ନୂଆଦିଲ୍ଲୀ: ଆମେରିକା ଇତିହାସର ସବୁଠୁ ଅଧିକ ଅବୈଧ ପ୍ରବାସୀଙ୍କୁ ନିଜ ଦେଶରୁ ବାହାର କରିବେ ବୋଲି ଡୋନାଲ୍ଡ ଟ୍ରମ୍ପ ନିର୍ବାଚନୀ ପ୍ରଚାରରେ ଘୋଷଣା କରିଥିଲେ। ସେ ୨୦୨୫ ମସିହା ଜାନୁଆରି ୨୦ ତାରିଖରେ ରାଷ୍ଟ୍ରପତି ପଦରେ ବସିବାକୁ ଯାଉଛନ୍ତି। ଏହି ପରିପ୍ରେକ୍ଷିରେ ଆମେରିକାର ଇମିଗ୍ରେସନ ଓ କଷ୍ଟମ ଏନଫୋର୍ସମେଣ୍ଟ(ଆଇସିଇ) ବିଭାଗ ଦେଶରେ ଅବୈଧ ଭାବରେ ରହୁଥିବା ୧୫ ଲକ୍ଷ ଲୋକଙ୍କ ବିବରଣୀ ଜାରିକରିଛି। ଏହି ବିବରଣୀରେ ୧୮,୦୦୦ରୁ ଅଧିକ ଭାରତୀୟଙ୍କ ନାମ ରହିଛି। ସେମାନଙ୍କୁ ତୁରନ୍ତ ଚିହ୍ନଟ କରି ଭାରତକୁ ଫେରାଇବା ପାଇଁ ଆମେରିକା ସରକାର ପ୍ରସ୍ତୁତି ଆରମ୍ଭ କରିସାରିଲେଣି।
ଆମେରିକାରେ ମୋଟ ୧୫ ଲକ୍ଷରୁ ଅଧିକ ଲୋକ ଅବୈଧ ଭାବେ ରହୁଛନ୍ତି। ତା ମଧ୍ୟରେ ଭାରତରୁ ୧୭,୯୪୦ ଜଣ ଲୋକ ଆମେରିକାରେ ଅବୈଧ ଭାବେ ରହୁଥିବା ନେଇ ନଭେମ୍ବର ୨୦୨୪ରେ ଆଇସିଇ ଜାରି କରିଥିବା ଏକ ରିପୋର୍ଟରେ ଉଲ୍ଲେଖ ରହିଛି। ସେମାନଙ୍କୁ ତୁରନ୍ତ ଚିହ୍ନଟ କରି ନିଜ ଦେଶରୁ କାଢିବା ପାଇଁ ଆମେରିକା ସରକାର ରିମୋଭାଲ ଅର୍ଡର ଜାରିକରିଛନ୍ତି ବୋଲି ଜଣାପଡିଛି।
ଆମେରିକାରେ ଭାରତର ପ୍ରାୟ ୭,୨୫,୦୦୦ ଅବୈଧ ନାଗରିକ ରହୁଛନ୍ତି। ଯାହା ମେକ୍ସିକୋ ଓ ଏଲ ସାଲଭାଡୋର ଦେଶପରେ ତୃତୀୟ ସର୍ବାଧିକ ବୋଲି ପିଉ ରିସର୍ଚ୍ଚ ସେଣ୍ଟର ଦ୍ୱାରା ଜାରି କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।
ଆମେରିକା ଚଳିତ ବର୍ଷ ଅକ୍ଟୋବର ୨୨ ତାରିଖରେ ଏକ ଚାଟାର୍ଡ ପ୍ଲେନ ଯୋଗେ ନିଜ ଦେଶରେ ରହୁଥିବା ଅବୈଧ ଭାରତୀୟ ନାଗରିକଙ୍କୁ ଭାରତକୁ ପଠାଇଥିଲା। ଏହି ଅପରେସନ ଭାରତୀୟ ସରକାର ଓ ଆମେରିକାର ହୋମଲାଣ୍ଡ ସିକ୍ୟୁରିଟି ଦ୍ୱାରା ମିଳିତ ଭାବେ କରାଯାଇଥିଲା।
ଆମେରିକାରେ ରହୁଥିବା ହଜାରହଜାର ଅବୈଧ ଭାରତୀୟ ନାଗରିକ ନିଜର ସ୍ଥିତିକୁ ବୈଧ କରିବା ପାଇଁ ଅନେକ ସଂଘର୍ଷ କରୁଛନ୍ତି। ଆଇସିଇରୁ କ୍ଲିୟରାନ୍ସ ପାଇବାପାଇଁ ଅନେକ ଭାରତୀୟ ବର୍ଷବର୍ଷ ଧରି ଅପେକ୍ଷାରେ ଅଛନ୍ତି। ମିଳିଥିବା ସୂଚନା ଅନୁସାରେ, ବିଗତ ତିନି ଆର୍ଥିକ ବର୍ଷ ମଧ୍ୟରେ ଅମେରିକାରେ ଅବୈଧ ଭାବେ ପ୍ରବେଶ କରିବା ପାଇଁ ପ୍ରାୟ ୯୦,୦୦୦ ଭାରତୀୟଙ୍କୁ ଗିରଫ କରାଯାଇଛି। ଆଇସିଇ ଦ୍ୱାରା ପ୍ରକାଶିତ ରିପୋର୍ଟରେ ହୋଣ୍ଡୁରାସରୁ ସର୍ବାଧିକ ୨,୬୨,୬୫୧ ଜଣ ସର୍ବାଧିକ ଅବୈଧ ନାଗରିକ ଥିଲାବେଳେ ଏହାପଛକୁ ଗୁଏଟମାଳା, ମେକ୍ସିକୋ ଓ ଏଲ ସାଲଭାଡୋର ରହିଛି।
