍କ ଉପରେ ତୀକ୍ଷ୍ମ ନଜର ରଖିଛନ୍ତି । ହାତୀଙ୍କ ଦ୍ୱାରା ଫସଲ ନଷ୍ଟ ହେଲେ ସରକାରଙ୍କ ଅନୁକମ୍ପା ରାଶିର ବ୍ୟବସ୍ଥା ରହିଛି ।  ତେଣୁ ହାତୀଙ୍କ ପାଖକୁ ଯାଇ ବିପଦକୁ ନ ଡାକିବାକୁ ବନ ବିଭାଗ ପକ୍ଷରୁ ଜନ ସାଧାରଣଙ୍କୁ ନିବେଦନ କରାଯାଇଛି ।