ଭୁବନେଶ୍ୱର, ୨୭।୧୦: ବର୍ତ୍ତମାନ ସମୟରେ ସୁସ୍ଥ ଜୀବନଯାପନ ବଞ୍ଚିବାକୁ ସମସ୍ତେ ଚେଷ୍ଟାରତ । କିନ୍ତୁ, ଆଜିକାଲି ଅଧିକାଂଶ ଲୋକ କୌଣସି ନା କୌଣସି ରୋଗରେ ପୀଡ଼ିତ ଥିବାଟା ନିଶ୍ଚିତ । ତେବେ ଆପଣ କୌଣସି ରୋଗରେ ପୀଡ଼ିତ ଥିଲେ ଆପଣଙ୍କ ଶରୀର ଆଗୁଆ ସୂଚନା ଦେଇଥାଏ । ଯେପରି ତ୍ୱଚା ହଳଦିଆ ପଡ଼ିଲେ କାମଳ ରୋଗର ସଙ୍କେତ ଦିଏ । ଠିକ୍ ସେହପରି ଜିଭର ରଙ୍ଗ ପରିବର୍ତ୍ତନରୁ ଅନେକ ରୋଗର ସଙ୍କେତ ମିଳିଥାଏ । ଆପଣ କେଉଁ ରୋଗରେ ପୀଡ଼ିତ ଜିଭର ରଙ୍ଗରୁ ଜାଣିପାରିବେ ।
ସଂକ୍ରମଣରେ ପୀଡ଼ିତ ଥିଲେ ଜିଭ ଧଳା ତଥା ଶ୍ୱେତ ଦିଶିଥାଏ । ନଚେତ୍ ଲ୍ୟୁକୋପ୍ଲାକିଆରେ ମଧ୍ୟ ଜିଭର ରଙ୍ଗ ଧଳା ଦେଖାଯାଏ । ମୁଖ୍ୟତଃ ଛୋଟପିଲା ତଥା ବୟସ୍କଙ୍କଠାରେ ଏହି ସମସ୍ୟା ଅଧିକ ଦେଖିବାକୁ ମିଳେ । ଧଳା ରଙ୍ଗର ଜିଭ ଡିହାଇଡ୍ରେସନ୍ ସମସ୍ୟାକୁ ଦର୍ଶାଇଥାଏ । ସେହିପରି ଜିଭର ରଙ୍ଗ କଳା ଦେଖାଯିବା ଗଳା ସଂକ୍ରମଣ କିମ୍ୱା ଜୀବାଣୁର ସଙ୍କେତ ଦେଇଥାଏ । ମାତ୍ରାଧିକ ଔଷଧ ସେବନ, ଅଧିକ କେରାଟିନ୍ରୁ ଜିଭର ରଙ୍ଗ କଳା ମଧ୍ୟ ଦେଖାଯାଏ । ମଧୁମେହ ରୋଗୀ, କର୍କଟ ରୋଗ କିମ୍ୱା ପେଟରେ ଘା’ ହେଲେ ମଧ୍ୟ ଜିଭ କଳା ରଙ୍ଗ ହୁଏ । ସେହିଭଳି ଜିଭ ହଳଦିଆ ରଙ୍ଗ ଦେଖାଗଲେ, ଏହା କାମଳ ରୋଗକୁ ସୂଚାଏ । ଡାକ୍ତରଙ୍କ ପରାମର୍ଶ ନେଇ ଜିଭ ରଙ୍ଗ ଅନୁସାରେ ଚିକିତ୍ସା କରିବା ନିହାତି ଜରୁରୀ ।
ଜିଭ ଲାଲ୍ ହେବା କାୱାସାକି ରୋଗ, ଭିଟାମିନ୍ର ଅଭାବ କିମ୍ୱା ଆଲର୍ଜିର ସଙ୍କେତ ଦେଇଥାଏ । ପିଲାଙ୍କୁ ଜ୍ୱର ଥିଲେ ମଧ୍ୟ ଜିଭ ଲାଲ୍ ରଙ୍ଗ ହୋଇଥାଏ । ଯଦି ଆପଣଙ୍କ ଜିଭ ନୀଳ ରଙ୍ଗର ପଡ଼ିଯାଇଛି, ତେବେ ଏହା ସବୁଠୁ ଅଧିକ ବିପଦଜନକ । ଜିଭ ନୀଳ ରଙ୍ଗ ହେବା ହୃଦ୍ସମସ୍ୟାର ସଙ୍କେତ ଦିଏ । ହୃତ୍ପିଣ୍ଡରେ ରକ୍ତ ସଞ୍ଚଳନ ଧୀର ହେଲେ ତଥା ଶରୀରରେ କମ୍ ଅମ୍ଳଜାନ ଯୋଗୁଁ ଜିଭ ନୀଳ ରଙ୍ଗ ଦେଖାଯାଏ । ତେଣୁ ହୃଦ୍ଜନିତ ଏକ ଗମ୍ଭୀର ସମସ୍ୟା ହୋଇଥିବାରୁ ଏଥିପ୍ରତି ସତର୍କ ରହିବା ଆବଶ୍ୟକ । ଯଦି ଜିଭ ରଙ୍ଗ ଫିକା କିମ୍ୱା ହାଲୁକା ଗୋଲାପୀ ରଙ୍ଗ ଦେଖାଯାଏ । ରକ୍ତର ଅଭାବକୁ ଏହା ସଙ୍କେତ ଦିଏ । ଫଳରେ ରକ୍ତହିନତା, ଭିଟାମିନ୍ ବି-୧୨ର ଅଭାବ ପରିଲକ୍ଷିତ ହୁଏ । ଏହାସହ ହଜମଜନିତ ସମସ୍ୟା ଥିଲେ ମଧ୍ୟ ଜିଭ ଏହି ରଙ୍ଗ ଦେଖାଯାଏ । ତେବେ ଜିଭ କେଉଁ ରଙ୍ଗର ହେଲେ ଆପଣ ସୁସ୍ଥ ଅଛନ୍ତି ବୋଲି ଜାଣିପାରିବେ ? ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ, ଫିକା ଗୋଲାପୀ ତଥା କୌଣସି ଦାଗ ନଥିବା ଜିଭ ହିଁ ସୁସ୍ଥତାକୁ ସୂଚାଏ ।
